سۋرەتتەر پاۆلودار وبلىسى ءتوتەنشە جاعدايلار دەپارتامەنتىنەن الىندى.
«وتكەلدەردەگى مۇزدىڭ قالىڭدىعى 40-تان 70 سانتيمەترگە دەيىن جەتەدى. ىشكى ىستەر مينيسترلىگىنىڭ 2015 جىلعى 19 قاڭتارداعى №34 بۇيرىعىنا سايكەس, مۇزدىڭ قالىڭدىعى 25 سانتيمەتردەن اسسا, اۆتوكولىكتەردىڭ وتۋىنە, 10 سانتيمەتردەن اسسا, جاياۋ ادامنىڭ جۇرۋىنە رۇقسات بەرىلەدى. بىراق بۇيرىقتا وتكەلدەردەن تۇسەتىن جەرلەردە ەكى جاقتان دا ورناتىلعان قالقانداردا ارنايى قىسقى قۇرال-جابدىقتار (ىلگەكتەر, ساتىلار, قۇتقارۋ شەڭبەرلەرى, بورەنەلەر) قويىلۋى كەرەكتىگى ەسكەرتىلگەن. بۇعان قوسا كىرەبەرىستەردە وتكەلدىڭ اتاۋى, جۇمىس ۋاقىتى, ونى قۇرۋ مەن ۇستاۋعا جاۋاپتىلاردىڭ دەرەكتەرى كورسەتىلگەن ماڭدايشالار ورناتىلادى. ءارى ول جەردەگى مۇزدىڭ قالىڭدىعى كۇنىنە 2 رەت ولشەنۋگە ءتيىس. ماماندارىمىز اشىلعان وتكەلدەردى شولىپ شىعىپ, ءتيىستى جاعداي جاسالماعانىنا كوز جەتكىزدى. اتقارۋشى ورگاندارعا ەسكەرتۋ جاساپ, پروكۋراتۋراعا حات جولدادىق. زاڭ بويىنشا, شاعىم تۇسپەيىنشە نەمەسە تاپسىرما بەرىلمەيىنشە, ءوز بەتىمىزبەن تەكسەرىس جۇرگىزە المايىز. ەگەر قۇزىرلى ورگان رۇقسات ەتسە, تەكسەرىستى باستايمىز ءارى ءتيىستى شارالار قابىلدايمىز», دەيدى وڭىرلىك توتەنشە جاعدايلار دەپارتامەنتى ازاماتتىق قورعانىس باسقارماسى باستىعىنىڭ مىندەتىن اتقارۋشى, پودپولكوۆنيك ەرلان قاسىموۆ.
ايماقتاعى مۇز جولدارى نەگىزىنەن مال ازىعى مەن وتىن تاسۋعا پايدالانىلادى. قازىر ماي اۋدانىنىڭ باسكول, اققۋلى اۋدانىنىڭ يامىشەۆ, تەرەڭكول اۋدانىنىڭ تەرەڭكول, بەرەگوۆوي, پەسچان اۋىلدارىندا وتكەلدەر جۇمىس ىستەپ تۇر. الداعى ۋاقىتتا تەرەڭكولدە تاعى بىرەۋى اشىلادى دەپ جوسپارلانعان.
ە.قاسىموۆ ايماقتاعى مۇز وتكەلدەرىنىڭ سانى وتكەن جىلمەن سالىستىرعاندا ەداۋىر از ەكەنىن ايتىپ ءوتتى. بىلتىر 13 مۇز وتكەلى بولعان.
«ارقا دالاسىندا بيىل جىلداعىداي اياز جوق, سوعان ساي ەرتىس وزەنىنىڭ ورتاڭعى تۇستارىندا مۇز قاتپاعان جاعداي ءجيى كەزدەسىپ وتىر. ءارى وزەنگە اقسۋداعى جىلۋ-ەلەكتر ستانساسىنان شىعاتىن جىلى اعىس قۇيادى. ول دا مۇزدىڭ جەتكىلىكتى قاتپاۋىنا اسەر ەتەدى. وتكەلدەردە مۇز نورماعا ساي كەلمەسە, تالاپقا ساي جاراقتالماسا, ادامدار مەن اۆتوكولىكتەردى وتكىزۋگە بولمايدى. ونداي مۇز جولدارىندا قاۋىپ كەز كەلگەن ساتتە تۋىنداۋى ىقتيمال», دەيدى مامان.
توتەنشە جاعداي قىزمەتكەرلەرى مۇز ۇستىنە كولىكپەن شىققاندا باياۋ ءجۇرۋ كەرەكتىگىن, تەجەگىشتى بىردەن باسپاۋ كەرەكتىگىن ەسكەرتەدى. مۇزدا توقتاۋعا, بۇرىلۋعا, وزگە اۆتوكولىكتى باسىپ وزۋعا بولمايدى. مۇز ۇستىنەن وتپەس بۇرىن جولاۋشىلاردى ءتۇسىرىپ, قاۋىپسىزدىك بەلدىگىن شەشىپ تاستاۋ كەرەك. جۇرگىزۋشى جاقتاعى ەسىكتى اشىق قالدىرعان دۇرىس. رۇقسات ەتىلمەگەن جەرلەردە بالىق اۋلاۋعا, شۇڭقىرلار جاساۋعا, مۇز ۇستىنە شىعۋعا بولمايدى.
پاۆلودار وبلىسى
