ەكى كۇن بويى ساتباەۆ قالاسىنداعى شىنبولات دىلدەباەۆ اتىنداعى كەنشىلەر سارايىندا IV رەسپۋبليكالىق « ۇلىتاۋدان قانات قاققان اقىن تايجان» اتتى ءداستۇرلى انشىلەر بايقاۋى ءوتتى. ساتباەۆ قالاسى اكىمىنىڭ قولداۋىمەن ۇيىمداستىرىلعان ونەر دوداسىنا ەلىمىزدىڭ ون وبلىسىنان 18–35 جاس ارالىعىندا 18 ءانشى قاتىستى. بايقاۋعا قاتىسۋشىلاردى ساتباەۆ قالاسىنىڭ اكىمى مۇرات بورىباەۆ قۇتتىقتاپ, وسىنداي ونەر بايقاۋلارى جىل سايىن وتەتىنىن جانە قولداۋ كورسەتەتىنىن اتاپ ءوتتى.
قازىلار القاسىنىڭ توراعاسى – تايجانتانۋشى, ءانشى عالىم مۇحامەدين اقىننىڭ تاعدىرى مەن سوڭىندا قالعان مۇراسى جونىندە ماعلۇمات بەردى.
بايقاۋ الدىندا تايجان قالماعامبەت ۇلى اتىنداعى ۇلىتاۋ وبلىستىق فيلارمونياسىنىڭ ايتۋلى انشىلەرى شىعىپ, اۋەلەتە سالعان انىمەن قاتىسۋشىلاردىڭ دەلەبەسىن قوزدىرىپ, شابىتتاندىردى. العاشقى كۇنى بايقاۋعا قاتىسۋشى ءاربىر ۇمىتكەر تايجان, نارتاي, ۇكىلى ىبىرايدىڭ اندەرىنەن بارلىعى ءۇش ءان ورىندادى.
دومبىرا, سىرنايمەن شىققان دارىندى جاستاردىڭ وزا شاپقانى دا, بابى كەلىسپەگەنى دە بولدى. باتىس قازاقستان وبلىسى, بايتەرەك اۋدانىنىڭ مادەني-ساۋىق ورتالىعىنا قاراستى «شىڭ» دراما-مۋزىكا تەاترىنان كەلگەن كەنەسارى بۇلعانباەۆ – ەڭ جاس قاتىسۋشى. ول تايجاننىڭ ءانى «ساق-ساق», ۇكىلى ىبىرايدىڭ ءانى «قالدىرعان» جانە نارتايدىڭ تەرمەسىن ورىندادى. العاشقى انىنەن-اق جاس دارىننىڭ ونەر الەمىندە ءوز قولتاڭباسى بارى بايقالدى.
تۇركىستاندىق ارۋجان ۇكىلى ىبىرايدىڭ «گاككۋ» ءانىن ءوزىنىڭ تاقياسىنا تاققان ۇكىسىندەي قۇلپىرتىپ جىبەردى. قاراعاندىلىق اليانا بەرعازىقىزىنىڭ ورىنداۋىنداعى تايجاننىڭ «شولپانعا» ءانى دە كوڭىلدەن شىقتى.
ونەرلى جاستارعا باعا بەرەتىن قازاقستاننىڭ ەڭبەك سىڭىرگەن ءارتىسى, ءانشى عالىم مۇحامەدين باسقارعان قازىلار القاسىنىڭ مۇشەلەرى وسال ەمەس. سوناۋ ورالدان قازاقستاننىڭ ەڭبەك سىڭىرگەن قايراتكەرى حاتيموللا بەردىعاليەۆ, قاراعاندىدان تاتتىمبەت اتىنداعى ونەر كوللەدجىنىڭ ۇستازى, ءانشى جاقسىكەلدى كەمالوۆ, ۇلىتاۋدان ءانشى, ونەرتانۋشى سەرىك وسپانوۆ, الماتىدان قۇرمانعازى اتىنداعى ۇلتتىق كونسەرۆاتوريانىڭ دوتسەنتى, مادەنيەت سالاسىنىڭ ۇزدىگى كۇزەۋباي امانكەلدى, قىزىلوردادان مادەنيەت سالاسىنىڭ ۇزدىگى, رەسپۋبليكالىق اقىن-جىراۋلار وداعىنىڭ مۇشەسى اقمارال نوعايباەۆا, استانادان قازاقستاننىڭ ەڭبەك سىڭىرگەن قايراتكەرى, جىرشى, تەرمەشى قوشان مۇستافا ۇلى, تەمىربەك جۇرگەنوۆ اتىنداعى قازاق ۇلتتىق ونەر اكادەمياسىنىڭ دوتسەنتى, مادەنيەت سالاسىنىڭ ۇزدىگى شولپان دارجان, ءداستۇرلى ءانشى دارىگۇل الداجانوۆا بار.
تايجان قالماعامبەت ۇلىنىڭ نەمەرە كەلىنى گۇلدارى وسپانوۆا: «جارىم, اقىن اتامىزدىڭ نەمەرەسى ابدىكارىم شۋباي ۇلى 2006 جىلى قايتىس بولدى. اقىن اتامىز ناعاشىسى ۇكىلى ىبىرايدان باتا العان. كەۋدەسى انگە, تولقىندى جىرعا تولعان. اتامىز كەز كەلگەن جەردە اعاشتان جونىپ دومبىرا جاساپ الادى ەكەن. ءاندى كوبىنە سىرنايمەن ايتادى. كەنەن ازىرباەۆپەن ايتىسقان, سۋىرىپسالمالىق ونەرى بار. قارساقبايدىڭ مىس زاۋىتى ەندى اشىلىپ جاتقاندا جان-جاقتان اقىن-جازۋشىلار كەلىپ, اتامەن تانىسادى. «قىزىل كەنىش» گازەتىنىڭ رەداكتورى ءابدىلدا تاجىباەۆ اقىنمەن جاقىن تانىسىپ, ولەڭدەرىن وسى گازەتكە بەرەدى. اقىن اتامىز قانىش ساتباەۆپەن تانىسىپ, اتاقتى گەولوگكە قولداۋ كورسەتكەن. 1934–1936 جىلدارى ماسكەۋدە وتكەن قازاق ونەرىنىڭ ونكۇندىگىنە قاتىسقان. سىرنايدى قۇلاشتاپ ءان ايتقاندا داۋسى ەكى كوشتىك جەردەن ەستىلەدى ەكەن», دەپ ءبىراز دەرەك ايتتى.
سونىمەن بايقاۋ مارەگە جەتتى. باس جۇلدە تۇركىستان قالاسىنان كەلگەن ارۋجان ساعىندىققا بۇيىرىپ, 1 500 مىڭ تەڭگەنىڭ سەرتيفيكاتى بەرىلدى. ءبىرىنشى ورىندى ت.قالماعانبەت ۇلى اتىنداعى ۇلىتاۋ وبلىستىق فيلارمونياسىنىڭ ءارتىسى ماديار ماقسۇتوۆ (1 ملن تەڭگە), ەكىنشى ورىندى الماتىداعى قۇرمانعازى اتىنداعى قازاق ۇلتتىق كونسەرۆاتورياسىنان ماديار ومىرعالى (700 مىڭ تەڭگە), ءۇشىنشى ورىندى باتىس قازاقستان بايتەرەك اۋدانىنىڭ مادەني-ساۋىق ورتالىعىنا قاراستى «شىڭ» دراما-سازدى تەاترىنان كەنەسارى بۇلعانباەۆ (500 مىڭ تەڭگە) يەلەندى.
تايجان قالماعامبەت ۇلى اتىنداعى ارنايى جۇلدە قاراعاندى وبلىسى شەت اۋدانىنىڭ ورتالىعى اقسۋ-ايۋلىدان اقجىگىت داۋلەتبەككە, جاقسىگەلدى سەيىلوۆ اتىنداعى ارنايى جۇلدە استاناداعى قازاق ۇلتتىق ونەر ۋنيۆەرسيتەتىنەن اقنيەت سەرعازيناعا, شىنبولات دىلدەباەۆ اتىنداعى ارنايى جۇلدە قۇرمانعازى اتىنداعى قازاق ۇلتتىق كونسەرۆاتورياسىنان كەلگەن ساۋلەت امانعازينگە بۇيىردى.
قوستانايلىق جاسۇلان وتەمۇراتوۆ پەن قۇرمانعازى اتىنداعى قازاق ۇلتتىق كونسەرۆاتورياسىنان كەلگەن ابدۋرراحمان ەستايۇلى ديپلومانت اتاندى.
ساحنا شىمىلدىعى تايجان قالماعانبەت ۇلى اتىنداعى ۇلىتاۋ وبلىستىق فيلارمونياسىنىڭ ءانشىسى, رەسپۋبليكالىق بايقاۋلاردىڭ لاۋرەاتى ادىلەت تۇرلىعوجاەۆتىڭ ورىنداۋىنداعى «اتامەكەن» انىمەن جابىلدى.
مادەنيەت سارايىنداعى زالدىڭ ءار جەرىندە تارىداي شاشىلعان ساناۋلى كورەرمەندى كورگەندە كوڭىلىمىز ءتۇسىپ قالعان. ەستى انگە ەمەس, ەسەر انگە ءۇيىر جاستاردىڭ بوي كورسەتپەۋى كوڭىلگە كىربىڭ ۇيالاتتى. ەسترادا ءانشىسى كەلدى دەسە, زالدا ينە شانشار ورىن بولمايتىنى انىق. بارىنەن بۇرىن ءداستۇرلى ءاندى ناسيحاتتاعان دارىندى جاستاردىڭ ءانىن ءوز قاتارلاستارى تىڭدامايتىنى قابىرعاعا باتادى.
ۇلىتاۋ وبلىسى
