جەمقورلاردىڭ جىمىسقى ارەكەتى اشكەرەلەندى

قوستاناي وبلىسىنىڭ مەڭدىقارا اۋدا­نىندا پروكۋرورلار 2023 جانە 2024 جىلدارعا ارنالعان ىشكى ەڭبەك نارىعىن قورعاۋعا, جۇمىسپەن قام­تۋ­عا جاردەمدەسۋگە, سونداي-اق جۇمىس­سىز­دار مەن ءوزىن-ءوزى جۇمىسپەن قام­تىعاندارعا ارنالعان بيۋد­جەتتىك قارا­جات­تى جۇمساۋدىڭ زاڭدىلى­عىن ساقتاۋ ماسەلەسىمەن تەكسەرۋ جۇرگىزگەن ەدى. سونىڭ بارىسىندا 2023 جىلدىڭ مامىر ايىندا قونىس اۋدارۋشى ج. مەملەكەتتىك سۋبسيديانى پايدالا­نىپ, سوسنوۆ اۋىلدىق وكرۋگىنىڭ پريو­زەرنوە اۋىلىنان پاتەر ساتىپ ال­عا­نى انىقتالدى. تەكسەرۋ كەزىندە اتالعان ادامنىڭ بۇل مەكەنجايدا تۇر­مايتىنى, ءىس جۇزىندە وسى اۋىلدىق وكرۋگ­تەگى حاركوۆسكوە اۋىلىندا مەكەندەيتىنى انىقتالدى. ال الىنعان ءۇي جاريا­لانعان قۇنىنا سايكەس كەلمەيتىنى جانە ءومىر سۇرۋگە جارامسىز ەكەنى بەل­گىلى بولدى.

ج.-نىڭ ءۇي ساتىپ الۋىندا جالعان ارەكەت بەلگىلەرىنىڭ بولۋىنا بايلانىستى پروتسەستىك شەشىم قابىلداۋعا قىلمىستىق كودەكستىڭ 190-بابىنىڭ 1-بولىگىنە (الاياقتىق) سايكەس اۋداندىق پوليتسيا بولىمىنە جولداندى. سوتقا دەيىنگى تەرگەۋ بارىسىندا كۋاگەردەن ء(ۇيدى ساتقان ادام) جاۋاپ الىنىپ, ول ءۇيىن 350 000 تەڭگەگە ساتقانىن, ال 4 ملن تەڭگەنى, ياعني سۋبسيديانى ج.-نىڭ نۇسقاۋىمەن كەيىننەن وعان كورسەتكەن بانك شوتتارىنا اۋدارعانىن ءتۇسىندىردى. سونداي-اق بانك سەرتيفيكاتتارى قاراجاتتىڭ جىلجىمايتىن م ۇلىك ساتۋشىسىنا اۋدارىلماعانىن راستادى.

بىلتىر 10 شىلدەدە مەڭدىقارا اۋدان­دىق سوتىنىڭ ۇكىمىمەن قىلمىس­­تىق كو­دەكستىڭ 190-بابى 3-تارماعىنىڭ 1) تار­ماق­شاسىنا سايكەس قىلمىس جاساعانى ءۇشىن ج. كىنالى دەپ تانىلىپ, 3 جىلعا باس بوس­تان­دىعىنان شەك­تەلدى, سونىمەن قاتار ۇكىم بويىنشا اۋدان اكىمدىگىنىڭ پايداسىنا 4 ملن تەڭگە كولەمىندە ماتەريالدىق شىعىن­دى ءوندىرىپ الۋ تۋرالى تالاپ قانا­عاتتاندىرىلدى. جۋىردا ۇكىم زاڭدى كۇشى­نە ەنىپ, ادىلدىك سالتانات قۇردى.

كەيىنگى جىلدارى جاپپاي تەكسەرىس ارقىلى كوپ مەكەمەدە ەسەپشىلەردىڭ جەمقورلىق قۇقىقبۇزۋشىلىققا تىكەلەي قاتىسى بارى انىقتالىپ جاتىر. ولار اق­شامەن اينالىساتىن ادام بولعان­دىق­تان, كەيدە ءوز ەرىكتەرىمەن, كەيدە باسشىلارىنىڭ نۇسقاۋىمەن زاڭنان اتتاپ جاتاتىنى بەلگىلى بولىپ وتىر. سونداي جاعدايدىڭ تاعى ءبىرى اقتاۋ قالاسىندا تىركەلدى. قالالىق پروكۋراتۋرا جەرگىلىكتى بالاباقشانىڭ بىرىندە بيۋدجەت قاراجاتىن زاڭسىز يەمدەنۋ دەرەگىن انىقتاعان. اتاپ ايتقاندا, №39 «حيۋاز بوبەكجاي» بالاباقشاسىنىڭ ەسەپشىسى ديرەكتورىنىڭ اتىنان بانك قۇجاتتارىنا قول قويىپ, ءوزىنىڭ ەسەپشوتىنا مەملەكەت بيۋدجەتىنەن 9 ملن تەڭگەدەن اسا قاراجاتتى زاڭسىز اۋدارعانى انىقتالدى. كورسەتىلگەن دەرەكپەن سوت ەسەپشىگە قاتىستى قك-ءنىڭ 189-بابى 3-ب. 1) تارماقشاسىمەن ۇكىم شىعارىپ, 3 جىل 6 ايعا مەرزىمگە باس بوستاندىعىن شەكتەۋ جازاسى تاعايىندالدى.

ال قوستاناي وبلىسىنىڭ بەيىمبەت مايلين اۋدانىندا ورىن العان مىنا وقيعا تىم سوراقى. مۇندا اۋداندىق ءماسليحات توراعاسى مەن دەپۋتاتى سىبايلاس جەمقورلىق جاسادى دەگەن كۇدىككە ىلىگىپ وتىر. جەرگىلىكتى سى­باي­لاس جەمقورلىققا قارسى قىزمەت اتالعان ازاماتتارعا قاتىستى سوتقا دەيىنگى تەرگەۋدى اياقتادى. ءماسليحات توراعاسى, ونىمەن بايلانىسى بار فيرمانىڭ جەرگىلىكتى مەملەكەتتىك مەكەمەلەرمەن مەملەكەتتىك ساتىپ الۋ شارتتارىنىڭ تالاپ­تارىن ورىنداماۋىنا بايلانىستى اۋديت بارىسىندا انىقتالعان بۇزۋشىلىقتار بو­يىنشا شارا قولدانباعانى ءۇشىن دەپۋ­تات ارقىلى وبلىستىق ىشكى مەملەكەتتىك اۋديت دەپارتامەنتى قىزمەتكەرلەرىنە 2 ملن تەڭگە پارا بەردى دەپ ايىپتالىپ وتىر. بيىل 23 قاڭتاردا قاداعالاۋشى پروكۋراتۋرا ايىپتالۋشىلاردى سوتقا بەردى. ازىرگە قىلمىستىق-پروتسەستىك كودەكستىڭ 201-بابىنا سايكەس وزگە اقپارات جاريا ەتىلمەيدى.

ادىلەتتى قازاقستاندى قۇرۋ جولىندا سىبايلاس جەمقورلىق سەكىلدى اۋىر قىلمىس­پەن كۇرەس جالعاسا بەرەدى. مەملەكەتتىڭ ءال-اۋقاتىنا, حا­لىق­­تىڭ تۇرمىس-تىرشىلىگىنە تىكەلەي سوققى بولىپ تيەتىن مۇنداي قۇقىق­بۇزۋ­­شىلىقپەن كۇرەس تۇراقتى جۇر­گىزىلگەندە عانا ءادىل قوعام ورنايتىنى اقيقات.