2000-جىلداردىڭ باسىندا «حابار» تەلەارناسىندا كورسەتىلگەن «ازامات» ينتەللەكتۋالدى باعدارلاماسى تۇتاس ءبىر بۋىننىڭ ەسىندە قالدى. بۇل جوبا كوشباسشىلاردى تاربيەلەيتىن, ستۋدەنتتەردىڭ شەشەندىك ونەرىن شىڭداپ, سىني ويلاۋ قابىلەتىن دامىتۋعا جانە ءوز كوزقاراسىن دالەلدى قورعاۋعا ۇيرەتەتىن ماڭىزدى الاڭعا اينالدى. ءدال وسى باعدارلامادان شىققان تۇلەكتەر قازىرگى تاڭدا مەملەكەتتىك قىزمەتتە, ءبىلىم بەرۋ جانە كاسىپكەرلىك سالالارىندا ەل دامۋىنا ۇلەس قوسىپ ءجۇر.
15 جىلدان كەيىن «ازامات» تەلەباعدارلاماسى جاڭارتىلعان فورماتتا كورەرمەنگە قايتا ۇسىنىلىپ وتىر. قازاقستاننىڭ 100 جوعارى وقۋ ورنىنىڭ اراسىنان پىكىرسايىس كلۋبتارى بەلسەندى جۇمىس ىستەيتىن 32 ۋنيۆەرسيتەت ىرىكتەلىپ الىندى.
جاڭارتىلعان «ازامات» باعدارلاماسىنىڭ العاشقى شىعارىلىمى ناۋرىز مەرەكەسى قارساڭىندا «حابار» تەلەارناسىنان ەفيرگە شىعادى. بۇل – ستۋدەنتتەرگە ءوز قابىلەتتەرىن تانىتىپ, اناليتيكالىق جانە شەشەندىك ونەرلەرىن پاش ەتۋگە بەرىلگەن بىرەگەي مۇمكىندىك.
