بۇل – ومان سىرتقى ساياسي ۆەدومستۆوسى باسشىسىنىڭ قازاقستانعا العاشقى رەسمي كەلۋى. اتالعان ساپار ءتۇرلى سالالارداعى ەكىجاقتى ىنتىماقتاستىقتى جانداندىرۋعا سەرپىن بەرۋگە باعىتتالعان.
كەزدەسۋ بارىسىندا مينيسترلەر ساياسي, ەكونوميكالىق جانە مادەني-گۋمانيتارلىق ىنتىماقتاستىققا قاتىستى كەڭ اۋقىمدى ماسەلەلەردى تالقىلادى. ەرەكشە نازار ەنەرگەتيكا, كولىك, لوگيستيكا, قارجى جانە اۋىل شارۋاشىلىعى سياقتى نەگىزگى سالالارداعى ءوزارا ءىس-قيمىل پەرسپەكتيۆالارىنا اۋدارىلدى.
تاراپتار قازاقستان مەن وماننىڭ وڭىرلىك لوگيستيكالىق حاب رەتىندەگى ستراتەگيالىق الەۋەتىن ەسكەرە وتىرىپ, ترانزيتتىك دالىزدەردى دامىتۋ ماڭىزدىلىعىن اتاپ ءوتتى. وسى تۇرعىدا العاشقى وتىرىسى وسى جىلدىڭ ەكىنشى جارتىسىندا جوسپارلانعان قازاقستان – ومان ۇكىمەتارالىق كوميسسيانىڭ ماڭىزدى ۇيلەستىرۋشى ءرولى اتالدى.
«ومان – قازاقستاننىڭ تاياۋ شىعىستاعى ماڭىزدى سەرىكتەسى. ەلدەرىمىز ەكىجاقتى ىنتىماقتاستىقتى كەڭەيتۋ ءۇشىن ەلەۋلى مۇمكىندىكتەرگە يە», دەدى م.نۇرتىلەۋ.
ءوز كەزەگىندە ب.ءال-بۋسايدي استانانىڭ ورتالىق ازياداعى وماننىڭ جەتەكشى ەكونوميكالىق سەرىكتەسى رەتىندەگى ءرولىن اتاپ ءوتىپ, ەكىجاقتى ىنتىماقتاستىقتى جاڭا دەڭگەيگە كوتەرۋگە بەرىك بەيىلدىلىگىن راستادى جانە ەلدەر اراسىندا تىكەلەي اۋە قاتىناسىن ورناتۋ مۇمكىندىگىن قاراستىرۋدى ۇسىندى.
وسى تۇرعىدا وماننىڭ ساۋدا-ەكونوميكالىق ءوزارا ءىس-قيمىل الەۋەتىن ىسكە اسىرۋ ءۇشىن قازاقستان مەن كورشى ەلدەر ءۇشىن تىكەلەي ينۆەستيتسيالار قورىن قۇرۋ جونىندەگى باستاماسى اتالىپ ءوتىپ, قولداۋ تاپتى.
مينيسترلەر ەكونوميكالىق بايلانىستاردى نىعايتۋ مادەني جانە ادامي الماسۋدى كەڭەيتۋگە مۇمكىندىك بەرەتىنىمەن كەلىستى. ماسەلەن, بىلتىر ومانعا كەلگەن قازاقستاندىق ازاماتتاردىڭ سانى 37%-عا ءوسىپ, 21 مىڭ ادامعا دەيىن جەتتى.
وسىعان بايلانىستى قازاق تاراپى ومان ۇكىمەتىنىڭ قازاقستان ازاماتتارى ءۇشىن ۆيزاسىز رەجىمدى 30 كۇنگە دەيىن ۇزارتۋ تۋرالى شەشىمىن قۇپتادى. بۇل تۋريستىك اعىننىڭ ۇلعايۋىنا جانە ءوزارا ساپارلاردىڭ جەڭىلدەتۋىنە ىقپال ەتىپ, ءتۇرلى سالالارداعى ءوزارا ءىس-قيمىل ءۇشىن قوسىمشا پەرسپەكتيۆالار اشادى.
سونداي-اق سۇحباتتاستار وڭىرلىك جانە جاھاندىق كۇن ءتارتىبىن تالقىلاپ, ءوزارا ءتيىمدى بايلانىستى ودان ءارى تەرەڭدەتۋدىڭ پەرسپەكتيۆالارى تۋرالى پىكىر الماسىپ, ەكى ەلدىڭ سىرتقى ساياسي ۆەدومستۆولارى اراسىنداعى تىعىز ءوزارا ءىس-قيمىلدى جالعاستىرۋعا ۋاعدالاستى.
كەلىسسوزدەر قورىتىندىسى بويىنشا ىقپالداستىقتىڭ ودان ءارى پەرسپەكتيۆالىق باعىتتارىن ايقىندايتىن قازاقستان مەن ومان سىرتقى ىستەر مينيسترلىكتەرى اراسىنداعى ىنتىماقتاستىعىنىڭ جول كارتاسىنا قول قويىلدى.
