فوتو: قر تجم
توتەنشە جاعداي مينيسترلىگى توتەنشە جاعدايلاردىڭ الدىن الۋ كوميتەتى توراعاسىنىڭ مىندەتىن اتقارۋشى اسەت جىلقايداروۆ ورتالىق مەملەكەتتىك, جەرگىلىكتى اتقارۋشى ورگاندارمەن بىرلەسە اتقارىلىپ جاتقان سۋ تاسقىنىنا دايىندىق بارىسىن باياندادى. سپيكەر تاسقىن قاۋپى ەلىمىزدەگى 1 223 ەلدى مەكەنگە ءتونۋى مۇمكىن ەكەنىن اتاپ ءوتتى. قىزىل سۋعا قارسى 576 شاقىرىم قورعانىش بوگەنى مەن بىلىكتەرى تۇرعىزىلدى. 822 شاقىرىمدىق درەناج جۇيەسى, توعاندار مەن ارىق ارنالارى تازارتىلىپ, بىتەلگەن كوزدەرى اشىلدى. اۆتوموبيل, تەمىرجول بويلارىندا 960 سۋاعار سالىندى.
– 74 وزەننىڭ بويىنداعى قاۋىپتى ۋچاسكەلەرىنىڭ 500 شاقىرىمعا جۋىق بولىگىنىڭ ارناسىن كەڭەيتىپ, تابانىن تەرەڭدەتۋ, جاعالاۋدى مىعىمداۋ جۇمىسى قولعا الىندى. تاسقىن كەزىندە زارداپ شەككەندەردى قابىلداۋعا 3,5 مىڭنان اسا پۋنكت دايىندالدى. سۋ تاسقىنىنا جەدەل قامدانۋعا 37 مىڭنان اسا ادام قامتىلىپ, 13 مىڭنان اسا تەحنيكا, 4 096 سۋ ايداۋ, 640 ءجۇزۋ قۇرالدارى بار ازاماتتىق قورعاۋ قىزمەتتەرى قۇرىلدى. ازاماتتىق قورعانىستىڭ اسكەري بولىمدەرىنىڭ دە دايىندىعى جوعارى, قۇتقارۋ اۆياتسياسى جەدەل كەزەكشىلىك اتقارىپ وتىر, – دەدى ءا.جىلقايداروۆ.
سۋ تاسقىنىنا قارسى شتاب تاۋلىك بويى جۇمىس ىستەيدى. مەملەكەتتىك ورگاندار, اتاپ ايتقاندا, ىشكى ىستەر, قورعانىس مينيسترلىكتەرى, ۇلتتىق ۇلان, «قازگيدرومەت», «قازسۋشار», «قازاۆتوجول» ماماندارى جۇمىلدىرىلعان شتاب ءار وڭىردە بار. سونىمەن قاتار كوماندالىق-شتابتىق ماشينالار بازاسىندا توتەنشە جاعدايلار تۋىنداۋى مۇمكىن ايماقتاردان ناقتى اقپارات بەرۋ ءۇشىن جەدەل باسقارۋ توپتارى قۇرىلدى. وڭتۇستىك, باتىس وڭىرلەردىڭ سۋ تاسقىنى ءتونۋى مۇمكىن ۋچاسكەلەرىندە بەكەتتەر قويىلدى. ولار تاۋلىك بويى قالىپتاسقان جاعداي تۋرالى اقپاراتتى حابارلاپ وتىرادى.
«قازگيدرومەت» ماماندارىنىڭ الدىن الا بولجاۋىنشا, ەلىمىزدىڭ 9 وڭىرىندە (اقتوبە, اباي, اقمولا, شقو, بقو, قاراعاندى, ۇلىتاۋ, سقو, قوستاناي وبلىستارى) كوكتەمدە سۋ باسۋ قاۋپى جوعارى. «اپات ايتىپ كەلمەيدى», سپيكەر جالپى كۇشتەر مەن قۇرالدار دايىن ەكەنىن اتاپ ءوتتى, توتەنشە جاعدايعا بايلانىستى قاۋىپتى وڭىرلەرگە كۇشتەر مەن قۇرالداردى جەتكىزۋ, حالىقتى ەۆاكۋاتسيالاۋ, سونداي-اق اۆاريالىق-قۇتقارۋ جۇمىستارىن جۇرگىزۋ جونىندە ءتيىستى شەشىم قابىلداناتىنىن ءمالىم ەتتى.
