بۇل جيناققا ارىپتەسىمىزدىڭ «بولاشاق» باعدارلاماسى اياسىندا اقش-تىڭ دجوردج ۆاشينگتون ۋنيۆەرسيتەتىندە جۇرگىزگەن زەرتتەۋلەرى ەنگەن. جاس زەرتتەۋشى ءبىر جىل بويى اقش كونگرەسىنىڭ كىتاپحاناسى مەن گەلمان, شەكسپير, لۋزەر كيڭ اتىنداعى قالالىق كىتاپحاناسىندا وتىرىپ, حالقىمىزدىڭ تاريحى مەن مادەنيەتىنە بايلانىستى تىڭ دەرەكتەر ىزدەگەن. سونداي-اق پيتتسبۋرگ, نيۋ-يورك, دجوردجتاۋن ۋنيۆەرسيتەتتەرى سەكىلدى ىرگەلى وقۋ ورىندارىنىڭ عىلىمي كىتاپحانالارىندا ساقتالعان ەڭبەكتەردەن قازاققا قاتىستى ءبىراز دۇنيە تاپقان. سونىڭ ءبارى وسى جيناققا توپتاستىرىلىپ وتىر.
كىتاپقا پىكىر جازعان بەرىك ءۋالي اۆتوردىڭ ۆاشينگتون كىتاپحانالارىن تىنباي ارالاپ, امەريكا ارحيۆتەرىندەگى ۇلتىمىزعا قاتىستى دەرەكتەردى جيناقتاۋ ارقىلى ەلىمىزدىڭ رۋحاني قورجىنىن تولىقتىرۋعا قوماقتى ۇلەس قوسقانىنا ريزاشىلىعىن بىلدىرگەن.
شىنىندا دا, جاڭا جيناق مازمۇندى مالىمەتتەرگە وتە باي. ماسەلەن, زەرتتەۋشى «ارىنعازى سۇلتانمەن كەزدەسكەن نەمىس عالىمى» اتتى ماقالاسىندا 1823 جىلى بەرليندە باسىلعان «ورىنبوردان بۇحاراعا دەيىن» اتتى جولجازبا كىتاپتا قازاق تاريحىنا بايلانىستى قىزىقتى دەرەكتەر كەزدەسەتىنىن باياندايدى. وندا دوكتور ەدۆارد ەۆەرسمانن ارىنعازى سۇلتاننىڭ اۋىلىنا بارىپ, ودان ءارى كوپتەگەن قازاق اۋىلىن ارالاعانىن ايتادى. سونداي-اق نەمىس بيولوگىنە سايىن دالانى مەكەندەگەن قازاقتاردىڭ ەر مىنەزى, تابيعاتى ەرەكشە اسەر سىيلاعانىن شىنايى جەتكىزەدى. بۇدان بولەك, دۇيسەنالىنىڭ «قازاق ەرتەگىلەرى امەريكاعا قالاي جەتتى؟», «اشتىق بوسقىندارىمەن كەزدەسكەن جيھانكەزدەر», «سۆەن حەدين كورگەن قازاقيا», تاعى باسقا دا ماقالالارىندا كوپتەگەن تىڭ دۇنيەگە كەز بولاسىز. جاڭا الەم اشقانداي قۇمارىڭىز ارتادى. قىزىعاسىز.
دجوردج ۆاشينگتون ۋنيۆەرسيتەتىنىڭ پروفەسسورى پيتەر روللبەرگ تالانتتى ارىپتەسىمىزدىڭ ۆاشينگتوندا بولعان ءبىر جىلىندا تىڭ زەرتتەۋ جۇرگىزگەنىنە ءتانتى بولعان.
«ول قىسقا ۋاقىت ىشىندە اقش پەن قازاقستاننىڭ مادەني بايلانىسىنا قاتىستى سونى دەرەكتەر تاۋىپ, تاريحىنا زەردەلى زەرتتەۋ جاسادى. ءتىپتى وسى تاقىرىپتا جۇيەلى ىزدەنگەن العاشقى زەرتتەۋشى دەسەك ارتىق ەمەس. ناتيجەسىندە, قازاق جەرىنە ارنايى ساپارمەن بارعان ساياحاتشىلار مەن عالىمدار جازىپ قالدىرعان سيرەك جانە قۇندى دەرەكتەردى وقىرمانعا ۇسىنىپ وتىر. ونىڭ بۇل ىزدەنىسى ەكى ەلدەگى وقىرماندارعا دا باعالى بولارى ءسوزسىز», دەپ جوعارى باعا بەرىپتى.
قىسقاسى, بۇل جيناقتىڭ تانىمدىق ءتالىمى مول. وقىڭىز!
