فوتو: polisia.kz
ىشكى ىستەر مينيسترلىگىنىڭ حابارلاۋىنشا, قىلمىستىق توپ ساۋدا جەلىسىنىڭ بۇرىنعى قىزمەتكەرلەرىمەن كەلىسە وتىرىپ, ەلەكتروندىق ساتۋ جۇيەسىنە زاڭسىز كىرۋ مۇمكىندىگىن پايدالانىپ, ەكى جىل ىشىندە جالپى سوماسى 450 ملن تەڭگەدەن استام تاۋاردى ۇرلاعان. قىلمىستىق جولمەن الىنعان تەحنيكا ەلىمىزدىڭ بىرنەشە قالالارىندا ساتىلعان.
«20-دان استام ءتىنتۋ ءىس-شارالارى وتكىزىلدى, 120-دان استام ءتۇرلى تەحنيكا, ونىڭ ىشىندە بەلگىلى وندىرۋشىلەردىڭ ونداعان ۇيالى تەلەفوندارى, ءىرى كولەمدە اقشا, تراۆماتيكالىق تاپانشالار جانە ءارتۇرلى كاليبرلى پاتروندار تاركىلەندى», دەدى ءىىم ۇيىمداسقان قىلمىسقا قارسى كۇرەس دەپارتامەنتىنىڭ وكىلى قۋاندىق الپىس.
اتالعان وقيعاعا قاتىستى اسا ءىرى مولشەردەگى ۇرلىق جانە الاياقتىق فاكتىلەرى بويىنشا سوتقا دەيىنگى تەرگەپ-تەكسەرۋ امالدارى جۇرگىزىلىپ جاتىر.
