فوتو: مادەنيەت جانە اقپارات مينيسترلىگى
مادەنيەت جانە اقپارات ءمينيسترى ايدا بالاەۆانىڭ حابارلاۋىنشا, كينوجوبالاردى مەملەكەتتىك قولداۋ كونكۋرسىنىڭ جاڭا كەزەڭى باستالدى. بۇل كونكۋرس كينوجوبالاردى اشىق ءارى ءادىل ىرىكتەۋدى قامتاماسىز ەتۋ ماقساتىندا جاڭا ەرەجەلەر بويىنشا جۇزەگە اسىرىلادى.
كينوجوبالاردى ىرىكتەۋ ەكى كەزەڭدە جۇزەگە اسادى:
- كونكۋرستىڭ ءبىرىنشى كەزەڭىندە اۋەلى ستسەناري مەن ستسەناري جوسپارلارى قابىلدانىپ, ساراپتاما كەڭەسىنىڭ قاراۋىنا جىبەرىلەدى.
- ەكىنشى كەزەڭدە قۇجاتتار پاكەتى قارالىپ, انىقتالعان قاتەلەردى تۇزەتۋگە 3 كۇن ۋاقىت بەرىلەدى. اشىق قورعاۋ جانە پيتچينگ ونلاين ترانسلياتسيا ارقىلى وتەدى.
ايتا كەتەيىك, كونكۋرستىق ىرىكتەۋدىڭ ءبىرىنشى كەزەڭىنە قاتىسۋ ءۇشىن ۇمىتكەرلەر ورتالىققا ستسەناريلەردى قاراۋعا ءوتىنىمدى, PDF فورماتىندا ستسەناريلەردى, اۆتورلىق شارت پەن جەكە باسىن كۋالاندىراتىن قۇجاتتاردىڭ كوشىرمەسى, ءوتىنىش بەرۋشى مەن ستسەناري نەمەسە ستسەناري جوسپارىنىڭ اۆتورى اراسىنداعى الدىن الا شارتتى جىبەرۋى قاجەت. ءوتىنىش بەرۋشى ءفيلمنىڭ ءار ءتۇرى, ويىن ءفيلمى, انيماتسيالىق فيلم, دەرەكتى-حرونيكالى فيلمدەر بويىنشا تەك 2 ستسەناري ۇسىنا الادى. قۇجاتتار 5 ناۋرىز بەن 13 ناۋرىزعا دەيىن (12 ناۋرىز ساعات 23:59) قابىلدانادى.
ء«بىزدىڭ ماقساتىمىز – اشىق ءارى ءادىل كونكۋرس وتكىزۋ. الداعى ۋاقىتتا ىرىكتەۋگە قاتىستى اقپاراتتار مينيسترلىكتىڭ جانە ورتالىقتىڭ رەسمي سايتىندا جانە الەۋمەتتىك جەلى اككاۋنتتارىندا تۇراقتى جاريالاناتىن بولادى. كونكۋرستىق ىرىكتەۋگە قاتىستى ساۋالدارىڭىز بولسا, كينو ورتالىعى جانىنان كەڭەس بەرۋ قىزمەتى اشىلعانىن حابارلايمىز! بۇعان دەيىن وسى جىلعى كينوجوبالار كونكۋرسىنا ارنالعان باسىم تاقىرىپتار ءتىزىمى جاريالانعان بولاتىن. كينوگەرلەر تۇشىمدى دۇنيە دايىنداپ, كورەرمەنگە ساپالى دۇنيە ۇسىنۋعا كۇش سالادى دەپ سەنەمىز», دەدى مادەنيەت جانە اقپارات ءمينيسترى ايدا بالاەۆا.
كونكۋرستىق ىرىكتەۋگە قاتىسۋ قۇقىعىنا يە بولۋ ءۇشىن ۇمىتكەرلەردىڭ سالىق بەرەشەگىنىڭ بولماۋى, بانكروتتىق راسىمگە تارتىلماۋى ماڭىزدى.
