فوتو: gov.kz
قازىر سۋ تاسقىنىنىڭ الدىن الۋ قامى جاسالىپ جاتىر. وسى كەزگە دەيىن سوعىلعان بوگەتتەر رەكونسترۋكتسيالانىپ, قالىپقا كەلتىرىلگەن. قاجەتتى قارجى قاراستىرىلعان. ماتەريالدىق-تەحنيكالىق رەزەرۆتەر تولىق جيناقتالىپ تۇر.
«جول ينفراقۇرىلىمىن قالىپقا كەلتىرۋ اياسىندا ۇكىمەتتىك رەزەرۆ قارجىسى مەن جەرگىلىكتى بيۋدجەت ەسەبىنەن 30 شاقىرىم جول جوندەلىپ, 4 كوپىر قالپىنا كەلتىرىلدى. جول بويىندا 13 مال وتكەلى سالىنىپ, بۇرىن سۋ شايىپ كەتكەن 49 ۋچاسكەگە سۋ وتكىزۋ قۇبىرلارى قوندىرىلدى», دەدى سەرىك شاپكەنوۆ.
اكىمنىڭ دەرەگىنە سۇيەنسەك, سۋ تاسقىنىنا قارسى شارالار اياسىندا جىلىوي اۋدانىنداعى جەم وزەنى مەن قۇرساي ارناسىنىڭ ءتۇبىن تەرەڭدەتۋ جالعاسىپ جاتىر. جوباعا سايكەس 95 شاقىرىم ءتۇپتىڭ 80,3 شاقىرىمى تەرەڭدەتىلگەن.
«جوسپارلانعان 61 شاقىرىم بوگەتتىڭ 29 شاقىرىمى سوعىلدى. قىزىلقوعا اۋدانىنىڭ 9 اۋىلدىق وكرۋگى مەن 5 ەلدى مەكەنىندە 41,9 شاقىرىم بوگەت نىعايتىلىپ جاتىر. يندەر اۋدانىندا قولدانىستاعى 34,5 شاقىرىمدىق بوگەتتىڭ قورعانىستىق قۇرىلىستارى كۇشەيتىلدى. ماحامبەت اۋدانىندا 105 شاقىرىم بوگەت سالىندى. بيىل قوسىمشا 29,9 شاقىرىم بوگەت نىعايتىلىپ, 12,4 شاقىرىم جاڭا بوگەت تۇرعىزىلادى», دەپ مالىمدەدى سەرىك شاپكەنوۆ.
