سۋرەت: prosports.kz
وسى ماقساتتا بەيجىڭ وليمپياداسىنىڭ (2008) چەمپيونى باقىت سارسەكباەۆ ۆەتنامدا باپكەر بولىپ جۇرگەن جەرىنەن ەلىمىزگە ارنايى شاقىرتىلدى. حانوي قالاسىنىڭ قۇراماسىندا كەڭەسشى-باپكەر بولىپ قىزمەت ەتىپ, وسى ەلدىڭ چەمپيوناتىندا حانويلىق بوكسشىلاردىڭ جەڭىسكە جەتۋىنە سەپتىگىن تيگىزگەن جامپوزعا تۋريزم جانە سپورت مينيسترلىگى ۇلتتىق قۇراما جانىنان رەزەرۆتىك كوماندا جاساقتاۋدى جۇكتەپ وتىر. تالدىقورعان تورىنە قۇرىلعان رينگتە تالانتىمەن دارالانعان ساڭلاقتاردان كوماندا جاساقتايتىن باپكەر جاتتىعۋدى ەندى باستاماق.
– بۇل جوبا بۇعان دەيىن دە ىسكە قوسىلىپ, ءوز ناتيجەسىن دە بەرگەن ەدى. بىراق عۇمىرى كەلتە بولدى. تاجىريبە ۇلگىسىندەگى كوماندانى 1,5 جىلداي عانا باپتادىق. الەم چەمپيونى جانىبەك ءالىمحان ۇلى, الەم بىرىنشىلىگىنىڭ كۇمىس جۇلدەگەرى تۇرسىنباي قۇلاحمەت, ستۋدەنتتەر اراسىندا الەم چەمپيونى نۇرزات سابىروۆ سىندى تالانتتار ءبىز جاساقتاعان كوماندا ساپىنان شىقتى. سول ءۇردىستى قايتا جالعاستىرۋدىڭ ماڭىزى جوعارى. سەبەبى ءار سالماق دارەجەسىندە ءبىرىنشى ءنومىرلى بوكسشىعا باسەكەلەس بولاتىن بەس-التى قارسىلاسى ءجۇرۋى كەرەك. ۇلتتىق قۇرامانىڭ بىلتىرعى پاريج وليمپياداسىندا, جازعى ازيا ويىندارىنداعى شىققان بيىگى بەلگىلى. بوكسشىلاردىڭ بۇلاي السىرەۋى – باسەكەلەستىكتىڭ جوقتىعى. ءوز سالماعىندا باسەكەلەس بولماسا سپورتشى وسپەيدى, – دەدى باقىت سارسەكباەۆ.
بەلگىلى بىلعارى قولعاپ شەبەرى ۇلتتىق قۇراما ساپىندا جۇرگەندە باقتيار ارتاەۆ, سەرىك ساپيەۆ, گەننادي گولوۆكين, سەرىك ەلەۋوۆ, قانات ءابۋتالىپوۆ, مەيىرجان راحىمجانوۆ, گاليب جافاروۆ سىندى كىل مىقتىلارمەن يىقتاسا ءجۇرىپ شىڭدالعانىن اتاپ ءوتتى, ۇلتتىق قۇراماعا قابىلدانعان ءار بوكسشى تەك ناتيجەگە جەتۋ جولىندا تىنباي ەڭبەكتەنۋى قاجەت ەكەنىن باسا ايتتى.
– ءبىز جاستار اراسىنداعى ەل بىرىنشىلىگىن ءار ايماقتان جينالعان بوكسشىلاردىڭ اراسىنان دارىندىلاردى ىرىكتەۋ ماقساتىندا ۇيىمداستىردىق. «مەنىڭ بالامدى قابىلدايسىڭ با, مىناۋ مەنىڭ شاكىرتىم ەدى» دەپ قيىلا حابارلاسقاندار دا جەتەرلىك. ءبىز ونداي كەلەڭسىزدىككە بارا المايمىز. ءبارى اشىق, ءادىل بولۋى كەرەك, شىن تالانتتىڭ باعىن اشىپ, جۇلدىزىن جاعۋ – مۇراتىمىز. ويتكەنى ءوزىم دە كەزىندە وليمپيادانىڭ التىن مەدالىن جەڭىپ العانعا دەيىن تالاي «تار جول, تايعاق كەشۋدى» باستان وتكەردىم. ۇلتتىق قۇراما ساپىنا قابىلدانعان سوڭ ايانباي ەڭبەكتەندىك. قازىرگى جاستاردان دا سونى تالاپ ەتەمىن. تالانتى تاس جاراتىن بوكسشىلار بار, ولاردى شىڭداۋدا وراسان جۇمىس اتقارۋ كەرەك. وكىنىشتىسى, قازاق بوكس مەكتەبى كەيىنگى 10-15 جىلدا قاتتى وزگەردى, – دەيدى وليمپيادا چەمپيونى.
ءبىر اپتاعا سوزىلعان جاستار اراسىنداعى ەل چەمپيوناتى بارىسىندا رەزەرۆ دايارلاۋ مىندەتىن ارقالاعان باقىت سارسەكباەۆ 240-قا جۋىق جاستىڭ اراسىنان كىل مىقتىلار ىرىكتەلگەنىن جەتكىزدى. وسى بوكسشىلاردى باپتاپ الدىمەن شري-لانكادا وتەتىن ازيا چەمپيوناتىنا قاتىستىرىپ كورمەك. قاي بوكسشىنى قۇرلىق دوداسىنا قوساتىنىن وقۋ-جاتتىعۋ جيىنىنان كەيىن ناقتىلايتىنىن ايتتى. باپكەرلىك قۇرامدا ۆلاديمير كيم, نۇرلان ايتۋاروۆ, ەرمەك ەرتاەۆ, قانات ءابۋتالىپوۆ سىندى بىلىكتى ماماندار بار.
1996 جىلدان 2016 جىلعا دەيىنگى ارالىقتا بوكسشىلار جازعى وليمپيا ويىندارىنان التىن مەدالسىز قايتقان ەمەس. تەك 2021 جىلى توكيودا, بىلتىر پاريجدە التىن مەدال بۇيىرمادى. 2028 جىلى لوس-اندجەلەستە وتەتىن جازعى وليمپيادادا ساڭلاقتاردىڭ جەتىستىگى باپكەرلەردىڭ دەڭگەيىنە ولشەم بولماق.
