فوتو: مەرەي قاينار ۇلى
«جوبا اياسىندا مەديتسينالىق مەكەمەلەردى زاماناۋي جابدىقتارمەن قامتاماسىز ەتۋگە ەرەكشە كوڭىل ءبولىنىپ جاتىر. 2023-2024 جىلدارى وبلىستاعى اۋىلدىق اۋرۋحانالار مەن امبۋلاتوريالارعا 1076 جاڭا تەحنيكا, سونىڭ ىشىندە كومپيۋتەرلىك توموگرافتار, ۋدز اپپاراتتارى جانە دياگنوستيكالىق قۇرال-جابدىقتار ساتىپ الىندى. بۇل شالعاي ەلدى مەكەندەردەگى دياگنوستيكا مەن ەمدەۋ ساپاسىن ايتارلىقتاي جاقسارتۋعا مۇمكىندىك بەرەدى», دەپ اتاپ ءوتتى ايناش قاپانوۆا.
سونداي-اق, اۋرۋحانالار مەن ەمحانالاردا كۇردەلى جوندەۋ جۇمىستارى جالعاسقان. 2024 جىلى بەس مەديتسينالىق مەكەمە, سونىڭ ىشىندە امبۋلاتوريالار مەن اۋداندىق اۋرۋحانالاردىڭ بولىمشەلەرى جوندەۋدەن ءوتتى. 2025 جىلى سامار اۋداندىق اۋرۋحاناسى, تارباعاتاي اۋدانىنىڭ تۇعىل اۋىلىنداعى اۋرۋحانا مەن دارىگەرلىك امبۋلاتوريا, ۇلان اۋدانىنىڭ اسۋبۇلاق جانە پريۆولنوە اۋىلدارىنداعى امبۋلاتوريالار, كۇرشىم اۋداندىق اۋرۋحاناسى جانە زايسان اۋدانىنىڭ ينفەكتسيالىق بولىمشەسىندە كۇردەلى جوندەۋ جۇرگىزۋ جوسپارلانىپ وتىر.
جوبانىڭ باسىم باعىتتارىنىڭ ءبىرى – ايەلدەر مەن بالالار ءۇشىن مەديتسينالىق قىزمەتتەردىڭ قولجەتىمدىلىگىن ارتتىرۋ. 2024 جىلى بىرنەشە اۋداندىق اۋرۋحانا مەديتسينالىق كومەكتىڭ ەكىنشى دەڭگەيىنە اۋىستىرىلدى. بۇل جۇكتى ايەلدەر مەن بالالارعا ءىرى قالالارعا بارماي-اق, جەرگىلىكتى جەردە بىلىكتى مەديتسينالىق كومەك الۋعا مۇمكىندىك بەرەدى.
باسقارما باسشىلىعىنىڭ مالىمەتىنشە, ءموبيلدى مەديتسينالىق كەشەندەر دە بەلسەندى جۇمىس ىستەپ تۇر. ولار شالعاي اۋىلداردا دياگنوستيكالىق جانە الدىن الۋ قىزمەتتەرىن كورسەتەدى. 2024 جىلى مۇنداي كەشەندەر 54 مىڭنان استام ادامدى قامتىدى. ونىڭ ىشىندە 4 مىڭعا جۋىق بالا تەكسەرۋدەن ءوتتى. بارلىعى 44 مىڭنان استام دياگنوستيكالىق زەرتتەۋ مەن 57 مىڭ زەرتحانالىق تالداۋ جۇرگىزىلدى. بۇل كەشەندەر بۇرىن مەديتسينالىق تەكسەرۋلەردەن وتۋگە مۇمكىندىگى بولماعان تۇرعىندار ءۇشىن ناعىز قولداۋ بولىپ وتىر.
سكرينينگتىك زەرتتەۋلەر اۋرۋلاردىڭ الدىن الۋدا ماڭىزدى ءرول اتقارادى. 2024 جىلى 156 مىڭنان استام ادام تەكسەرۋدەن ءوتىپ, ولاردىڭ 3 951-ىنەن اۋرۋدىڭ باستاپقى بەلگىلەرى انىقتالدى. مۇنداي زەرتتەۋلەر اۋرۋلاردى ەرتە كەزەڭدە انىقتاۋعا مۇمكىندىك بەرەدى, بۇل ەمدەۋ تيىمدىلىگىن ارتتىرىپ, اۋىر دەرتتەردىڭ الدىن الۋعا سەپتىگىن تيگىزەدى.
سونىمەن قاتار, اۋىلدىق جەرلەردە مەديتسينا كادرلارىنىڭ تاپشىلىعىن شەشۋ دە ماڭىزدى ماسەلە بولىپ وتىر. 2024 جىلى شقو-نىڭ اۋىلدىق ايماقتارىنا اسا تاپشى ماماندىقتار بويىنشا 15 دارىگەر تارتىلدى. سونداي-اق مەديتسينا قىزمەتكەرلەرىنە الەۋمەتتىك جەڭىلدىكتەر قاراستىرىلعان. جاس دارىگەرلەرگە تۇرعىن ءۇي ساتىپ الۋ ءۇشىن جەڭىلدەتىلگەن نەسيە, كوتەرمە جاردەماقى جانە بىرجولعى تولەمدەر بەرىلەدى. بۇل شارالار بىلىكتى مامانداردى تارتۋعا جانە ولاردى اۋىلدىق جەرلەردە ۇستاپ قالۋعا كومەكتەسەدى.
