ۇكىمەت ققس-نىڭ جاڭا مولشەرىن ۇسىندى

بۇعان دەيىن پرەزيدەنت توراعالىعىمەن وتكەن ۇكىمەتتىڭ كەڭەيتىلگەن وتىرىسىندا ققس-نى 12-دەن 20 پايىزعا كوتەرۋ جوسپارلانىپ وتىرعانى ايتىلعان. الايدا مەملەكەت باسشىسى بيزنەس وكىلدەرىمەن كەزدەسۋىندە بۇل مولشەردىڭ تىم جوعارى ەكەنىن ايتىپ, ۇكىمەتكە قايتا پىسىقتاۋدى تاپسىرعان ەدى. 

سەرىك جۇمانعارين ققس بيۋدجەتتى تولىقتىرۋدىڭ نەگىزگى كوزدەرىنىڭ ءبىرى ەكەنىن اتاپ ءوتتى. مولشەرلەمەنى ارتتىرۋ جانە سارالاۋ بيۋدجەتتىڭ قۇبىلمالى مۇناي كىرىستەرىنە تاۋەلدىلىگىن ازايتىپ, ۇلتتىق قوردىڭ جيناق فۋنكتسياسىن كۇشەيتۋگە جانە باسىم مەملەكەتتىك جوبالاردى قارجىلاندىرۋعا مۇمكىندىك بەرەتىنىنە توقتالدى. 

«مولشەرلەمە كوپ بولعان كەزدە بۋحگالتەرلىك ەسەپ كۇردەلەنە تۇسەدى, دەكلاراتسيا جاساۋ قيىندايدى. بۇعان جول بەرمەۋ ءۇشىن ءبىز 16%, 10%, 0% جانە سالىقتان بوساتۋدى ۇسىنامىز. ءبىز بۇل رەتتە اۋىل شارۋاشىلىعى ونىمدەرىن وندىرۋشىلەردى ققس-تان بوساتۋدى جوسپارلاپ وتىرمىز. قازىر شارۋا قوجالىقتارى ققس تولەمەيدى. 10% مولشەرلەمە. بۇل ماسەلە قوسىمشا تالقىلاۋدى قاجەت ەتەدى. ءبىز دەنساۋلىق ساقتاۋ سالاسى ءۇشىن تومەندەتىلگەن مولشەرلەمەنى ۇسىنامىز. بارلىق قىزمەت تۇرلەرى بويىنشا ۇسىنىستاردى جينايمىز, ەسەپتەپ سانايمىز جانە سىزدەرمەن بىرگە شەشەمىز», دەدى ۇلتتىق ەكونوميكا ءمينيسترى.

قازىر ەلدەگى كاسىپورىنداردىڭ 4 پايىزى عانا ققس تولەيدى.ء مينيستردىڭ سوزىنشە, كاسىپورىندار سالىق تولەمەۋ ءۇشىن بيزنەسىن قولدان بولشەكتەيدى. 

«سوندىقتان ەسەپكە قويۋ شەگىن 80 ملن تەڭگەدەن 15 ملن تەڭگەگە دەيىن تومەندەتۋ ۇسىنىلادى. بۇل بيزنەس ءۇشىن تەڭ جاعداي جاسايدى, جالتارۋ سحەمالارىنىڭ الدىن الادى. بۇل ماسەلەدە ءبىز حالىقارالىق تاجىريبەگە باعدارلانىپ وتىرمىز», دەدى سەرىك جۇمانعارين.

ول ەكونوميكاسى دامىعان, دامۋشى ەلدەردىڭ باسىم كوپشىلىگىندە ققس شەگى جوق ەكەنىن نەمەسە تومەن مولشەردە ەكەنىن دە تىلگە تيەك ەتتى.