سۋرەتتى تۇسىرگەن – اۆتور
اۋەلدە اتالعان ءوندىرىس وشاعىندا سۋ مەن جىلۋ قۇبىرى عانا شىعارىلادى دەپ جوسپارلانعان. الايدا العاشقى قادامدار ءساتتى بولعان سوڭ با, باسشىلىق ءونىم ءتۇرىن كوبەيتۋدى كوزدەگەن. ءسويتىپ, قوسىمشا تسەحتا ەلەكتر ەنەرگياسىنىڭ كابەلدىك جۇيەسىن قورعاۋعا باعىتتالعان ءۇش قاباتتى قۇبىرلار وندىرىلە باستادى. تسەحتىڭ ءىشى تاپ-تازا. ءار جۇمىسشى وزىنە جۇكتەلگەن اپپاراتتىڭ قۇلاعىندا تۇر. ءبىرى تۇيىرشىكتى شيكىزاتتى قۇرىلعىعا قاراي وتكىزسە, ەندى ءبىرى قىزىلدى-جاسىلدى تۇيمەلەردى باسىپ, الدەنەنى رەتتەپ وتىر. ەڭ سوڭىنداعى جۇمىسشىلار قۇبىردىڭ ديامەترىن ولشەپ, تىسقا جونەلتەدى. سىرت جاقتا قاز-قاتار جينالعان قۇبىرلاردا قيساپ جوق. ەرتەڭ-اق ساتىلىپ كەتەدى دەيدى ماماندار.
– ديامەترى 400 ميلليمەترگە دەيىن جەتەتىن قۇبىرلار جاسايمىز. تاۋلىگىنە شامامەن 3,5 مىڭ مەتر سۋ قۇبىرىن وندىرۋگە قاۋقارىمىز جەتەدى. ەنەرگەتيكا سالاسىنا قاجەتتى قۇبىرلارىمىزدىڭ باستى ارتىقشىلىعى – ولار وتقا جانە سوققىعا ءتوزىمدى ماتەريالداردان جاسالادى. ياعني مۇنداي قۇبىر جانبايدى, سىنبايدى. پوليەتيلەن قۇبىردىڭ سىرتقى قاباتى ءتۇرلى فيزيكالىق اسەرگە, جوعارى قىسىمعا توتەپ بەرەتىندەي ەتىپ جاسالعان. جالپى, كۇنىنە وسىنداي قۇبىردىڭ 1 100 مەترىن شىعارا الامىز, – دەيدى كاسىپورىن باس ديرەكتورىنىڭ ورىنباسارى تۇرسىنبەك مۇساحانوۆ.
زاۋىت شىعىس قازاقستاندى عانا ەمەس, اباي وبلىسى, تالدىقورعان, پاۆلودار وبلىستارىنا دا ونىمدەرىن جەتكىزەدى. وندىرىستە زاماناۋي تەحنولوگيالار عانا قولدانىلاتىندىقتان, ءونىم ساپاسى دا جوعارى. قازىر شىعىستا بۇل باعىتتا جۇمىس ىستەپ جاتقان مۇنداي كاسىپورىن جوقتىڭ قاسى. ءتىپتى رەسپۋبليكادا پوليەتيلەن قۇبىرلارىن شىعاراتىن زاۋىت ساۋساقپەن سانارلىق.
جاڭا كاسىپورىننان جىلىنا شامامەن 3 600 توننا ءونىم شىعارىلادى. بولاشاقتا بۇل كورسەتكىشتى بەس مىڭعا جەتكىزۋ جوسپارلانعان.
– وبلىسىمىزدى قۇبىر جۇيەسىمەن تولىقتاي قامتۋعا شامامىز جەتەدى. الداعى ۋاقىتتا رەسپۋبليكامىزدىڭ وزگە وڭىرلەرىنە دە شىعۋدى ويلاستىرامىز. ول ءۇشىن ءوندىرىس كولەمىن ۇلعايتۋ قاجەت. كەلەشەكتە قوسىمشا تسەح اشىپ, جۇمىسشى سانىن ارتتىرامىز, – دەيدى تۇرسىنبەك مۇساقانوۆ.
قازىر پوليەتيلەن قۇبىر زاۋىتىندا 25 ادام جۇمىسپەن قامتىلعان. ولاردىڭ ءبىرازى – ارنايى وقۋدان ءوتىپ, قۇبىر جاساۋدىڭ قىر-سىرىن مەڭگەرگەن ماماندار. سۇرانىسقا قاراي قۇبىر كولەمىنىڭ ءتۇر-ءتۇرىن ازىرلەيدى. قازىر شىعىپ جاتقان ەنەرگەتيكالىق قۇبىردىڭ بەرىكتىگى سونداي, ەكسكاۆاتوردىڭ كۇرەگى ءتيىپ كەتسە دە ب ۇلىنبەيدى ەكەن. ىشكى قاباتى ورتكە قارسى. سونداي-اق گاز بەن سۋ جۇيەسى ءۇشىن جاسالىپ جاتقان قۇبىرلار دا وتە بەرىك. سوعان قاراماستان ەل بويىنشا نارىقتاعى باعانى تومەن ۇستاپ وتىر. باعا دەمەكشى, زاۋىت تولىق ينۆەستيتسيالىق نەگىزدە اشىلدى. كاسىپكەر ازاماتتار قالانىڭ قيىر شەتىندە تۇرعان بوس عيماراتتاردى ساتىپ الىپ, زاۋىتقا اينالدىرعان.
– ءۇش اۋىسىممەن جۇمىس ىستەيمىز. تسەحتا تىنىم جوق. سۇرانىس ارتىپ جاتسا, بۇل اۋماققا تاعى زاۋىت سالامىز, – دەيدى تۇرسىنبەك مۇساقانوۆ.
شىعىس قازاقستان وبلىسى
