پرەزيدەنت مەملەكەت تاراپىنان قولداۋ كورسەتىلگەن كەزدە ازاماتتاردىڭ ناقتى تابىسى ەسكەرىلمەي جاتقانىن, الەۋمەتتىك قولداۋعا مۇلدە مۇقتاجدىعى جوق ءال-اۋقاتى جوعارى وتباسىلار دا مەملەكەتتەن كومەك الىپ وتىرعانىن اتاپ ايتتى. حالىققا مەملەكەت تاراپىنان بەرىلەتىن قولداۋدى ءالى دە جەتىلدىرۋ قاجەتتىگىن, الەۋمەتتىك كومەك ءادىل, اشىق ءارى ءتيىمدى بولۋى كەرەكتىگىن ەسكەرتتى.
بيىلدان باستاپ «الەۋمەتتىك ءاميان» تولىقتاي ەنگىزىلەدى. بۇل شارانى تسيفرلىق دامۋ, يننوۆاتسيالار جانە اەروعارىش ونەركاسىبى, ەڭبەك جانە حالىقتى الەۋمەتتىك قورعاۋ, دەنساۋلىق ساقتاۋ, وقۋ-اعارتۋ مينيسترلىكتەرى بارلىق ءوڭىردىڭ اكىمدىكتەرىمەن بىرلەسە اتقارادى. پرەمەر-مينيستر و.بەكتەنوۆ ۇكىمەت وتىرىسىندا 1 جەلتوقسانعا دەيىن جوباعا كىرەتىن مەملەكەتتىك قىزمەتتەر ءتىزىلىمى بەرىلۋگە ءتيىس ەكەنىن اتاپ ءوتتى.
«الەۋمەتتىك ءاميان» جوباسىندا ءار وتباسىنىڭ الەۋمەتتىك مارتەبەسىنە قاراي مەملەكەتتىك قولداۋ تۇرلەرى بار. قاناتقاقتى رەجىمدە مەملەكەتتىك قولداۋدىڭ ەكى شاراسى ىسكە قوسىلدى. الدىمەن وقۋشىلاردى ىستىق تاماقپەن قامتاماسىز ەتۋ. بالانىڭ تاماقتانۋى تۋرالى اقپارات نەگىزىندە ازاماتتىڭ الەۋمەتتىك ءاميانىنا ۆاۋچەر تۇسەدى. وقۋشىنىڭ مەكتەپتە تاماقتانعانى جۇيەدە ەسەپكە الىنادى ءارى بۇل تۋرالى اتا-اناسى دا «الەۋمەتتىك ءاميان» ارقىلى حاباردار بولادى. سونداي-اق اتا-انا مەملەكەتتىك قولداۋ شاراسىنىڭ ساپاسى تۋرالى كەرى بايلانىس ورناتا الادى. وسى اقپارات نەگىزىندە قىزمەت كورسەتۋ اكتىسى مەن تولەم شوتى جاسالادى. مەملەكەت ۆاۋچەردى قارجىلاندىرۋدى تاماقتانۋ فاكتىسى بويىنشا جۇزەگە اسىرادى. بۇرىنعىداي باستاۋىش سىنىپ وقۋشىلارىنىڭ سانىنا نەگىزدەلمەيدى. مۇنى وقۋ-اعارتۋ مينيسترلىگى تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىمەن ىنتىماقتاسا, «eGov Mobile» ءموبيلدى قوسىمشاسىندا «الەۋمەتتىك ءاميان» اياسىندا ەنگىزىپ وتىر.
تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنىڭ مالىمەتىنشە, ەلىمىزدەگى 2000-نان استام مەكتەپتە ءبىلىم الىپ جاتقان 703 مىڭنان استام وقۋشى «الەۋمەتتىك ءاميان» ارقىلى تەگىن ىستىق تاماقپەن قامتىلعان. «الەۋمەتتىك ءاميان» اياسىن كەڭەيتۋ ماقساتىندا ينتەگراتسيالاۋ جۇمىسى جۇرگىزىلىپ جاتىر. الدىمەن اقمولا, ماڭعىستاۋ وبلىستارىنىڭ, استانا, شىمكەنت قالالارىنىڭ مەكتەپتەرىنە سىناق رەتىندە ەنگىزىلدى. الداعى ۋاقىتتا وزگە وڭىرلەر دە قامتىلادى.
«الەۋمەتتىك اميانمەن» «eGov Mobile» قوسىمشاسىنا تىركەلىپ, ء«دارى-دارمەكپەن قامتاماسىز ەتۋ» ءبولىمى ارقىلى تاپسىرىس بەرۋگە بولادى. سەرۆيس قىزمەتىنىڭ ءتىلىن تۇسىنبەيتىن قارت كىسىلەر ەمحاناعا بارىپ Face-ID مەن ۆەب-كامەرالار ارقىلى سايكەستەندىرۋدەن ءوتۋ ارقىلى قاجەتتى ءدارىسىن الادى. دەنساۋلىق ساقتاۋ مينيسترلىگى «الەۋمەتتىك ءاميان» ارقىلى ءدارى-دارمەكتەردى بەرۋ قاناتقاقتى جوباسى 700-دەن استام مەديتسينالىق ۇيىمدا جۇزەگە اسىرىلاتىنىن مالىمدەدى. وسى ۋاقىتقا دەيىن 93 مىڭ رەتسەپتپەن دارىلەر بەرىلگەن. ەندى ناۋقاس وزىنە قاجەت ءدارىنى ىزدەگەندە بۇرىنعىداي رەتسەپت الۋ ءۇشىن الدىن الا دارىگەردىڭ قابىلداۋىنا جازىلىپ, كەزەككە تۇرىپ, ۋاقىتىن شىعىندامايدى. مۇندا تولەنەتىن قاراجات ءدارى-دارمەكتەردى ناقتى بەرگەننەن كەيىن وتەلەدى. مەملەكەتتىك ورگاندار «الەۋمەتتىك ءاميان» پلاتفورماسى ارقىلى وزدەرىنىڭ قولداۋ شارالارىن كەزەڭ-كەزەڭىمەن ءدال وسىلاي جۇزەگە اسىرادى.
مەملەكەتتىك قىزمەتتەردى تسيفرلاندىرۋدىڭ يگىلىگىن ەل كورۋگە ءتيىس. قولداۋ شارالارىنان حابارسىز ازاماتتار دا جوق ەمەس. مۇنىڭ بارلىعى دا دۇرىس قۇلاقتاندىرماۋدىڭ سالدارى. «الەۋمەتتىك ءاميان» – مەملەكەتتىك قولداۋ شارالارىنىڭ بارلىق تۇرلەرىن حابارلاۋدىڭ, ۇسىنۋدىڭ, ەسەپكە الۋدىڭ بىرىڭعاي پلاتفورماسى. جوباعا كەزەڭ-كەزەڭىمەن مەملەكەتتىك قولداۋ شارالارى كوشىرىلەدى. ءار ازامات وزىنە تيەسىلى مەملەكەتتىك قولداۋ تۇرلەرى تۋرالى حابارلامانى پلاتفورمادان تابا الادى.
جوبا تسيفرلىق تەحنولوگيالاردى ەنگىزۋ ەسەبىنەن الەۋمەتتىك كومەك قۇرالدارىن ماقساتسىز پايدالانۋدى بارىنشا ازايتۋعا باعىتتالعان. وسىلايشا, ازامات مەملەكەتتىك قولداۋدىڭ بارلىق تۇرلەرىن عانا ەمەس, سونىمەن بىرگە مەملەكەت شىعىندارىنىڭ مولشەرىن دە كورەدى. مەملەكەتكە دە ءتيىمدى: قاراجاتتىڭ ماقساتتى پايدالانىلۋىن تىزىمدەپ قانا قويماي, تىكەلەي باقىلاۋ جۇرگىزىپ, سارالاپ وتىرادى. «الەۋمەتتىك ءاميان» «eGov mobile» قوسىمشاسىنىڭ ىشىندە جەكە قىزمەت رەتىندە ىسكە قوسىلدى.
كوپشىلىكتىڭ كوكەيىندە «الەۋمەتتىك ءاميان» جوباسى ارقىلى الەۋمەتتىك تولەمدەر جاساۋعا بولا ما, بۇعان تۇسكەن اقشانى قولما قول شەشىپ الۋعا نەمەسە بانك شوتىنا اۋدارۋ مۇمكىن بە دەگەن ساۋالداردىڭ تۋىندايتىنى انىق. باستاپقى كەزەڭدە جوبا ارقىلى اقشالاي ەمەس, ناقتى مەملەكەتتىك قولداۋ شارالارى كورسەتىلەدى.
ۇلتتىق بانك قارجى مينيسترلىگىمەن بىرلەسە وتىرىپ, تسيفرلىق تەڭگە پلاتفورماسىن جۇزەگە اسىرۋدى قولعا الدى. مۇنىڭ تيىمدىلىگى – «الەۋمەتتىك ءاميان» جوباسى شەڭبەرىندە تسيفرلىق ۆاۋچەرلەرمەن ەسەپ ايىرىسۋ مۇمكىندىگى پايدا بولادى. بۇل باستاما الەۋمەتتىك تولەمدەردى اۆتوماتتاندىرىپ, ەسەپكە الۋ ۇدەرىستەرىن جەدەلدەتەدى, الەۋمەتتىك كومەكتىڭ ايقىندىلىعىن ارتتىرادى. سونىمەن قاتار ءۇشىنشى تۇلعالار تاراپىنان ءوندىرىپ الۋ مەن تىيىم سالۋدىڭ ساقتالۋىنا كەپىلدىك بەرەدى.
«الەۋمەتتىك ءاميان» جوباسى «eGov مobile» ءموبيلدى قوسىمشاسى ارقىلى جۇزەگە اسىرىلادى. ازاماتتاردىڭ جەكە دەرەكتەرى قانشالىقتى قورعالادى دەگەن ساۋالدى تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنە جولداعان ەدىك. «قازىرگى ۋاقىتتا «الەۋمەتتىك ءاميان» «ەلەكتروندىق ۇكىمەتتىڭ» «eGov mobile» ءموبيلدى قوسىمشاسى اياسىندا جەكە قىزمەت رەتىندە ىسكە قوسىلدى. وسىلايشا, ازاماتتاردان «الەۋمەتتىك ءاميان» جوباسىنا جەكە اۆتوريزاتسيا تالاپ ەتىلمەيدى. دەربەس دەرەكتەردى قورعاۋ, ساقتاۋ ءھام وڭدەۋ قامتاماسىز ەتىلەدى», دەپ مالىمدەدى مينيسترلىكتەن.
ازاماتتار «الەۋمەتتىك ءامياندى» بانك كارتالارىمەن قاتار قولدانا, پايدالانا الادى. ەگەر بانك الدىندا بورىشى بولسا, كوللەكتورلار, سالىق ورگاندارى اميانداعى قاراجاتتى بۇعاتتاپ, وندىرە المايدى. ويتكەنى بۇعان ەسەپتەلىپ اۋدارىلعان قاراجات «تولەمدەر جانە تولەم جۇيەلەرى تۋرالى» زاڭعا سايكەس قورعالادى.
