فوتو: polisia.kz
وسى جۇمىس اياسىندا پوليتسەيلەر بىرنەشە وبلىستىڭ اۋماعىندا قارۋ جاسىرىلعان ءتورت ورىندى تاپتى. ولاردىڭ ۇشەۋىندە قاڭتار وقيعاسى كەزىندە ۇرلانعان قارۋ-جاراق پەن وق-دارىلەر جاسىرىلعانى انىقتالدى.
قاڭتار وقيعاسى كەزىندە ۇرلانعان قارۋ-جاراقتىڭ ءبىر پاراسى جاركەنت قالاسىنىڭ ماڭىندا قاراۋسىز قالعان عيماراتتان تابىلىپ, Remington 11-87 ماركالى تەگىس ۇڭعىلى مىلتىق تاركىلەندى.
جامبىل وبلىسى بىرلەسۋ اۋىلىنىڭ شەتىندە قارۋ جاسىرىلعان جەر تابىلدى, وندا Benelli مودەلىنىڭ تەگىس ۇڭعىلى مىلتىعى (قاڭتار وقيعاسى كەزىندە ۇرلانعان), قوس ۇڭعىلى اڭشى مىلتىعى, قول گراناتاسى جانە ءتورت پاترون تاركىلەندى.
سونىمەن قاتار جاڭاتاس قالاسىنىڭ جانىندا تەگىس ەكى ۇڭعىلى مىلتىق, گاز تاپانشاسى جانە ءۇش وق-دارى جاسىرىلعان ورىن انىقتالدى.
الماتى وبلىسىنداعى كەنتتەردىڭ بىرىندە ارىقتان ءارتۇرلى كاليبرلى ەكى اڭشى مىلتىعى (ولاردىڭ ءبىرى قاڭتار وقيعاسى كەزىندە ۇرلانعان), جارىق-شۋ گراناتاسى, اك-74 ماگازينى, جەتى پاترون جانە قارا تاكتيكالىق بەتپەردە تابىلدى.
ءىىم نومىرلەرى جويىلعان قارۋ-جاراق پەن وق-دارىلەرگە قاتىستى قوسىمشا تەكسەرۋلەر جۇرگىزەدى.
ايتا كەتەيىك, كەيىنگى ءۇش جىلدا جەدەل ءىس-شارالاردىڭ, ءتىنتۋ مەن رەيدتەردىڭ ارقاسىندا ءتۇرلى 8 119 قارۋ, 845 گراناتا, 114 مىڭنان استام وق-ءدارى تابىلىپ, تاركىلەنگەن. سونداي-اق 738 قارۋ جاسىرىلعان ورىن تابىلعان.
