جاستار جۇمىسشى ماماندىعىنا قانشالىقتى قىزىعادى دەگەن ساۋالدى بىلىكتى مامان, ينجەنەر-قۇرىلىسشى ەرلان مۇستافاەۆقا قويعان ەدىك. «ەڭ ءبىرىنشى ولاردىڭ بويىندا ماماندىققا دەگەن قۇرمەتى جوعارى بولۋعا ءتيىس» دەيدى مامان. ارقاشاندا وقۋ, ءبىلىم الۋ ادامعا كەش ەمەس ەكەنىن دە اتاپ ءوتتى. ءوزى مەكتەپتى بىتىرگەن سوڭ ءبىر جىل قازىرگى جەتىسۋ وبلىسى كەربۇلاق اۋدانىنا قارايتىن باسشي اۋىلىندا ەڭبەككە ارالاسىپ, اسكەري مىندەتىن ورىنداۋعا بارعانىن جەتكىزدى. كەيىن وسكەمەندەگى قۇرىلىس ينستيتۋتىن ءتامامداپ, ينجەنەر-قۇرىلىسشى ماماندىعىن مەڭگەرەدى.
«مەن ۇيدەگى جەتى بالانىڭ تۇڭعىشى ەدىم. اكەم 34 جاسىندا كوپىر قۇرىلىسى كەزىندە مەرتىگىپ, ۇزاق ۋاقىت ەمدەلدى. اكەم ەكىنشى توپتاعى مۇگەدەك ەدى. سوسىن ءۇيدىڭ بار شارۋاسى ماعان قارادى. وزىمە تەتە قارىنداسىم وقۋعا ءتۇسىپ, ءبىر جىل قالاعا جەرسىنگەنشە اۋىلدا اكەم مەن انامنىڭ جانىندا باۋىرلارىما باس-كوز بولدىم», دەيدى ە.مۇستافاەۆ. وسكەمەندەگى وقۋىن تامامداعان سوڭ جاس ماماندى الماتى وبلىستىق كوممۋنالدىق شارۋاشىلىعىنا جىبەرەدى. مامان بۇل ورتا ۇلكەن ۇستاحانا بولعانىن ايتادى. وبلىستىڭ قۇرىلىس-مونتاج باسقارماسىندا قاتارداعى قىزمەتكەردەن باسشى لاۋازىمىنا دەيىن قىزمەت ساتىسىنا ءوستى.
«قۇرىلىس سالاسىن جەتە بىلەتىن مامان رەتىندە ايتارىم, بۇگىندە دانەكەرلەۋشى ماماندار وتە قات. دانەكەر دەگەن – بولاتتى ءبىر-بىرىنە جالعاۋ عانا ەمەس, تەمىردەن ءتۇيىن ءتۇيىپ, ورنەك سالۋمەن بىردەي. تەمىردى تەمىرگە جالعاۋدى ەلەكترودتى ەرىتىپ قۇيۋ دەپ قانا ءتۇيسىنۋ – قاتە. اسقان شەبەرلىكتى تالاپ ەتەتىن ماماندىق. ودان كەيىن ەلەكتريك ماماندار دا تاپشى. بايقاعانىم, جاس مامانداردىڭ تالابىمدى ۇشتاسام, شەبەرلىگىمدى شىڭداسام دەگەنگە ۇمتىلىسى تومەن. قۇرىلىس سالاسىنداعى ماماندىق يەلەرى دە شىعارماشىلىق ادامدار سەكىلدى ۇنەمى ىزدەنىستە بولىپ, وسۋگە تالپىنۋى كەرەك. كەيىنگى تولقىننىڭ جاۋاپكەرشىلىگى جوعارى بولسا ەكەن دەيمىن. مەملەكەت باسشىسىنىڭ بيىل جۇمىسشى ماماندىقتارى جىلى دەپ جاريالاۋىن قولدايمىن. جىلدىڭ ءتورت مەزگىلىندە دە قۇرىلىستىڭ باسىندا جۇرەتىن جانداردىڭ ەڭبەگى قاشاندا ەلەنۋگە ءتيىس», دەيدى مامان.
ەرلان حاليل ۇلى تەمىرجول قۇرىلىسىندا دا قولتاڭباسىن قالدىردى. تەپلوۆوز بەن ۆاگونداردى جوندەۋدەن وتكىزەتىن ارنايى ورىننىڭ قۇرىلىسىن جۇرگىزۋ جۇكتەلگەندە سەنىمدى اقتاي ءبىلدى. بىلىكتى ماماننىڭ باسقارۋىمەن تەمىرجول دەپولارى دا بوي كوتەردى. كوكشەتاۋعا بارار كۇرە جولداعى اينالمالى كوپىردى دە ەرلان مۇستافاەۆ جەتەكشىلىك ەتكەن قۇرىلىس كومپانياسى سالدى. ششۋچە – زەرەندى باعىتىنداعى كوپىردى دە ءبىزدىڭ كەيىپكەرىمىز باستاعان بىلگىر ماماندار تۇرعىزدى. ونىڭ ەڭبەگى ەسكەرۋسىز قالماي, جاقىندا «ەڭبەك ارداگەرى» توسبەلگىسىمەن ماراپاتتالدى.
«ولەڭگە اركىمنىڭ-اق بار تالاسى» دەپ حاكىم اباي جىرلاعانداي, ەرلان حاليل ۇلى دا ءسوز ونەرىنەن قاراجاياۋ ەمەس, ەپتەپ ولەڭ دە جازادى. قولى قالت ەتسە, اعاشتان ءتۇرلى بۇيىمدار دا جاسايدى. اينالاسىن دوسپەن قالاعان جاننىڭ ازاماتتىعى, جومارتتىعى جايىندا جولداستارى تولعانا ايتادى.
«ەڭبەكتىڭ نانى ءتاتتى» دەيمىز, ەشكىمنىڭ الا ءجىبىن اتتاماي, جان بالاسىنا قيانات جاساماي تاپقان تابىسىڭنىڭ بەرەكەسى مول. وزىڭە سەنىپ تاپسىرىلعان قىزمەتتى ادال, جاۋاپكەرشىلىكپەن اتقارعان دۇرىس. سوندا عانا ەلدىڭ العىسىنا بولەنەسىڭ, مارتەبەڭ وسەدى. ادال ءجۇرىپ, ابىرويعا كەنەلگەنگە نە جەتسىن» دەيدى ە.مۇستافاەۆ.
مەملەكەت باسشىسىنىڭ «ادال ازامات – ادال ەڭبەك – ادال تابىس» قاعيداتىنا تولىق ساي كەلەتىن تۇلعالاردىڭ ونەگەلى ءومىر جولى ناسيحاتتالىپ, باعالانۋعا ءتيىس. وسى ورايدا, 40 جىلعا جۋىق قۇرىلىس سالاسىندا ەڭبەك ەتىپ كەلە جاتقان ماماننان ومىردەن نە تۇيگەنىن سۇرادىق.
«جاستارعا ايتار اقىلىم, جاۋاپكەرشىلىك دەگەن ۇعىم ۇنەمى جوعارى بولسا ەكەن دەيمىن. اسىرەسە قۇرىلىس سالاسىندا وسى وبال مەن ساۋاپتى ويلاماۋدىڭ اقىرى وپىق جەگىزەدى. ساپاسى سىن كوتەرمەيتىن قۇرىلىستىڭ جۇرگىزىلۋى جاۋاپكەرشىلىكتى سەزىنبەۋدىڭ, اماناتقا قيانات جاساۋدىڭ سالدارىنان دەپ پايىمدايمىن», دەيدى كاسىبي مامان. وسى جاۋاپكەرشىلىكتى سەزىنە الىپ ءجۇرمىز بە؟
