فوتو: كازتاگ
مارات ابيەۆتىڭ سىبايلاستارى 8 جىلعا باس بوستاندىعىنان ايىرىلعان. سوت شەشىمى بويىنشا ايىپتالۋشىلاردىڭ مۇلكى تاركىلەنىپ, ولاردىڭ كونتراباندالىق جولمەن الىنعان 6 ملرد تەڭگەدەن استام قىلمىستىق تابىسى تاركىلەنگەن.
بۇعان دەيىن اگەنتتىك مارات ابيەۆ پەن ونىڭ سىبايلاستارى — انتون نوۆيتسكي, جانىبەك داريباەۆ, ەۆگەني گرەبنەۆ, اماناي ماحمەتوۆ — قاتىستى الدىن الا تەرگەۋ اياقتالعانىن حابارلاعان ەدى.
ەستەرىڭىزگە سالا كەتەيىك, 2018-2022 جىلدار ارالىعىندا اتالعان تۇلعالار ۇيىمداسقان توپ قۇرىپ, اقتوبە وبلىسىنداعى ءموز-دا ەاەو اۋماعىندا كولەمى 50,6 مىڭ توننا بولاتىن ساتۋعا تىيىم سالىنعان «ك-2» ەكولوگيالىق كلاستى ديزەل وتىنىن وندىرگەن. كەيىن بۇل ديزەل وتىنى باسقا مۇناي ءونىمى رەتىندە 11,3 ملرد تەڭگەگە ساتىلىپ, سونىڭ ىشىندە 22,6 مىڭ تونناسى 6,7 ميلليارد تەڭگەگە شەتەلگە كونتراباندالىق جولمەن شىعارىلعان.
ايتا كەتەيىك, مۇناي ونىمدەرىنىڭ زاڭسىز اينالىمىنان تۇسكەن قىلمىستىق تابىس ارقىلى «Genesis» (نەمەسە «بولاشاق ساۋلەتشىلەرى») اتتى زاڭسىز قوعامدىق بىرلەستىكتىڭ قىزمەتى قارجىلاندىرىلعان, ونى قۇرىپ باسقارعانى ءۇشىن 2023 جىلدىڭ 21 تامىزىندا مارات ابيەۆ 7 جىلعا باس بوستاندىعىنان ايىرىلعان بولاتىن.
سوت ۇكىمى ءالى زاڭدى كۇشىنە ەنگەن جوق.
