تۋريزم • 24 اقپان, 2025

قازاقستانداعى توپ-5 كۋرورتتىق ءوڭىر انىقتالدى

60 رەت

كورسەتىلدى

1 مين

وقۋ ءۇشىن

بىلتىر قاڭتار-قىركۇيەك ارالىعىندا قازاقستاننىڭ كۋرورتتىق وڭىرلەرىنە 3,4 ميلليون تۋريست بارعان, دەپ جازادى Egemen.kz.

دانا مىرزاقادىر

قازاقستانداعى توپ-5 كۋرورتتىق ءوڭىر انىقتالدى

فوتو: invest.kazakhstan.travel

تۋريزم جانە سپورت مينيسترلىگىنىڭ مالىمەتىنشە, قوناق ۇيلەر مەن ورنالاستىرۋ ورىندارى كورسەتكەن قىزمەت كولەمى 129 ميلليارد تەڭگەگە جەتكەن.

ال تۋريستەر قازاقستانداعى مىنا 5 ايماققا ءجيى بارعان:

1-ورىن: الماتى تاۋ كلاستەرى

ەلىمىزدىڭ ەڭ تارتىمدى كۋرورتتىق وڭىرلەر رەيتينگىندە الماتى تاۋ كلاستەرى كوش باستاپ تۇر. وڭىرگە 1 996 801 تۋريست ساپارلاعان. اسەم تاۋ پەيزاجدارى مەن تازا اۋاسى ءوڭىردى بەلسەندى جانە تابيعات اياسىنداعى دەمالىستى ۇناتاتىندار ءۇشىن ناعىز تارتىمدى ورىنعا اينالدىردى.

2-ورىن: ماڭعىستاۋ كۋرورتتىق ءوڭىرى

ماڭعىستاۋدىڭ كورىكتى پەيزاجدارى مەن كاسپي تەڭىزىنىڭ جاعالاۋىندا 325 013 تۋريست دەمالعان.

3-ورىن: ششۋچە-بۋراباي كۋرورتتىق ءوڭىرى

ورمانى, كولدەرى جانە كۋرورتتىق كەشەندەرىمەن ايگىلى بۇل ءوڭىر 275 295 ساياحاتشىنى قابىلداعان.

4-ورىن: الاكول كۋرورتتىق ءوڭىرى

الاكول كولىنىڭ اباي وبلىسىنداعى اۋماعىنا 125 621, جەتىسۋ وبلىسىنداعى بولىگىنە 113 059 تۋريست بارعان. وسىلايشا, بۇل ءوڭىر ەلىمىزدىڭ باستى تابيعي ءىنجۋ-مارجانى ەكەنىن تاعى ءبىر مارتە دالەلدەدى.

5-ورىن: بالقاش كۋرورتتىق ءوڭىرى

بالقاش كولىنىڭ جاعالاۋىندا ورنالاسقان دەمالىس ءوڭىرى بىلتىر 9 ايدا 120 948 تۋريست قابىلداعان.