تىكۇشاقپەن بارلاۋ بارىسىندا ءشۇلبى سۋ ەلەكتر ستانتسياسىنداعى گيدرولوگيالىق جاعدايعا, كوكتەمدە ەرتىس پەن ۋبا وزەندەرىندەگى سۋ دەڭگەيى كوتەرىلەتىن قاۋىپتى ورىندارعا دەن قويىلدى. مۇز جارۋ جۇمىسى جۇرگىزىلگەن ەلدى مەكەندەر دە نازاردان تىس قالمادى.
ايماق باسشىسى بورودۋليحا اۋدانىنداعى كراسنىي يار, پەرەمەنوۆكا اۋىلدارى مەن جەزكەنت كەنتى اۋماعىنداعى قار دەڭگەيىن اۋەدەن باقىلادى. اتالعان ەلدى مەكەندەر ماڭىندا جىل سايىن مۇز جارۋ جۇمىسى جۇرگىزىلەدى. ويتكەنى, گيدروقۇرىلىمدار جاقىن ورنالاسقان.
«بۇگىن وزەندەردە مۇز جارۋ جۇمىسىن جۇرگىزۋگە دايىندىق بارىسى دا تەكسەرىلدى. وبلىستىڭ باسقا دا اۋداندارىنداعى تاسقىن قاۋپى بار ەلدى مەكەندەردى تۇراقتى باقىلاۋدا ۇستاپ وتىرمىز. كۇندەلىكتى مونيتورينگ جۇرگىزەمىز. ايماق باسشىسىنا وڭىردەگى احۋالدى تولىق باياندادىم», دەدى اباي وبلىسى اكىمىنىڭ ورىنباسارى ديميتري گاريكوۆ.
ەرتىس وزەنى مەن ەلدى مەكەندەردى تىكۇشاقپەن بارلاۋ بارىسىندا قاردىڭ قالىڭدىعى بايقالعانىمەن قاردىڭ ەرۋى انىقتالمادى. ەرتىس پەن ۋبا وزەندەرىندە مۇز سۇڭگىلەرى جوق. الايدا ەرتىس وزەنىنىڭ سەمەي قالاسى حولودنىي كليۋچ ەلدى مەكەنى اۋماعىندا مۇز كەسەگىنىڭ جينالۋى بايقالادى. ەكى اۋدان مەن وبلىس ورتالىعىنداعى گيدرولوگيالىق جاعدايدى باعامداعان وبلىس اكىمى وزەندەردەگى سۋ دەڭگەيىن, وڭىردەگى بارلىق سۋ بوگەندەرىن, سۋ وتكىزۋ قۇرىلعىلارىن ءجىتى باقىلاۋدا ۇستاۋدى تاپسىردى.
الداعى ۋاقىتتا بەسقاراعاي اۋدانىنىڭ جەتىجار, كريۆينكا اۋىلدارى مەن سەمەي قالاسى اۋماعىنداعى ەرتىس وزەنىندە مۇز جارۋ جۇمىستارى جۇرگىزىلەدى. بۇعان قوسا, جاقىن ارادا بەسقاراعاي, ءۇرجار, ماقانشى, اقسۋات اۋداندارىندا سۋ تاسقىنىنا دايىندىق بارىسى پىسىقتالاتىن بولادى.
