سالتاناتتى جيىندا شىعىس قازاقستان وبلىسىنىڭ اكىمى نۇرىمبەت ساقتاعانوۆ قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ قۇتتىقتاۋ حاتىن وقىپ بەردى. مەملەكەت باسشىسى ءوز جولداۋىندا قازاقستان حالقى اسسامبلەياسىنىڭ وتىز جىل ىشىندە ەلدەگى تۇراقتىلىق پەن تاتۋلىقتىڭ تىرەگىنە اينالعانىن اتاپ ءوتتى. وسى جىلدار ىشىندە شىعىس قازاقستاندا ەتنوسارالىق كەلىسىم مەن ءوزارا سىيلاستىققا نەگىزدەلگەن ەرەكشە مادەني ورتا قالىپتاستى.
– سىزدەردىڭ ۇلتارالىق ديالوگتى دامىتۋعا, بەيبىتشىلىك پەن كەلىسىمدى نىعايتۋعا قوسقان ۇلەستەرىڭىز وراسان. جۇرگىزىپ وتىرعان قىزمەتتەرىڭىز حالىقتى ءبىر ماقساتقا ۇيىستىرىپ, دوستىق پەن ىنتىماقتىڭ بەرىك ىرگەتاسىن قالاۋعا سەپتىگىن تيگىزۋدە. بۇگىن, العىس ايتۋ كۇنى قارساڭىندا, سىزدەرگە ەل بىرلىگى جولىنداعى ادال ەڭبەكتەرىڭىز بەن پاتريوتتىق ۇستانىمدارىڭىز ءۇشىن شىنايى ريزاشىلىعىمدى بىلدىرەمىن, – دەدى ايماق باسشىسى نۇرىمبەت ساقتاعانوۆ.
شىعىس قازاقستان وبلىستىق اسسامبلەياسى ءتۇرلى مادەني, ءبىلىم بەرۋ جانە الەۋمەتتىك جوبالاردى بەلسەندى جۇزەگە اسىرىپ كەلەدى. جۋىردا قحا جاستارى رەسپۋبليكالىق قىسقى لاگەر ۇيىمداستىرىپ, ەلدىڭ ءار وڭىرىنەن كەلگەن جاس وكىلدەردى ءبىر الاڭعا توعىستىردى. سونىمەن قاتار, ستۋدەنتتىك اسسامبلەيالار قۇرىلىپ, جاستار قايىرىمدىلىق شارالارىنا بەلسەنە قاتىسۋدا.
وڭىردە قحا-نىڭ جاستار جانە بالالار تەاترى تابىستى جۇمىس ىستەپ كەلەدى. بيىل تەاتر ۇجىمى اباي جانە پاۆلودار وبلىستارىنا, سونداي-اق استانا قالاسىنا گاسترولدىك ساپارعا شىعۋدى جوسپارلاپ وتىر.
قازاق ءتىلى مەن مادەنيەتىن دامىتۋ باعىتىندا بىرقاتار ماڭىزدى باستامالار جۇزەگە اسىرىلۋدا. سونىڭ ءبىرى – «قوناقجاي وتباسى» جوباسى. بۇل جوبا ارقىلى بالالار ۇلتتىق ءداستۇر مەن مەملەكەتتىك ءتىلدى تەرەڭ مەڭگەرىپ, ءارتۇرلى ەتنوس وكىلدەرى اراسىنداعى مادەني بايلانىستى نىعايتۋعا مۇمكىندىك الادى.
دوستىق ۇيلەرىندە ءداستۇرلى تۇردە جۇمىس ىستەيتىن ءتىل مەكتەپتەرىمەن قاتار, وتكەن جىلى قوسىمشا 25 «كەل, سويلەسەيىك» قازاق ءتىلى كلۋبى اشىلدى. قازىرگى تاڭدا اۋدانداردا ءارتۇرلى جاستاعى ازاماتتارعا ارنالعان 74 مەملەكەتتىك ءتىلدى وقىتۋ ورتالىعى جۇمىس ىستەپ تۇر, ال بيىل ولاردىڭ سانىن 100-گە جەتكىزۋ جوسپارلانعان.
قازاقستان حالقى اسسامبلەياسى مۇشەلەرىنىڭ باستاماسىمەن وسكەمەندە دوستىق ءۇيىنىڭ ماڭىندا «دوستىق» ارباتى اشىلادى. سونىمەن قاتار, قازاقستان حالقى اسسامبلەياسىنىڭ 30 جىلدىق مەرەيتويىنا وراي, وبلىستىق بيۋدجەتتەن قاراجات ءبولىنىپ, دوستىق ۇيىندە زاماناۋي «كوميۋنيتي زالى» پايدالانۋعا بەرىلمەك.
