ماجىلىستە ققس-عا قاتىستى ۇكىمەت باستامالارى تالقىلاندى

دوڭگەلەك ۇستەلدە ۇلتتىق ەكونوميكا ءمينيستىرىنىڭ ءبىرىنشى ورىنباسارى ازامات ءامرين كودەكستىڭ جاڭا رەداكتسياسىنداعى نەگىزگى تۇزەتۋلەردى ءتۇسىندىردى.

ونىڭ ايتۋىنشا نەگىزگى تۇزەتۋلەر مىنالار:

قوسىلعان قۇن سالىعى بويىنشا مىندەتتى تىركەۋ شەگىن تومەندەتۋ — 20 000 مرپ (78,6 ملن تەڭگە) 3 800 مرپ (15 ملن تەڭگە) دەيىن;

قوسىلعان قۇن سالىعىنىڭ مولشەرلەمەسىن ارتتىرۋ — 12%-دان 16%-عا دەيىن, بۇعان قوسا بىرقاتار سالالار ءۇشىن تومەندەتىلگەن مولشەرلەمە 10% بەلگىلەنەدى;

جەڭىلدەتىلگەن دەكلاراتسيا بويىنشا ارنايى سالىق رەجيمىن قولدانۋدى شەكتەۋ — تەك B2C سەگمەنتىنە (بيزنەس تۇپكىلىكتى تۇتىنۋشىلار ءۇشىن) قولجەتىمدى بولادى.

جيىندا ەكونوميست ەكسپەرتتەر پىكىر ءبىلدىرىپ, ءماجىلىس دەپۋتاتتارى دا تالقىعا قاتىستى. ءماجىلىستىڭ سالىق كودەكسىن تالقىلاۋعا ارنالعان جۇمىس توبىنىڭ وتىرىسىندا دەپۋتات ازات پەرۋاشەۆ قوسىلعان قۇن سالىعىن 12 پايىزدان بىردەن 16 پايىز كوتەرمەي, بىرتىندەپ, جىلدارعا ءبولىپ كوتەرۋ تۋرالى ويىن ورتاعا سالدى.

ء«بىز ءتۇرلى نۇسقانى ەسەپتەپ كوردىك. جىل سايىن ققس مولشەرلەمەسىنە 1 پايىز عانا قوسىپ كوبەيتۋ مودەلىن دە قارادىق. جىل سايىن ەكى پايىز قوسىپ تا ەسەپتەپ كوردىك. بىراق ونداي جولدىڭ اسەرى بولمايدى. قازىرگى مودەلدى جايدان-جاي ەسەپتەپ شىعارعان جوقپىز. 28 ترلن تەڭگە شىعىسىمىز بولادى دەپ وتىرمىز. جىل سايىن بىرتىندەپ وسىرسەك, بيۋدجەتتەگى ساڭىلاۋدى جابا المايمىز, مەملەكەتتىڭ مىندەتتەمەلەرىن ورىنداي الماي قالامىز», دەپ جاۋاپ بەردى ازامات ءامرين.