ستارتاپ نەگىزىن قالاۋشى اسىلزات يساتاەۆانىڭ ايتۋىنشا, رەنتگەن سۋرەتتەرىن تالداۋ – ۇزاق ءارى كۇردەلى ۇدەرىس. دارىگەرلەر جاق سۇيەكتەرىنىڭ ورنالاسۋىن قولمەن ولشەگەندىكتەن قاتەلەسۋ ىقتيمالدىلىعى جوعارى. ال ناۋقاس ونىڭ زاردابىن ءومىر بويى تارتۋى مۇمكىن.
«جۇمىسىمىزدى العاش باستاعان كەزدە بىزگە ءبىر قىز حابارلاستى. ول 5 جىل بويى دۇرىس ورناتىلماعان برەكەت تاعىپ كەلگەن. سونىڭ سالدارىنان جاق سۇيەگى شامادان تىس قىسىلىپ, مويىن ومىرتقاسىنداعى نەرۆ زاقىمدانعان. اقىرىندا, بۇل جاعداي ونىڭ اياقتارىنىڭ ۋاقىتشا سال بولۋىنا اكەلگەن. مىنەكەي, وسى وقيعا ءبىزدىڭ ءونىمنىڭ دارىگەرلەر مەن قاراپايىم ادامدارعا قانشالىقتى ماڭىزدى ەكەنىن كورسەتتى. قازىرگى تاڭدا پلاتفورما ورىس, اعىلشىن, اراب, پورتۋگال تىلدەرىندە قولجەتىمدى. تەحنولوگيامىز امبەباپ بولعاندىقتان, ونى كەز كەلگەن ەلدە قولدانۋعا بولادى», دەيدى ا. يساتاەۆا.
قاجەتتى دۇنيە قاشاندا سۇرانىسقا يە. قازىر 50-دەن استام ستوماتولوگيالىق كلينيكا مەن دياگنوستيكالىق ورتالىق اتالعان پلاتفورمانى كۇندەلىكتى تاجىريبەدە قولدانىپ, يگىلىگىن كورىپ وتىر. 2025 جىلدىڭ ءبىرىنشى توقسانىندا بۇل كورسەتكىشتى 150-گە دەيىن ارتتىرۋ جوسپارلانعان. كومپانيانىڭ نەگىزگى ماقساتى – MENA (تاياۋ شىعىس جانە سولتۇستىك افريكا) ايماعىنا شىعۋ. تاعى ءبىر قۋانتارلىق جاڭالىق, جاقىن كۇندەرى ساۋد ارابياسىندا, بىرىككەن اراب امىرلىكتەرىندە, باسقا دا ەلدەردە «Aidentis»-ءتىڭ قاناتقاقتى جوبالارى ىسكە قوسىلماق.
ايتا كەتەيىك, «Aidentis» – تەك تاجىريبەلى دارىگەرلەرگە عانا ەمەس, ستۋدەنتتەر مەن جاس ستوماتولوگتەرگە دە تاپتىرماس قۇرال. بۇل مودۋل ولار ءۇشىن ۆيرتۋالدى زەرتحانا قىزمەتىن اتقارادى. ياعني ستۋدەنتتەر رەنتگەن سۋرەتتەرىن تالداۋدى ۇيرەنەدى, ەمدەۋ جوسپارىن قۇرۋدى مەڭگەرەدى. جوبا جەتەكشىسىنىڭ ايتۋىنشا, «Aidentis» سەرىكتەستەرى قاتارىندا مەديتسينالىق ۋنيۆەرسيتەتتەر, كاسىبي قاۋىمداستىقتار, ستۋدەنتتىك ۇيىمدار بار.
«جاقىندا سەمەي مەديتسينا ۋنيۆەرسيتەتىمەن مەموراندۋمعا قول قويدىق. ەندى وسى مودۋل وقۋ باعدارلاماسىنا ەنگىزىلەدى. ستۋدەنتتەر – پلاتفورمانىڭ بولاشاق قولدانۋشىلارى. جىل سايىن ەلىمىزدەگى ۋنيۆەرسيتەتتەر شامامەن 100 ستوماتولوگ مامانىن دايارلاپ شىعارادى, ولاردىڭ كوبى وسى سالادا قىزمەت ەتەدى. ولار بولاشاقتا جاساندى ينتەللەكت قۇرالدارىن مەديتسينالىق ورتالىقتارىنا ەنگىزىپ, ارىپتەستەرىنە ونىڭ ارتىقشىلىقتارىن تۇسىندىرەدى. قازىر كلينيكالار قىمبات جابدىق ساتىپ الىپ, بىراق ەم-دوم بارىسىندا جاساندى ينتەللەكتىنىڭ مۇمكىندىگىن قولدانباسا, ونى زاماناۋي مەديتسينالىق ورتالىق دەپ اتاۋ قيىن», دەيدى ستارتاپ نەگىزىن قالاۋشى.
«Aidentis»-ءتى قولدانۋعا كومپيۋتەر مەن ينتەرنەت بولسا جەتكىلىكتى. پلاتفورما ءاربىر ءتىستىڭ جاعدايىن, بۇرىشتارىن ەسەپتەپ, پانورامالىق كەسكىندەر مەن دياگراممالار تۇرىندە تالداۋ ۇسىنادى. تاعى ءبىر ەرەكشەلىگى – رەنتگەن سۋرەتتەرىن وڭدەۋ جىلدامدىعى مەن دالدىگى. ءداستۇرلى دياگنوستيكا كەزىندە دارىگەرگە رەنتگەن سۋرەتتەرىن مۇقيات قاراپ, جاق سۇيەكتەرى مەن تىستەردىڭ ورنالاسۋىن انىقتاۋعا كوپ ۋاقىت جۇمساۋعا تۋرا كەلەدى. بۇل ۇدەرىس كەيدە بىرنەشە ساعاتقا سوزىلۋى مۇمكىن. ال «Aidentis» الگوريتمدەرى دياگنوزدى سەكۋندتار ىشىندە جاساپ شىعارادى.
«جاساندى ينتەللەكت – دارىگەردى الماستىراتىن قۇرال ەمەس, وعان كومەكشى. ءبىزدىڭ ماقساتىمىز – ستوماتولوگتەردىڭ جۇمىسىن جەڭىلدەتۋ, ولاردى ارتىق جۇكتەمەدەن بوساتۋ. ادام فاكتورىنىڭ اسەرىن ازايتۋ ارقىلى دياگنوستيكا ساپاسىن جاقسارتۋ. جاساندى ينتەللەكت دارىگەردىڭ كومەكشىسى رەتىندە قانداي دا ءبىر كۇماندى بەلگى بايقالسا, جۇيە دارىگەرگە حابارلايدى. وسىلايشا, سوڭعى شەشىمدى ءاردايىم مامان قابىلدايدى. قىسقاسى, تەحنولوگيا مەن ادام فاكتورىن بىرىكتىرەتىن ەڭ ءتيىمدى ءادىس. ەندى جاساندى ينتەللەكت كومەگىنە جۇگىنگەن كەزدە ءتىس دارىگەرلەرى ۋاقىتتى ۇنەمدەپ قانا قويماي, بۇرىنعىدان بىرنەشە ەسە كوبىرەك تابىس تابا الادى. سەبەبى ۇنەمدەلگەن ۋاقىتىن باسقا پاتسيەنتتەردى قابىلداۋعا جۇمسايدى», دەيدى اسىلزات يساتاەۆا.
جاقىندا «Aidentis» ستارتابى قازاقستان ستوماتولوگيالىق اسسوتسياتسياسىمەن (قسا), قازاقستان ستۋدەنت-ستوماتولوگتەر قاۋىمداستىعىمەن (DAS) ستراتەگيالىق سەرىكتەستىك ورناتتى. قسا – ەلىمىزدە 19 فيليالى بار, ستوماتولوگيا سالاسىنداعى ءارتۇرلى دەڭگەيدەگى مامانداردى بىرىكتىرەتىن ۇيىم. «Aidentis»-پەن ارىپتەستىك جاساندى ينتەللەكت تەحنولوگيالارىن كلينيكالىق دياگنوستيكاعا ەنگىزۋگە, جاس مامانداردى دايارلاۋ مۇمكىندىكتەرىن كەڭەيتۋگە جول اشادى.
«Aidentis» ستارتابىنىڭ الەۋەتىن ولاردىڭ جاساندى ينتەللەكت تاقىرىبىنداعى ءدارىسىن تىڭداعان كەزدە بايقادىق. بۇل باعىت – ستوماتولوگيانىڭ بولاشاعى. ەندى ءبىز وسى تەحنولوگيالاردى كلينيكالارىمىزعا ەنگىزە وتىرىپ, ماماندار مەن ستۋدەنتتەردىڭ داعدىلارىن دامىتىپ, دياگنوستيكا ساپاسىن جاقسارتۋعا كومەكتەسە الامىز», دەدى قسا پرەزيدەنتى دانا وسپانوۆا.
سونىمەن قاتار پلاتفورما بولاشاقتا قىزمەتىن كەڭەيتىپ, جاڭا مۇمكىندىكتەر ۇسىنۋدى جوسپارلاپ وتىر. اتاپ ايتقاندا, ستوماتولوگيالىق حيرۋرگيا, يمپلانتولوگيا, تەراپيا باعىتتارىندا جاساندى ينتەللەكتىنى قولدانباق. بۇل – ستوماتولوگياداعى دياگنوستيكادان باستاپ ەمدەۋ ۇدەرىسىنە دەيىنگى بارلىق كەزەڭگە جاڭا دەڭگەي اكەلەتىن ماڭىزدى قادام. الداعى ۋاقىتتا وسىناۋ يننوۆاتسيالىق شەشىم الەمدىك دەڭگەيدە ءوز ورنىن تاۋىپ, باسەكەگە قابىلەتتى ونىمگە اينالارى ءسوزسىز.
