ادەبيەت مەكتەبى – ەلىمىزدەگى تۇڭعىش اۆتورلىق جوبا. ماسەلەن, وقۋ-اعارتۋ مينيسترلىگىنىڭ تاپسىرماسى اياسىندا وقۋشىلار اراسىندا ۇلتتىڭ يمۋنيتەتىن كوتەرۋ ماقساتىندا قازاق ادەبيەتىنىڭ الىپتارىنا ارنالعان رەسپۋبليكالىق ءتۇرلى جارىس وتەدى. بۇل قاتاردا «اباي», «ماحامبەت», «ماعجان», ء«ىلياس» وقۋلارى بار. وسىنداي بايقاۋلارعا ەلىمىزدەگى ءار مەكتەپ قاتىسۋعا مىندەتتى. سوندىقتان قازاق ءتىلى مەن ادەبيەتى ءپانىنىڭ ماماندارى جانۇشىرا شاكىرت ىزدەيدى. بىلايشا ايتقاندا, جوقتان بار جاسايدى. ءتىپتى كەيبىرى ولەڭ مەن ەسسەسىن ءوزى جازىپ بەرىپ, بولماسا بىرەۋگە اقى تولەپ جازدىرىپ الىپ, وقۋشىنى قاتىستىرادى. مۇندايدا قازاقتىڭ «جەتەلەپ قوسقان تازى تۇلكى المايدى» دەگەن ماتەلى ەسكە تۇسەدى. ونىڭ ۇستىنە ۇستازدىڭ ءوزى ولەڭ-جىردىڭ قۇرىلىمىن بىلمەگەندىكتەن, ونى بىرەۋگە ۇيرەتەمىن دەۋى دە بوس اۋرەشىلىك. سوندىقتان جەتىسۋ وبلىسى اكىمدىگىنىڭ قولداۋىمەن ەلىمىزدە تۇڭعىش رەت اشىلعان «ميزام» جىلجىمالى ادەبيەت مەكتەبىنىڭ ماڭىزى زور. اتالعان جوبا اياسىندا بىلىكتى قالامگەرلەر اۋىل-اۋىلداردى ارالاپ, شىعارماشىلىققا قۇشتار جاستارعا ساباق بەرەدى.
«ادەبيەت مەكتەبى شىعارماشىلىقتىڭ جەتى باعىتى بويىنشا جۇمىس ىستەيدى. اۋەلى جاس قالامگەرلەردى ولەڭ, شاعىن اڭگىمە, ماقالا, ەسسە, شىعارما جازۋعا ماشىقتاندىرادى. پوەزيا, پروزا جانرىندا قالام تەربەگەن جەتىسۋلىق اقىن-جازۋشىلاردىڭ ەڭبەگىن ناسيحاتتاي وتىرىپ, جەكە جازۋ ءستيلىن قالىپتاستىرادى. جاس قالامگەرلەردى مەملەكەتتىك مەرەكەلەر مەن اتاۋلى كۇندەردە بىرلەسە جۇمىس ىستەۋگە تارتا وتىرىپ, ولاردىڭ بويىنداعى وتانسۇيگىشتىك قاسيەتتەرىن وياتۋعا كۇش سالادى», دەيدى جوبا لەكتورى, اقىن جۇماتاي امىرەەۆ.
ادەبيەت مەكتەبىنە وبلىستاعى شىعارماشىلىققا قىزىعۋشىلىعى بار 6–10 سىنىپ ارالىعىنداعى وقۋشىلار قاتىسا الادى. كوشپەلى مەكتەپ وبلىس قالالارىن قوسا ەسەپتەگەندە ءار اۋدان ورتالىعىندا ءبىر اپتا ساباق وتكىزەدى. وقۋ كۋرسىندا وقۋشىلار جازۋ مانەرى مەن وقۋ ادەبى باعىتىندا ەكىگە ءبولىنىپ, تالىمگەرلەرمەن بىرلەسە جۇمىس ىستەيدى. ساباق بارىسىندا ۇزدىك ناتيجە كورسەتكەن وقۋشىلار اقتىق سىنعا ارنالعان شىعارماشىلىق بايقاۋعا جولداما الادى.
«مۇندا اۋىلداعى ادەبيەتكە اۋەس وقۋشىلار اقىن-جازۋشىلاردى تالدىقورعانعا ىزدەپ كەلمەيدى, كەرىسىنشە, وڭىردەگى تانىمال قالامگەرلەر اۋىلدا جۇرگەن تالانتتاردى وزدەرى ىزدەپ بارادى. ادەبيەت مەكتەبىنە ءار اۋداننان 20 وقۋشى قابىلدانادى. ولارعا كۋرستى تولىق اياقتاعانى تۋرالى سەرتيفيكات تابىستالادى. جالپى, وبلىستا 8 اۋدان, 2 قالانى قوسقاندا 200 بالانى وقىتۋدى جوسپارلاپ وتىرمىز. ساباق بارىسىندا ۇزدىك ناتيجە كورسەتكەن وقۋشىلارعا وبلىس اكىمدىگىنىڭ ارنايى سىيلىعى بار», دەيدى مادەنيەت, ارحيۆتەر جانە قۇجاتتاما باسقارماسىنىڭ باسشىسى قۋانىش سۇلەيمەنوۆ.
ادەبيەت الەمىنە قادام باسقان جاستاردىڭ جولىن تۋرالاپ, قالامىن ۇشتاپ, باعىتىن بەلگىلەپ بەرۋ كوپ جىلدان بەرى ەسكەرىلمەي كەلە جاتقان دۇنيە. مەكتەپ جاسىندا جازۋشى, نەمەسە اقىن بولۋدى ارمانداعان تالاي بالا ءجون سىلتەر ۇستاز بولماعان سوڭ ومىردەگى جولىن باسقا جاقتان تاۋىپ كەتتى. ەندى وسى ولقىلىقتىڭ ورنىن تولتىرۋدا «ميزام» ادەبي مەكتەبى ىسكە كىرىسپەك.
«جىلدا وبلىستىق «دارىن» ورتالىعى قازاق ادەبيەتىنىڭ تالانتتى وكىلدەرىنە ارناپ بايقاۋلار ۇيىمداستىرادى. اۋدانعا ارنايى حات جولداپ, اۋىل-اۋىلداردان ىرىكتەپ ءار اتالىم بويىنشا ءبىر-ءبىر وقۋشىدان اكەلۋدى تاپسىرادى. وبلىستان بەرىلگەن تاپسىرما بولعاندىقتان ءارى جاس دارىنداردى انىقتاۋعا جول اشاتىندىقتان اۋداندىق ءبىلىم ءبولىمى وقۋشى دايىنداۋدى مەكتەپ اكىمشىلىگىنە جۇكتەيدى. ارينە, شىعارماشىلىققا بەيىم وقۋشىلار جوق دەي المايمىز, بىراق ولارعا باعىت-باعدار بەرەتىن سول سالانىڭ جەتەكشى مامانى جەتىسپەيدى», دەيدى قازاق ءتىلى مەن ادەبيەتى ءپانىنىڭ مۇعالىمى راۋان مىرزاحمەت.
ايتا كەتەيىك, ودان بولەك ۇزدىك وقۋشىلار اراسىندا بايقاۋ الدىندا نەگىزگى تالىمگەرلەردەن بولەك, ەلگە تانىمال, بەلسەندى اقىن-جازۋشىلار قوناق دارىسكەر رەتىندە شەبەرلىك ساعاتىن وتكىزەتىن بولادى.
جەتىسۋ وبلىسى
