«ەڭ ماڭىزدىسى – بۇزىلعان مۇنارانىڭ ءوزى ەمەس, قايتا قالپىنا كەلتىرۋ كەزىندە قولدانىلعان ماتەريالدار. قازىرگى تاڭدا تاريحي كورىنىسىن ساقتاپ تۇر. ەگەر قايتا قالپىنا كەلتىرۋ تۋرالى شەشىم قابىلدانسا, عىلىمي-رەستاۆراتسيالىق جۇمىستار ءتيىستى ليتسەنزياسى, بىلىكتىلىگى جانە تاجىريبەسى بار ۇيىممەن ورىندالادى. ەلىمىزدىڭ زاڭناماسىنا سايكەس, ەسكەرتكىش تەك تولىق فيزيكالىق جويىلعان جاعدايدا عانا تاريحي-مادەني قۇندىلىق مارتەبەسىنەن ايىرىلادى. وسىعان بايلانىستى, «اقبيكەش» مۇناراسى رەسپۋبليكالىق ماڭىزى بار تاريح جانە مادەنيەت ەسكەرتكىشى مارتەبەسىن ساقتاپ قالادى», دەدى جانات سەيدالىقىزى.
ال «قازقايتاجاڭارتۋ» رمك ديرەكتورى الماس ابديەۆ قايتا قالپىنا كەلتىرۋ جۇمىستارى بويىنشا شەشىم مامانداردىڭ پىكىرىن ەسكەرە وتىرىپ قابىلداناتىنىن ايتتى. «2020 جىلعا دەيىن مۇنارانىڭ ساقتالۋ دەڭگەيى 5-6 مەتر بيىكتىكتە بولعان. عىلىمي-رەستاۆراتسيالىق جۇمىستار كۇننىڭ سۋىعىندا جۇرگىزىلگەندىكتەن, اۋا رايىنىڭ قولايسىزدىعى جاڭا جانە بۇرىنعى ماتەريالداردىڭ بىرىگۋ پروتسەسىنە كەرى اسەرىن تيگىزدى», دەدى الماس ابديەۆ.
اقسۇمبە اۋىلىنان باتىسقا قاراي 1 شاقىرىم جەردە بيىك جوتا باسىندا ورنالاسقان تاريحي نىسان 2019 جىلى رەسپۋبليكالىق ماڭىزى بار تاريح جانە مادەنيەت ەسكەرتكىشتەرىنىڭ تىزىمىنە ەنگىزىلگەن. مۇناراعا 2020 جىلى العاش رەت رەسپۋبليكالىق بيۋدجەت ەسەبىنەن قر مادەنيەت جانە سپورت مينيسترلىگىنىڭ تاپسىرىسىمەن «قازقايتاجاڭارتۋ» رمك تاراپىنان عىلىمي-رەستاۆراتسيالىق جۇمىستار جۇرگىزىلگەن بولاتىن.
