«رەجيسسەر بولعىم كەلەدى»
ادەتتە, باسشىلىققا بەيىم ادامداردىڭ شىعارماشىلىعى شاشىراڭقى بولسا, سۋرەتكەرلىك قولتاڭباسى قالىپتاسقان كانىگى شەبەرلەر باسقارۋعا كەلگەندە ەبەدەيسىز عوي. تاڭعالارلىعى – گۇلسينانىڭ بويىندا وسى قاسيەتتەردىڭ ەكەۋى دە تەڭ توعىسقان. سونىسى ەتىنىڭ تىرىلىگى مەن وتتاي جانعان قوس جانارىنان ايقىن اڭعارىلسا كەرەك, 1995 جىلى الماتىدان ارنايى كوميسسيانى باستاپ كەلگەن قازاقستاننىڭ حالىق ءارتىسى, رەجيسسەر تالعات تەمەنوۆ بولاشاق ساحناگەردى العاش كورگەن ساتتە-اق: «سەنەن اكتريسا ەمەس, جاقسى رەجيسسەر شىعادى», دەپ بىردەن كەسىپ ايتتى. وسىلايشا, قيىرداعى سامارادان وتانىنا ساعىنىشىن ارقالاپ جەتكەن بويجەتكەندى ورالدىڭ مادەنيەت ينستيتۋتىندا وقىپ جۇرگەن جەرىنەن بىردەن الماتىداعى تەمىربەك جۇرگەنوۆ اتىنداعى مەملەكەتتىك تەاتر جانە كينو ينستيتۋتىنىڭ «دراما رەجيسسۋراسى» بولىمىنە شاقىرادى. تەك رەسەي جەرىندە تۋىپ-وسكەندىگىن ەسكەرگەن ۇستازدار العاشىندا ورىس بولىمىنە جولداما بەرەدى. وعان قاناعاتتانباعان مىنەزدى قىز انا تىلىنە شورقاق بولعانىمەن, جانىنىڭ قازاق ەكەندىگىن ايتىپ قاسقايىپ تۇرىپ الادى. وسىلايشا, وجەت بويجەتكەن ءتىپتى ارمانداپ تا كورمەگەن ۇلكەن ولجا – قازاقستاننىڭ حالىق ءارتىسى, پەداگوگ-پروفەسسور مامان بەيسەركە ۇلىنىڭ شەبەرحاناسىنا ويلاماعان جەردەن توپ ەتە قالادى. بۇل تۋرالى كەيىپكەرىمىزدىڭ ءوزى: «اينالام, ارالاساتىن ورتام بارلىعى ورىستار ەدى. قازاق تىلىنە شورقاق بولۋىم دا مەنى اتاجۇرتىما كەلىپ, قازاق ونەرىنە قىزمەت ەتسەم دەگەن ارمانىمنان الىستاتا بەردى. كەيدە بۇل تىلەگىم مۇمكىن ەمەستەي كورىنەتىن», دەپ تولعانادى.
ءبىر قىزىعى, ول ءوزىنىڭ رەجيسسەر بولاتىندىعىن بالا كۇنىندە سەزسە كەرەك, 4-سىنىپتا وقىپ جۇرگەن كەزىندە كۇندەلىگىنە «رەجيسسەر بولعىم كەلەدى» دەپ جازىپتى. تەك ونىڭ قاشان, ءدال قاي كۇنى ورىندالاتىنىن بىلمەسە دە, سول ارمانىنا جەتەر كۇندى تاعاتسىزدانا كۇتتى.
مامان مەكتەبى
قازاقستاننىڭ حالىق ءارتىسى, تالاپشىل ۇستاز مامان بايسەركە ۇلىنىڭ شەبەرحاناسىنا ءتۇسۋ جاس تالاپكەر ءۇشىن تاعدىردىڭ تەڭدەسسىز تارتۋى ەدى. سەبەبى ءدال وسى پروفەسسور اۋديتورياسىندا ءبىلىم الا ءجۇرىپ, ونەردىڭ وتىنا كۇيىپ, سۋىعىنا ءتوزۋدى ۇيرەندى. باستىسى, قيال مەن ءبىلىم, ەڭبەك پەن ءتوزىم رەجيسسەردىڭ باستى قارۋى ەكەنىن تەرەڭ ءتۇيسىندى. قىزىعى مەن شىجىعى مول ستۋدەنتتىك جىلداردى ءوزى بىلاي دەپ ەسكە الادى: ء«بىزدىڭ قينالعان, ەڭ قيىن دا كۇردەلى كەزەڭىمىز وسى وقۋ جىلدارى بولعان سياقتى. اكادەميادا بەس جىل وقىدىق. بۇل شىعارماشىلىق شىڭدالۋ كەزەڭىمىزدەگى وتە كۇردەلى بەس جىل ەدى. سەبەبى ۇستازىمىز مامان بايسەركە ۇلى قاتال, تىم تالاپشىل بولاتىن. بار اششى تەرىمىزدى وسىناۋ بەس جىل وقۋدا جاقسىلاپ تۇرىپ سىعىپ الدى. وقۋعا 16 بالا ءتۇسىپ, سوڭىندا بەسەۋىمىز عانا ءبىتىرىپ شىقتىق. وسىنىڭ ءوزى-اق رەجيسسۋرا ماماندىعىنىڭ قانشالىقتى قيىن ەكەنىنەن حابار بەرىپ تۇرعانداي».
راسىمەن-اق, جالپى تۇسىنىك بويىنشا كۇنى بۇگىنگە دەيىن كوپ جاعدايدا رەجيسسۋرا ەر ادامنىڭ ءتول ماماندىعىنداي قابىلدانادى. سىرتتاي سۇلۋ كورىنگەنىمەن, شىن مانىندە, بۇل سالانىڭ سالماعى ءزىل باتپان, ال جۇكتەيتىن جاۋاپكەرشىلىگى ودان دا زور. سوندىقتان بولسا كەرەك, تالابى تاۋداي, تالعامى تەرەڭ ونەردىڭ بۇل باعىتىنا باتىلى باراتىندار كوپ ەمەس. ال باعىڭ جانىپ كەلدىڭ ەكەن, قاتارداعى كوپتىڭ ءبىرى بولماي, جانارتاۋداي اتقىلاپ, ساحنادا جاڭالىق جاساي الاتىندار تىپتەن از. سول ازدىڭ وكىلى رەتىندە گۇلسينا ونەردەگى جولىن تابىستى باستادى. مامان مەكتەبىنىڭ بار اسىلىن بويىنا سىڭىرگەن بويجەتكەن مىنەز بەن تاباندىلىعىنىڭ ارقاسىندا رەجيسسۋراعا سونى ءىز سالعان الدىڭعى بۋىن اپالارى عايني حايرۋللينا مەن ءساليما تاسەمەنوۆادان كەيىنگى زاتى ايەل سۋرەتكەرلەر جولىن ابىرويمەن جالعاپ قانا قويماي, جاڭا عاسىر ساحناسىنا توسىن فورما, تىڭ ىزدەنىس اكەلگەن رەفورماتور رەجيسسەرگە اينالدى. ونىڭ ايقىن دالەلى – رەجيسسۋراداعى دەبيۋتى سەمەي قالاسى كورەرمەندەرىنە ارنالعان «ەرتەگى» اتتى قويىلىممەن باستالىپ, كەيىن ش.قۇسايىنوۆ اتىنداعى كوكشەتاۋ تەاترىنىڭ باس رەجيسسەرى رەتىندە قويعان «كونۆەيەر», ن.ۆ.گوگولدىڭ «رەۆيزور», س.احمادتىڭ «كەلىندەر كوتەرىلىسى» سپەكتاكلدەرىمەن ءساتتى جالعاسقان شىعارماشىلىق جول قازاق ونەرىنىڭ قايراتكەر تۇلعاسى نۇرنياز مۇحانوۆتىڭ شاقىرۋىمەن اقتاۋ قالاسىنا اۋىسادى. ن.ءجانتورين اتىنداعى ماڭعىستاۋ وبلىستىق مۋزىكالىق دراما تەاترىنداعى گۇلسينانىڭ رەجيسسەر عانا ەمەس, جاڭا تەاتردىڭ ىرگەسىن قالاعان باسشى, كوركەمدىك جەتەكشى رەتىندەگى قايراتكەرلىك ەڭبەگى بۇل باعىتتاعى باستامالارىن ءتىپتى ىرگەلەندىرە ءتۇستى. سوندىقتان دا ن.ءجانتورين تەاترىنىڭ ءجۇرىپ وتكەن جەڭىستى جولى مەن جەمىستى جىلدارىنىڭ تاسقا باسىلعان تاعىلىمدى تاريحى تىكەلەي گۇلسينا باقىتجانقىزىنىڭ ەسىمىمەن بايلانىستى ەكەنىن بۇگىندە ەشكىم جوققا شىعارا المايدى.
جانتورينشە جاڭعىرۋ
ءيا, وسىدان شيرەك عاسىر بۇرىن رەجيسسۋرانىڭ تابالدىرىعىن يمەنە اتتاپ, ءا دەگەننەن-اق تىڭ وي, باتىل كوزقاراسىمەن ونەردە توڭكەرىس جاساعان گۇلسينا ميرعاليەۆا ەسىمى بۇگىندە ەلىمىزدەگى ەڭ ۇزدىك رەجيسسەرلەردىڭ كوشىن باستايدى. سانانى سىلكىنتەر سپەكتاكل قويىپ قانا قويماي, وزىمەن قاتارلاسا تەاتردا ونەر جولىن باستاعان گۇل زياتوۆا, مەدعات ومىراليەۆ, رامازان اقتاەۆ, مايرا باقبەرديەۆا, انار بەيسەنبينا, ايدوس تاستاەۆ, ەركەبۇلان بەكەن سىندى ءبىر توپ كۋرستاسىمەن كەلىپ, سوناۋ ماڭعىستاۋدىڭ ماڭ دالاسىندا تەاتر اشىپ, تىڭنان تۇرەن سالعان گۇلسينانىڭ ەرەن ەڭبەگىن ەرلىك دەمەسەڭ, قيانات بولاتىنداي. ماڭعىستاۋ وبلىستىق مۋزىكالىق دراما تەاترىندا اشىلعاننان بەرى باس رەجيسسەر ءارى كوركەمدىك جەتەكشى, كەيىن ديرەكتورى قىزمەتىن ابىرويمەن اتقارىپ, ءجانتورين تەاترىن جاڭاشا جاڭعىرتقان رەجيسسۋرا رەفورماتورى اقتاۋ حالقىن كيەلى ساحنا ونەرىمەن تابىستىرۋدا تەڭدەسسىز ەڭبەك ءسىڭىردى. بۇل دا بىلە-بىلگەنگە مىنەزدى كىسىنىڭ ءىسى بولسا كەرەك.
«ن.ءجانتورين تەاترى ماعان ەڭ اۋەلى ەركىندىك سىيلادى. قاي جاعىنان دا. ويتكەنى شىعارماشىلىق ادامى, ونىڭ ىشىندە رەجيسسەر ءۇشىن ەركىندىكتىڭ ماڭىزى زور. جولىمنىڭ بولعانى سول, مەن 24 جاسىمنان كوركەمدىك جەتەكشىمىن. شىن قالاسام, بىرنەشە قويىلىمدى قاتار قويا الامىن. ال «قالاسام» دەگەن ءسوز – شىعارماشىلىق ادامىنا وتە كەرەك دۇنيە. سونىڭ ناتيجەسىندە ساحنالىق ءتۇرلى تاجىريبەگە باتىل بارىپ, شىعارماشىلىق ايدىنىندا ەركىن ءجۇزدىم دەپ ويلايمىن», دەدى رەجيسسەر ءومىرىنىڭ تەاتر اشۋ كەزەڭىنە توقتالىپ.
رەجيسسەر گۇلسينانىڭ تەاتردا عانا ەمەس, كينو سالاسىنداعى سۇرلەۋى دە تابىستى. وزەننىڭ قوس ساعاسىنداي قاتار جاساسقان تەاتر مەن كينو ونەرىن تەل ەمگەن تالانت كامەرا الدىندا دا ءوز مۇمكىندىگىن سىناپ كوردى. اتاپ ايتساق, گۇلسينا باقىتجانقىزى 2013 جىلى «كاۋسار» اتتى كوركەمفيلم ءتۇسىرىپ, ونىڭ الەمدىك پرەمەراسىن وڭتۇستىك كورەيانىڭ پۋسان قالاسىندا وتكىزدى. سونىمەن قاتار ءدال وسى جىلى رەسەيلىك كينورەجيسسەر ب.حۋدوينازاروۆتىڭ «تەڭىزدى كۇتۋ» فيلمىنە ءتۇسىپ, ءوز قارىمىن كينو اكتەرى رەتىندە دە بايقاپ كوردى. مۇنىڭ بارلىعى سۋرەتكەردىڭ قابىلەتىن ايقىنداپ قانا قويماي, شىعارماشىلىق تاجىريبەسىن بايىتقان تاماشا مەكتەپ تە بولعانى انىق. ال بۇگىندە استاناداعى كۇلاش بايسەيىتوۆا اتىنداعى قازاق ۇلتتىق ونەر ۋنيۆەرسيتەتىندە رەجيسسەرلىك ماماندىق بويىنشا ءتول شەبەرحاناسىن اشىپ, شاكىرت تاربيەلەپ جاتقانى – گۇلسينا ميرعاليەۆانىڭ ونەردىڭ بىرنەشە سالاسىنداعى قاتار ۇشتاعان تاجىريبەسىن ۇستاز-پەداگوگ رەتىندە شاكىرت بويىنا سىڭىرۋدە تابىستى قادام بولارى ءسوزسىز.
ساحنا ءھام ساناداعى سىلكىنىس
رەجيسسەردىڭ «مەنى» – ونىڭ قولتاڭباسى. قولتاڭباسى ايقىن, ويى ەركىن سۋرەتكەردىڭ قويىلىمى دا قىزىقتى. ءا دەگەننەن-اق وسى ءبىر ەرەكشەلىگىمەن ەلدى ەلەڭ ەتكىزگەن سۋرەتكەر نەبارى 20 جاسىندا كورنەكتى تەاتر سىنشىسى, مارقۇم اشىربەك سىعايدىڭ: «مىنا قىز تۇبىندە حالىق ءارتىسى» بولادى دەگەن سەنىمگە تولى اسا جوعارى باعاسىن دا الىپ ۇلگەرىپتى. البەتتە, ونداي ۇلكەن ءۇمىت قاتارداعى كەز كەلگەن ادامعا ايتىلا بەرمەسە كەرەك-ءتى.
شىعارماشىلىق قورجىنىنا كوز جۇگىرتسەك, وسى ۋاقىتقا دەيىن گۇلسينانىڭ رەجيسسەرلىك ساراپتاۋىندا ساحناعا جول تارتقان ءىرىلى-ۇساقتى جۇزدەن اسا سپەكتاكلدىڭ قاي-قايسىسى دا سانا بيىگىندە ءۇن قاتۋىمەن, تەرەڭدىك تۇڭعيىندا تولعانۋىمەن قۇندى, تابىستى. ماسەلەن, گۇلسينا ميرعاليەۆا ەسىمىن ونەر الەمىنە ايگىلەگەن تاجىريبەگە تولى قويىلىمدارىنىڭ قاتارىنا 2004 جىلى قويىلعان ا.قۇنانباي ۇلىنىڭ «38 نەمەسە قاراقۇرت» پەن كورەرمەن ساناسىنا قوزعاۋ سالعان م.اۋەزوۆتىڭ «قارالى سۇلۋى» مەن س.تسۆەيكتىڭ «اموك» نوۆەللاسىنىڭ نەگىزىندە تۇزىلگەن ء«زىلزالا» سپەكتاكلدەرىن جاتقىزۋعا بولادى. اتالعان تۋىندىلار سول كەزدىڭ وزىندە تەاتر الەمىنە ۇلكەن جاڭالىق بولىپ ەندى. ونداعى ايتىلعان ماسەلەلەر ءالى كۇنگە دەيىن وزەكتىلىگىن جويعان جوق. جاڭالىققا جانى قۇشتار رەجيسسەردىڭ ساحنا كورگەن قويىلىمدارىنىڭ قاي-قايسىسى دا وزگەشە ويلاۋ ورنەگىمەن, ءومىردى باسقاشا ساراپتاۋ ادەبىمەن, ساحنالىق تىڭ فورما تابۋ مانەرىمەن, باستىسى ىشكى مىنەز ەركىندىگىمەن ەرەكشەلەنىپ تۇرادى. ول «مىنا قويىلىمىمدى حالىق قابىلداماي قويادى-اۋ» دەگەن ۇرەيدەن ادا. سوندىقتان دا ەشقاشان كورەرمەن تالعامىنا بەيىمدەلۋگە ەمەس, كەرىسىنشە ولاردى ءوز پاراسات بيىگىندە تولعانتۋعا قۇشتار.
«قاراقۇرت» – كوڭىلىم تولاتىن سپەكتاكلىمنىڭ ءبىرى. ونى ابايدىڭ وتىز سەگىزىنشى قاراسوزىنىڭ جەلىسىمەن قايتا جازىپ شىقتىم. وسىلايشا, اباي الەمىنە وزگەشە كوزقاراس تۇرعىسىنان ۇڭىلگىم كەلدى. راس, مەنى ءداستۇرلى نەمەسە مودەرنيست رەجيسسەر دەۋگە كەلمەيتىن شىعار. سيمۆوليكانى «سويلەتەدى» دەۋ دە قيسىنعا قايشى بولار. ونى ماماندار ايتا جاتار. الايدا قازان قالاسىندا وتكەن تۇركى حالىقتارىنىڭ «ناۋرىز» تەاترلار فەستۆالىندە وسى «تسۋنامي», «قاراقۇرت» سپەكتاكلدەرىن رەسەيدەن بولەك, يتاليا, يسپانيا, يزرايلدەن كەلگەن تەاتر سىنشىلارى مەن رەجيسسەرلەرى قىزىعا تاماشالاپ, قويىلىمعا «پوستمودەرنيزمنىڭ ۇزدىك ۇلگىسى» دەپ باعا بەردى. ارينە, بۇل جاستاۋ كەزىمدە قويىلعان سپەكتاكل عوي. قازىر مەن ابايدى مۇلدەم باسقاشا كورەمىن», دەيدى رەجيسسەردىڭ ءوزى ساحناداعى تاجىريبەلەرى تۋراسىندا تولعانىپ.
گۇلسينانىڭ سۋرەتكەر رەتىندەگى تاعى ءبىر ەرەكشەلىگى – دايىن دراماتۋرگيادان بولەك, ءوز قيالىنىڭ جەتەگىندە ءتۇرلى ينستسەنيروۆكالارعا دا باتىل بارا الاتىندىعى. جوعارىدا اتاپ وتكەن قويىلىمدار ءسوزىمىزدىڭ ايقىن دالەلى. جىلدارمەن بىرگە كەمەلىنە كەلىپ, رۋحاني تولىسقان رەجيسسەر كەيىنگى جىلدارى دا ادام جانىنىڭ تەرەڭىنە ءۇڭىلىپ, ىشكى پسيحولوگيالىق قالتارىستارىن جان-جاقتى قامتيتىن تىڭ تاجىريبەلىك ىزدەنىستەرگە باتىل بارىپ ءجۇر. سونىڭ ءبىرى – جاقىندا ق.قۋانىشباەۆ اتىنداعى قازاق ۇلتتىق مۋزىكالىق دراما تەاترى ساحناسىندا قويىلعان جازۋشى تولەن ابدىكتىڭ «پاراسات مايدانى» پسيحولوگيالىق دراماسى. ايتۋلى قويىلىمدى رەجيسسەردىڭ جالپىادامزاتتىق قۇندىلىقتاردان تامىر تارتقان ەستەتيكالىق-تولتۋمالىق لابوراتورياسىنىڭ ورىستەۋ ۇدەرىسىنىڭ ءبىر بەلەسى دەپ باعالاساق, ارتىق ەمەس. ادام مىنەزىنىڭ ءتۇرلى قالتارىسىن تەرەڭنەن ءھام ءجىتى زەردەلەگەن پسيحولوگيالىق تۋىندى كورۋشىسىنەن دە قىراعىلىق پەن سەرگەكتىكتى تالاپ ەتەدى. ويتكەنى «پاراسات مايدانى» — ادامنىڭ رۋحاني بيىگىنە جەتۋ جولىنداعى كۇرەسىن بەينەلەيتىن, كورەرمەندى ويلاندىراتىن, ءومىردىڭ شىنايى ءمانىن ىزدەۋگە جەتەلەيتىن قويىلىم. اسىرەسە ساحنا كورگەن تۋىندىنىڭ تابيعاتىن تەرەڭ تانىپ, قۇندىلىعىن ۇعىپ, قايماعىن قالقۋ ءۇشىن دە پاراساتتىلىق اۋاداي قاجەت. سپەكتاكلدىڭ نەگىزگى وزەگى — ادامنىڭ ءوز-وزىمەن كۇرەسى, قوعامداعى مورالدىق قۇندىلىقتاردىڭ جوعالۋى ءھام اقيقات تەرەڭىنە ءۇڭىلۋ. ال باستى كەيىپكەر — جالعىزدىق پەن ىشكى قايشىلىقتىڭ قۇربانىنا اينالعان جان. ول ادامدار اراسىنداعى ادىلەتسىزدىككە قارسى ءۇن قاتىپ, قوعامنىڭ قاتال جۇيەسىنە قارسى تۇرۋعا تىرىسادى. سول ارقىلى كورەرمەنىن رۋحاني قۇندىلىقتار مەن ماتەريالدىق الەمنىڭ قايشىلىقتارى, ادام بولمىسىنىڭ كۇردەلىلىگى, جاقسىلىق پەن جاماندىقتىڭ اراجىگىن اجىراتۋ ماسەلەلەرى تۋراسىندا ويلاندىرادى.
ساناسى سەرگەك سۋرەتكەر
جالپى, گۇلسينا باقىتجانقىزىنىڭ قاي قويىلىمى دا جاڭاشىل شەشىم, تىڭ ساراپتاۋ, باستىسى ادام جانىنىڭ نازىك ءتىنىن قوزعاۋىمەن قۇندى. م.اۋەزوۆتىڭ «جەتىم», «قاراگوز», ع.مۇسىرەپوۆتىڭ «قوزى كورپەش – بايان سۇلۋ», ۋ.شەكسپيردىڭ «گاملەت», ءا.كەكىلباەۆتىڭ «ابىلاي حان», «كۇي», ت.ءالىپبايدىڭ «توميريس», م.بايدجيەۆتىڭ «ىزدەدىم سەنى», س.قۇدايبەرگەنوۆتىڭ «پەرزەنتحانا», ا.كاميۋدىڭ «كاليگۋلا», ن.ساۋدانبەك ۇلىنىڭ ء«اليحاننىڭ اماناتى», ا.چەحوۆتىڭ «شاعالا» سىندى تۋىندىلارى ساناسى سەرگەك, تالعامى بيىك كورەرمەنىن قاشاندا پاراسات بيىگىندە تولعانتىپ كەلەدى. ال اتالعان شىعارمالاردىڭ تىزىمىنە كوز جۇگىرتىپ ءوتۋدىڭ ءوزى-اق رەجيسسەردىڭ تانىم مەن تالاعامى ۇلتتىق كلاسسيكا مەن الەمدىك جاۋھارلاردى قاتار سويلەتۋمەن قاتار, زاماناۋي دراماتۋرگتەردىڭ ەڭبەگىن نازاردان تىس قالدىرماي, قاي جانردا دا ەركىن كوسىلەتىندىگىنىڭ ايقىن كورىنىسى بولسا كەرەك. ولاردىڭ ارقايسىسىندا گۇلسينا باقىتجانقىزىنىڭ ونەرگە دەگەن شەكسىز سۇيىسپەنشىلىگى مەن تەرەڭنەن تولعايتىن فيلوسوفيالىق دۇنيەتانىمى, ادام تاعدىرىنا بەيجاي قارامايتىن سەزىمتال سۋرەتكەرلىك پايىم-تۇسىنىگى سايراپ جاتىر.
ىرگەسىن قالاپ قانا قويماي, شيرەك عاسىر تابان اۋدارماي ەڭبەك ەتكەن ن.ءجانتورين اتىنداعى ماڭعىستاۋ وبلىستىق دراما تەاترىنداعى جۇمىسىن تابىستى تۇيىندەپ, ساحنا ونەرىن جاڭا بەلەسكە كوتەرگەن رەجيسسەر بىلتىر باس قالامىزدىڭ تورىندەگى ق.قۋانىشباەۆ اتىنداعى قازاق ۇلتتىق مۋزىكالىق دراما تەاترىنا كوركەمدىك جەتەكشى بولىپ تاعايىندالدى. كانىگى كاسىبي مامانداردىڭ باسىن تۇيىستىرگەن تالانتتى ورتاعا كەلگەن كۇنىنەن باستاپ تەاتر ىشىنە جاڭا تىنىس سىيلاعان سۋرەتكەر «قاراگوز», «پاراسات مايدانى» سىندى ويلى قويىلىمدارىمەن ەلوردالىق كورەرمەننىڭ دە جۇرەگىن جاۋلاپ ۇلگەردى. قاراپايىمدىلىعى مەن قاتالدىعى, مىنەزى مەن مارتتىگى, ەركەلىگى مەن ەركىندىگى ءبىر بويىندا قاتار توعىسقان ونەر يەسىنىڭ الداعى ىزدەنىستەرى دە ىرگەلى بولارىنا سەنەمىز. بار ءومىرىن ونەرگە ارناعان رەجيسسەر ءسوز سوڭىندا: «مەنىڭ ىشىمدە ءوز گارمونيام بار. ونەرىمدە بارلىق ءومىرىم ورىلگەن. قازاق بولىپ تۋىپ, قازاق ونەرىنە قىزمەت ەتىپ كەلە جاتقانىم ءۇشىن ءوزىمدى شەكسىز باقىتتى سانايمىن», دەپ ءسوزىن تۇيىندەدى. بۇل ءتىپتى دە جالعان ۇران ەمەس, سۋرەتكەردىڭ جان ءسوزى, شىن سەزىمى ەدى. ويلى جانارىمەن الىسقا كوز تىككەن رەجيسسەردىڭ دەمىنەن دە ونەرگە دەگەن سول ادالدىعى مەن شەكسىز ماحابباتى ايقىن سەزىلىپ تۇردى.
سانالى عۇمىرىن تەاتر باعىنىڭ بابىن تابۋعا ارناعان سۋرەتكەر ەڭبەگى كەلەشەكتە ىرگەلى زەرتتەۋلەرگە سۇرانىپ تۇر. ال تاقىر جەردەن تەاتر اشىپ, ونى ەلىمىزدىڭ ەڭ ۇزدىك تەاترلارى قاتارىنا قوسقان ازاماتقا بەرگىسىز ەرلىگى بويىنداعى مىنەز بەن رۋحاني مىقتىلىعىنىڭ كورىنىسى بولسا كەرەك. ءسوزسىز, بۇل – گۇلسينانىڭ ءوز قولىمەن باپتاپ, بايىتقان گۇل باعىنىڭ ماۋەلى جەمىسى.
