سۋرەتتى تۇسىرگەن – ۆالەري بۋگاەۆ
«بيىل جوندەلۋگە ءتيىس 417 شاقىرىمنىڭ 96 شاقىرىمى – رەسپۋبليكالىق ماڭىزى بار جولدار. اۋىلدىق ەلدى مەكەندەردەگى كوشەلەردى جوندەۋ بويىنشا جالپى ۇزىندىعى 89,9 كم بولاتىن 38 جوبا ىسكە اسادى. وڭىردە اۋىلداردىڭ كىرمە جولدارىن جوندەۋگە ماڭىز بەرىلىپ وتىر. كەيىنگى ەكى جىلدا 59 كىرمە جول جوندەلسە, تاعى 62 جولدى كەلەر جىلدىڭ سوڭىنا دەيىن اياقتاۋ كەرەك. بيىل جەرگىلىكتى اۆتوكولىك جول مەن كوشەلەردى جوندەۋگە 25,3 ملرد تەڭگە بولىنگەن. بىلتىر 795 كم جولدى قايتا جاڭارتىپ, جوندەۋگە 68 ملرد تەڭگە جۇمسالدى», دەيدى جولاۋشىلار كولىگى جانە اۆتوموبيل جولدارى باسقارماسى باسشىسىنىڭ مىندەتىن اتقارۋشى ناريمان ومار.
96 شاقىرىمدىق اۆتوجولدىڭ 3 ۋچاسكەسىنە قارجى بولىنبەك: اتامەكەن – ەرتىس – رۋسسكايا پوليانا, قالقامان – باياناۋىل – ۇمىتكەر – بوتاقارا, استانا – ەرەيمەنتاۋ – شىدەرتى. ماماننىڭ سوزىنشە, ايماق اۆتوجولدارىندا ءتورت كەزەڭنەن تۇراتىن ساپانى باقىلاۋ جۇرگىزىلەدى. ۇلتتىق جول اكتيۆتەرى ساپاسى ورتالىعىنىڭ باقىلاۋى, اۆتورلىق جانە تەحنيكالىق باقىلاۋ, سونداي-اق قوعامدىق باقىلاۋ بار. جىل باسىنان بەرى 3 031 شاقىرىم اۆتوجول تەكسەرىلىپ, 200-گە جۋىق اقاۋ انىقتالىپ, كەمشىلىكتەردى جويۋ بويىنشا 137 نۇسقاما بەرىلگەن.
«اۆتوجولداردى ءتيىستى دەڭگەيدە ۇستاماعانى, سونداي-اق جولداردا جۇمىس جۇرگىزۋ قاعيداسىن بۇزعانى ءۇشىن 21 لاۋازىمدى جانە زاڭدى تۇلعاعا 800 مىڭ تەڭگەدەن استام ايىپپۇل سالىندى. جولداردا جۇمىس جۇرگىزۋ, جول مەن جول قۇرىلىسىن كۇتىپ ۇستاۋ ەرەجەلەرىن بۇزعانى ءۇشىن اقتوعاي جانە تەرەڭكول اۋداندارىنداعى تۇرعىن ءۇي-كوممۋنالدىق شارۋاشىلىق ءبولىمىنىڭ باسشىلارى اكىمشىلىك جاۋاپكەرشىلىككە تارتىلدى. ولار ۆەدومستۆولىق باعىنىستى ۋچاسكەنى كۇتىپ ۇستاۋ بويىنشا تالاپتاردى ورىنداماعان. شەنەۋنىكتەردىڭ ارقايسىسىنا 39 320 تەڭگە ايىپپۇل سالىندى», دەپ حابارلادى وڭىرلىك پوليتسيا دەپارتامەنتىنىڭ ءباسپاسوز قىزمەتى.
ولقىلىقتار رەسپۋبليكالىق ماڭىزى بار پاۆلودار – قىزىلوردا اۆتوجولىندا دا كەزدەسىپ قالادى. ايتكەنمەن ەرتىس–بايان وڭىرىندەگى اۆتوجولداردىڭ شامامەن 90%-دان استامى قاناعاتتانارلىق دەڭگەيدە دەپ باعالانادى.
پاۆلودار وبلىسى
