بىلتىر 27 جەلتوقساندا قر پرەزيدەنتىنىڭ بۇيرىعىمەن زاڭناماعا وزگەرتۋلەر مەن تولىقتىرۋلار ەنگىزىلدى. بۇل زاڭ 2025 جىلى 3 ناۋرىزدا زاڭدى كۇشىنە ەنەدى.
قىلمىستىق كودەكستىڭ 297 جانە 297-1-باپتارىنا سايكەس قازىر سلەنگكە اينالعان "زاكلادچيكتەرگە" قاتىستى سانكتسيا تومەندەدى. 297-باپتا كوزدەلگەن جاۋاپكەرشىلىكتەر 3 تارماققا بولىنەدى. ءىىم ەسىرتكى قىلمىسىنا قارسى ءىس-قيمىل كوميتەتىنىڭ اسا ماڭىزدى ىستەر جونىندەگى اعا جەدەل ۋاكىلى مەدەتبەك سماعۇلوۆ تارقاتىپ ايتتى.
– ءبىرىنشى تارماعىنا سايكەس, ەگەر تاسىمالدانعان ەسىرتكىنىڭ كولەمى 50 گر دەيىن – ماريحۋانا, 5 گر دەيىن – گاشيش, 0,02 گر دەيىن – مەفەدرون, 0,01 گر دەيىن – الفا-PVP بولاتىن بولسا, بۇل از مولشەردەگى ەسىرتكى دەپ تانىلىپ, 5 جىلدان 8 جىلعا دەيىن باس بوستاندىعىنان ايىرۋ كوزدەلەدى.
ەكىنشى تارماعى بويىنشا 6 جىلدان 10 جىلعا دەيىن باس بوستاندىعىنان ايىرىلادى. كورسەتكىشتەرگە توقتالساق, ماريحۋانا – 1 كەلىگە دەيىن, گاشيش – 200 گر دەيىن, مەفەدرون – 1,5 كەلىگە دەيىن, الفا-PVP – 1 كەلىگە دەيىن. بۇل ءىرى مولشەردەگى ەسىرتكى تاسىمالداۋ دەپ ەسەپتەلەدى.
ءۇشىنشى كەزەڭى – اسا ءىرى مولشەردە ەسىرتكى تاسىمالداۋ دەپ اتالادى. بۇل تارماققا سايكەس ماريحۋانا – 1,5 كەلىدەن, گاشيش – 200 گرامنان, مەفەدرون 1,5 كەلىدەن, الفا-PVP – 1 كەلىدەن جوعارى بولسا, 7 جىلدان 12 جىلعا دەيىن باس بوستاندىعىنان ايىرۋ شارالارى كوزدەلگەن, – دەدى ول.
سانكتسيالار بۇرىنعىسىمەن سالىستىرعاندا تومەندەتىلگەن.
ال, ەسىرتكى جاساۋشىلار مەن لاۋازىمدى تۇلعالارعا بەرىلەتىن جازا كەرىسىنشە قاتاڭدايدى. ولار 15 جىلدان 20 جىلعا دەيىن نەمەسە ءومىر بويىنا باس بوستاندىعىنان ايىرىلۋى مۇمكىن.
وعان قوسا, بۇعان دەيىن ەسىرتكىگە قاتىستى قىلمىس جاساپ, قازىر تۇرمەدە وتىرعاندار دا جاڭا زاڭعا سايكەس جازاسىن جەڭىلدەتە الادى.
– قازاقستاندا ەسىرتكىگە قاتىستى 4 مىڭنان استام سوتتالعان ادام بار. ونىڭ 255-ءى – ايەل, 9-ى – كامەلەتكە تولماعان بالا. ولار جەڭىلدەتىلگەن سانكتسياداعى نورمالاردى قولدانا الادى. قر قىلمىستىق كودەكسىنىڭ 6-بابىنا سايكەس, اتالعان نورما زاڭدى كۇشىنە ەنگەننەن كەيىن قىلمىسكەر وتىرعان اكىمشىلىك نەمەسە جازاسىن وتەۋشىنىڭ ءوزى سوتقا ءىسىن قايتا قاراۋ تۋرالى ارىز جازا الادى. سوت ارىزدى العان سوڭ 1 اي ىشىندە ءىستى قارايدى. ستاتيستيكاعا سايكەس, مىڭنان اسا جازاسىن وتەۋشى وسى نورمانى پايدالانىپ سوتقا ارىز بەرۋ قۇقىنا يە, – دەيدى مەدەتبەك سماعۇلوۆ.
