جالپى بيىل ناۋرىزدا كۇن رايى ادەتتەگىدەن جىلى بولادى دەپ بولجانىپ وتىر.
- ءبىر ايداعى ورتاشا اۋا تەمپەراتۋراسى قازاقستاننىڭ بۇكىل اۋماعىندا نورمادان 2 گرادۋسقا جوعارى بولادى. رەسپۋبليكانىڭ باسىم بولىگىندە جاۋىن-شاشىن قالىپتى نورمادان كوپ جاۋادى. اسىرەسە, ەلىمىزدىڭ وڭتۇستىك-باتىس, وڭتۇستىك وڭىرلەرىندە نورمادان اسادى, - دەپ حابارلادى قازگيدرومەت.
سينوپتيكتەر ناۋرىزدىڭ العاشقى ونكۇندىگىندە كۇن جىلىنىپ, ەلىمىزدىڭ وڭتۇستىگىندە اۋا تەمپەراتۋراسى +20 گرادۋسقا دەيىن كوتەرىلەتىنىن ايتادى. الايدا ىلە-شالا كۇن كۇرت سۋىتۋى مۇمكىن ەكەنىن دە جوققا شىعارمايدى.
ەكىنشى ونكۇندىكتە رەسپۋبليكانىڭ سولتۇستىك وڭىرلەرىندە اۋا تەمپەراتۋراسى تۇندە -10-15 گرادۋستان -5+3 گرادۋسقا دەيىن, كۇندىز -2-13 گرادۋستان +2+10 گرادۋسقا دەيىن بولماق. ال وڭتۇستىك ايماقتاردا تۇندە -5+5 گرادۋستان +2+10 گرادۋسقا دەيىن, كۇندىز +3+8 گرادۋستان +10+20 گرادۋسقا دەيىن بولادى.
ءۇشىنشى ونكۇندىكتە قازاقستاننىڭ باسىم اۋماعىندا جىلى اۋا رايى ساقتالادى.
جالپى, ماماندار اي كولەمىندە اۋا رايى قۇبىلمالى بولادى دەپ بولجام جاساپ وتىر.
