جيىن بارىسىندا ايدا بالاەۆا مەملەكەت باسشىسىنىڭ مادەنيەت پەن ادەبيەتكە ەرەكشە كوڭىل ءبولىپ وتىرعانىن اتاپ ءوتتى.
«ەلىمىزدەگى جاس جازۋشىلار مەن اقىندارعا ارنالعان پرەزيدەنتتىك ادەبي سىيلىق 2023 جىلى پرەزيدەنت جارلىعىمەن تاعايىندالىپ, وتاندىق ادەبيەت الەمىندەگى ماڭىزدى وقيعالاردىڭ بىرىنە اينالدى. بۇل – مەملەكەت باسشىسىنىڭ مادەنيەت سالاسىن جۇيەلى تۇردە جاڭعىرتۋعا باعىتتالعان باستامالارىنىڭ ءبىرى. سىيلىقتىڭ باستى ماقساتى – شىعارماشىل جاستاردى قولداۋ, جاڭا تۋىندىلاردىڭ جارىق كورۋىنە جول اشۋ. مەملەكەت باسشىسىنىڭ مادەنيەت پەن ونەردى دامىتۋعا ەرەكشە ءمان بەرۋى – ونىڭ ۇستانىپ وتىرعان رەفورمالارى مەن باستامالارىنىڭ زاڭدى جالعاسى. ويتكەنى مادەنيەتتى, ادەبيەتتى دامىتۋ – جاس ۇرپاقتىڭ جان-جاقتى دامۋىنىڭ نەگىزگى تەتىكتەرىنىڭ ءبىرى. ال رۋحاني تۇرعىدان كەمەلدەنگەن, ءبىلىمدى, ەڭبەكسۇيگىش ءارى پاتريوت ازاماتتاردان قۇرالعان قوعامدا زاڭ مەن ءتارتىپ ۇستەمدىك قۇرادى, ادامدار ءوز ارەكەتتەرى ءۇشىن جاۋاپكەرشىلىك الادى, داستۇرگە قۇرمەتپەن قاراپ, ۇلتتىڭ نەگىزگى قۇندىلىقتارىن ارداقتايدى», دەدى مينيستر.
پرەزيدەنتتىك ارناۋلى ادەبي سىيلىعى «پروزا» اتالىمى بويىنشا «2026» شىعارماسى ءۇشىن ەسبول سوتسيالحانعا, «پوەزيا» اتالىمى بويىنشا «بوز ۇشقات» ولەڭدەر جيناعى ءۇشىن جانىبەك اليمانوۆقا, «دراماتۋرگيا» اتالىمى بويىنشا «اپاتاي» درامالىق تۋىندىسى ءۇشىن الىشەر ايتۋارعا, «بالالار ادەبيەتى» اتالىمى بويىنشا «روكەت ەرا» پوۆەسى ءۇشىن اسەت سىزدىقوۆقا بەرىلدى. ايتا كەتەيىك, سىيلىققا 18-35 جاس ارالىعىنداعى قالامگەرلەردىڭ بۇرىن حالىقارالىق, ۇلتتىق بايقاۋلارعا قاتىسپاعان تۋىندىلارى ۇسىنىلعان.
ءار ءداۋىردىڭ ءوز اقيقاتى, ءوز ءۇنى بار. بۇگىنگى ادەبيەت – تەك ەسكى سۇرلەۋدى قايتالاۋ ەمەس, جاھاندانۋ داۋىرىندە ۇلتتىق بولمىستى ساقتاي وتىرىپ, جاڭا زاماننىڭ رۋحىن بەينەلەۋ. قالامگەر – ۋاقىتپەن قاتار تىنىستايتىن, ءداۋىردىڭ ديدارىن كورسەتەتىن, بولاشاققا باعدار جاسايتىن تۇلعا. وسى رەتتە ايدا بالاەۆا جاس قالامگەرلەرگە مول جاۋاپكەرشىلىك جۇكتەلەتىنىن اتاپ ءوتتى.
«سىزدەر ءوز زاماندارىڭىزدىڭ بەينەسىن جاڭاشا سۋرەتتەپ, جاڭا كوزقاراس قالىپتاستىرۋعا تيىسسىزدەر. ۇلى قالامگەرلەردىڭ جولىن جالعاستىرىپ قانا قويماي, ادەبيەتتى جاڭا بەلەسكە كوتەرۋ – سىزدەردىڭ قولدارىڭىزدا. حح عاسىرداعى ادەبيەت ادامنىڭ جان الەمىن تەرەڭنەن سۋرەتتەسە, ءححى عاسىردىڭ قالامگەرلەرى جاڭا تەحنولوگيالار داۋىرىندەگى ادام تاعدىرى, جاھاندانۋ مەن ۇلتتىق بولمىس, جەكە تۇلعانىڭ كۇرەسى سەكىلدى تاقىرىپتارعا قالام تەربەۋى كەرەك», دەدى ا. بالاەۆا.
ماراپاتتان سوڭ باسقوسۋدا قازىرگى ادەبي ۇردىستەر مەن وزەكتى ماسەلەلەر تالقىلانىپ, ءتۇرلى ۇسىنىستار مەن تىڭ ويلار ورتاعا سالىندى. سونداي-اق ماراپاتتاۋ ءراسىمى اياسىندا «قازاقستاننىڭ ادەبي-تانىمدىق پانوراماسى» جوباسى نەگىزىندە جارىق كورگەن 20 جاس قالامگەردىڭ كىتاپتارىنىڭ تۇساۋى كەسىلدى. بۇل – مادەنيەت جانە اقپارات مينيسترلىگى مەن قازاقستان جازۋشىلار وداعى اراسىنداعى ستراتەگيالىق ارىپتەستىك ناتيجەسىندە جۇزەگە اسقان ءۇش ءىرى جوبانىڭ ءبىرى. «قازاقستاننىڭ ادەبي-تانىمدىق پانوراماسى» جوباسى اياسىندا جاس قالامگەرلەر ەلىمىزدىڭ تۇكپىر-تۇكپىرىن ارالاپ, جاڭا شىعارمالار جازعان. ناتيجەسىندە, جىل سوڭىنا دەيىن قازاق ادەبيەتىنە 20 جاڭا تۋىندى قوسىلىپ, ءار اۆتورعا 4 ملن تەڭگە كولەمىندە قالاماقى تاعايىندالعان.
ايتا كەتەيىك, پرەزيدەنتتىڭ ۇلتتىق قۇرىلتايداعى تاپسىرماسىنا سايكەس, 2023 جىلى 23 ءساۋىر ۇلتتىق كىتاپ كۇنى بولىپ بەكىتىلدى. وسىعان وراي «ۇلتتىق كىتاپ» بايقاۋى جاريالاندى. كەلەسى جىلى جۇمىسشى ماماندىقتارى جىلى اياسىندا «ەرلىك پەن ەڭبەك داستانى» اتتى بايقاۋ ۇيىمداستىرىلادى. بۇل باستاما ەڭبەك ادامدارىنىڭ ماڭىزىن ارتتىرۋدى كوزدەيدى. سونىمەن قاتار «ايبوز» ۇلتتىق ادەبي سىيلىعى بيىل دا جالعاسىن تابادى. وتكەن جىلى بۇل سىيلىققا 7 اتالىم بويىنشا بۇرىن جاريالانباعان 176 تۋىندى ۇسىنىلعان ەدى.
