قر سۋ رەسۋرستارىنىڭ جانە يرريگاتسيا مينيسترلىگىنىڭ رەسمي وكىلى ءمولدىر ابدۋاليەۆانىڭ ايتۋىنشا, ناۋرىز ايىنىڭ سوڭىنا دەيىن ارالعا تاعى 1,6 ملرد تەكشە مەتر سۋ جىبەرىلەدى.
«سولتۇستىك ارال تەڭىزىن تولتىرۋ جانە ونى قالپىنا كەلتىرۋ جۇمىسى جالعاسىپ جاتىر. وتكەن جىلدىڭ قازانىنان باستاپ وسى جىلدىڭ قاڭتارىنا دەيىن سولتۇستىك ارالعا 1 ملرد تەكشە مەتردەن استام سۋ جىبەرىلدى. بۇل وسىعان دەيىن جوسپارلانعان كولەمنەن 100 ملن تەكشە مەترگە ارتىق», دەدى ول وكق الاڭىندا.
رەسمي وكىل ەل اراسىنداعى «سولتۇستىك ارال سۋ تاسقىنىنان نە جاڭبىر ەسەبىنەن تولىپ جاتىر» دەگەن پىكىردىڭ قاتە ەكەنىن اتاپ ءوتتى. سەبەبى ەلىمىزدىڭ وڭتۇستىك وڭىرىندە ايتارلىقتاي سۋ تاسقىنى بولماعان. ارالعا سۋ جىبەرۋ – سۋ رەسۋرستارىن ۇنەمدەۋدىڭ جانە سۋ ديپلوماتياسىنىڭ ناقتى ناتيجەسى.
«ورتالىق ازياداعى ارىپتەستەرمەن جاسالعان كەلىسىمدەردىڭ ارقاسىندا كەلە جاتقان ناۋرىز ايىنىڭ سوڭىنا دەيىن تاعى 1,6 ملرد تەكشە مەتر سۋ جىبەرىلەدى. قازىر سولتۇستىك ارالداعى سۋدىڭ جالپى كولەمى 22 ملرد تەكشە مەتر-دەن اسادى. ءوسۋ ديناميكاسىن سالىستىرار بولساق, 2022 جىلدىڭ باسىندا بۇل كورسەتكىش 18,9 ملرد تەكشە مەتر بولعان. وسى جىلدىڭ سوڭىنا دەيىن تەڭىزدەگى سۋ مولشەرى 23,4 ملرد تەكشە مەترگە جەتەدى دەپ كۇتىلۋدە. ال 2030 جىلدىڭ سوڭىنا دەيىن سۋ مولشەرىن 27 ملرد تەكشە مەترگە جەتكىزۋ جوسپارلانىپ وتىر», دەدى ءمولدىر ابدۋاليەۆا.
ايتا كەتەيىك, سولتۇستىك ارالدى ساقتاۋ جوباسىنىڭ العاشقى كەزەڭىنىڭ ناتيجەسىندە تەڭىزدەگى سۋ 42%-عا ۇلعايدى.
