جالپى, وبلىس اكىمدىگى مەن «قازتسينك» كومپانياسى اراسىنداعى ىنتىماقتاستىق 2022 جىلدىڭ قاراشا ايىندا باستالعان. سودان بەرى ايماقتىڭ دامۋىنا, تۇرعىنداردىڭ ءومىر ءسۇرۋ دەڭگەيىن ارتتىرۋعا وڭ اسەر ەتكەن كوپتەگەن جوبا ىسكە اسىرىلدى. مەموراندۋم ۇلىتاۋ وبلىسىنىڭ ەكونوميكالىق دامۋىن قولداۋعا, الەۋمەتتىك, ينفراقۇرىلىمدىق جوبالاردى جۇزەگە اسىرۋعا باعىتتالعان. قۇجاتقا قول قويۋ بارىسىندا وبلىس اكىمى داستان رىسپەكوۆ پەن «قازتسينك» جشس-نىڭ باس ديرەكتورى جانات جانبوتين تاراپتاردىڭ سەرىكتەستىگى ءوڭىردىڭ تۇراقتى دامۋىنا ەلەۋلى ۇلەس قوساتىنىن اتاپ ءوتتى.
قۇجاتقا سايكەس, «قازتسينك» جشس بيىل ۇلىتاۋ وبلىسىنداعى جايرەم كەنتىندە ىسكە اسىرىلىپ جاتقان 10 الەۋمەتتىك جوبانى قارجىلاندىرادى. جوبالار دەنساۋلىق ساقتاۋ, سپورت, ينفراقۇرىلىم, الەۋمەتتىك نىسانداردى اباتتاندىرۋ سالالارىن قامتيدى.
2025 جىلعا ارنالعان ءىرى باستامالاردىڭ ىشىندە سپورت كەشەنىنىڭ قۇرىلىسى, 60 پاتەرلى تۇرعىن ءۇي قۇرىلىسى, اۋماقتى اباتتاندىرۋ جۇمىسىن ەرەكشە اتاپ وتكەن ءجون. سونداي-اق بيۋدجەت سالاسىنىڭ قىزمەتكەرلەرىنە 20 پاتەر ساتىپ الۋ جوسپاردا بار.
