فوتو:Kazakh Tourism PR
امەريكانىڭ ساياحات جايلى جازۋشىلار قوعامىنىڭ (SATW) مۇشەلەرى 2023 جىلى Kazakh Tourism اقش-تىڭ travel-جۋرناليستەرى مەن فوتوگرافتارى ءۇشىن الماتى قالاسىندا جانە ونىڭ اينالاسىندا ءباسپاسوز تۋرىن ۇيىمداستىرعان. مەيماندار باستى تاريحي جانە تۋريستىك باعىتتارمەن, گاسترونوميامەن تانىسقان. ولار قازاقستانعا جاساعان ساپارى تۋرالى اسەرلەرىن بۋكلەتتە بايانداۋدى ءجون كورگەن. بۇل شەتەلدىك وقىرماندارعا امەريكاندىقتاردىڭ كوزىمەن قازاقستانعا قاراۋعا مۇمكىندىك بەرەدى.
«تابيعاتى مەن مادەنيەتى باي جانە بەيبىت قازاقستاننىڭ ءبىر بۇرىشىن ارالاۋ جانە زەرتتەۋ ۇلكەن قۋانىش! مەن بۇل ەل تۋرالى العاش رەت مەكتەپتە «دۇنيەجۇزى تاريحى» كۋرسىندا ءبىلدىم. جوعارى سىنىپتا وقىپ جۇرگەندە قازاقستانعا كەلۋ مۇمكىندىگىنە يە بولامىن دەپ ەشقاشان ويلاماعان ەدىم. كىتاپتاعى ماقالالار مەن فوتوسۋرەتتەر – وسى تىرشىلىگى قايناعان قالا مەن كوركەم ەل تۋرالى اسەرىمىز بەن جىلى ەستەلىكتەرىمىزدىڭ كورىنىسى», دەدى كىتاپتاعى ماقالا اۆتورلارىنىڭ ءبىرى دەۆيد لانگ.
جيناق اۆتورلارى قازاقستاننىڭ مادەنيەتى, تابيعاتى مەن داستۇرلەرى تۋرالى بايانداپ, وزىندىك ەرەكشەلىگى مەن باي مۇراسىن كورسەتۋگە تالپىنعان. ونىڭ ىشىندە ۇلتتىق تاعامداردان باستاپ مۋزىكالىق اسپاپتارعا جانە زەرگەرلىك بۇيىمدارعا دەيىن قامتىلعان.
الماتىعا ساياحات شەتەلدىك قوناقتارعا قازاقستاننىڭ گاسترونومياسىمەن جاقىنىراق تانىسۋعا مۇمكىندىك بەردى. ولار جەرگىلىكتى تاعامداردىڭ الۋان تۇرلىگىن, جەرگىلىكتى تۇرعىنداردىڭ قوناقجايلىلىعىن ەرەكشە اتاپ ءوتتى. شارىن شاتقالى, قايىڭدى كولى جانە كوكتوبەدەگى The Beatles ءمۇسىنى ساياحاتتىڭ جارقىن ساتىنە اينالعان.
ايتا كەتەيىك, 2019 جىلدان باستاپ Kazakh Tourism امەريكانىڭ ساياحات جايلى جازۋشىلار قوعامىمەن (SATW) ىنتىماقتاستىق ورناتقان.
