فوتو: اشىق دەرەككوز
پرەزيدەنت كەز كەلگەن رەفورمانى جان-جاقتى ساراپتاپ, بايىپپەن جۇرگىزۋ قاجەتتىگىن اتاپ ءوتتى. بۇل رەتتە قر پارلامەنتى سەناتىنىڭ دەپۋتاتى گەننادي شيپوۆسكيح ەكونوميكا سالالارىنىڭ ەرەكشەلىكتەرىن ەسكەرە وتىرىپ, ءتۇرلى نۇسقالار ازىرلەۋ ماڭىزدى ەكەنىنە توقتالدى.
«ققس مولشەرلەمەسى سارالانىپ بەلگىلەنۋى ءتيىس. بۇل شەشىم بىلىكتى ساراپشىلاردىڭ, كاسىپكەرلەردىڭ جانە دەپۋتاتتاردىڭ پىكىرىنە قۇلاق اسا وتىرىپ, ناقتى ەسەپتەۋلەر نەگىزىندە قابىلدانۋى قاجەت. قازىرگى ۇسىنىلعان مولشەرلەمە تىم جوعارى. بۇل قوعامدا قىزۋ تالقىلانىپ, ءتۇرلى پىكىرتالاس تۋدىردى. دەگەنمەن, بۇل الدىن الا قاراستىرۋعا ۇسىنىلعان نۇسقا ەكەنىن ەسكەرۋ كەرەك. سوندىقتان ۇكىمەتتىڭ بۇل باعىتتاعى جۇمىسى بيزنەس, قوعام, كاسىپكەرلەر جانە ساراپشىلارمەن بىرلەسە وتىرىپ جاسالۋى ءتيىس», دەدى دەپۋتات.
ونىڭ پىكىرىنشە, ۇكىمەت, مىقتى ساراپشىلار جانە دەپۋتاتتار بۇل ماسەلەنى مۇقيات تالداپ, دۇرىس شەشىم قابىلداۋى قاجەت.
«ماقسات – ءتيىمدى شەشىم تابۋ. ياعني بيزنەسكە كەدەرگى كەلتىرمەيتىن, قولايلى جاعداي جاسايتىن, سونىمەن قاتار سالىق ءتارتىبىن كۇشەيتىپ, بيۋدجەت كىرىسىن ارتتىراتىن وڭتايلى جولدى انىقتاۋ. پرەزيدەنتتىڭ بۇل پىكىرى جانە ۇسىنىسى وتە ورىندى. سەبەبى جاڭا سالىقتىق رەفورما ەل ەكونوميكاسىنا ءتيىمدى بولىپ, ەڭ باستىسى – قاراپايىم كاسىپكەرلەرگە كەدەرگى ەمەس, كەرىسىنشە قولداۋعا باعىتتالۋى قاجەت», دەدى گەننادي شيپوۆسكيح.
