جازىعى – ءوزىن-ءوزى قورعاعانى ما؟

ابايسىزدا كىسى ولىمىنە اپارىپ سوقتىرعان وقيعانىڭ ءمان-جايىنا قىسقاشا توقتالا كەتسەك. وتكەن جىل­دىڭ تامىز ايىندا «گوگول» تۇنگى كلۋ­بىنىڭ جانىندا ەكى جىگىت توبەلەسىپ, قاتتى سوققىدان ءبىرىنىڭ ميىنا قان قۇيىلىپ جان تاپسىرعان. «وقيعا تاڭ الدىندا بولعان. جاس جىگىتتى الدەبىرەۋلەردىڭ ۇرىپ-سوققانى تۋرالى شاقىرتۋ شامامەن ساعات 04.48-تە ءتۇستى. مەديتسينالىق بريگادا جەدەل جەتكەنىمەن سوققى تيگەن ازاماتتىڭ كوز جۇمعانى انىقتالدى», دەپ حابارلاعان ەدى جەدەل جاردەم قىز­مەتىنەن.

كەيىن ءتارتىپ ساقشىلارى وقيعانى ءجىتى تەكسەرىپ, دەنساۋلىققا قاساقانا اۋىر زيان كەلتىرۋ دەرەگى بويىنشا تەرگەۋ جۇرگىزدى. كۇدىكتى جولامان قۇسايىنوۆ ۇستالىپ, قاماۋعا الىندى. العاشقىدا قايتىس بولعان سەرگەي سۋحونوسەنكونىڭ تۋىستارى توبەلەستى العاش باستاعان ج.قۇسايىنوۆ دەپ كىنا­لاعان ەدى. كەيىن كوشە كامەرالا­رىنداعى جازبادان قاراپ, وقيعانىڭ شىن مانىندە باسقاشا وربىگەنىنە كۋا بولدىق. بەينەجازبادا مارقۇم جىگىتتىڭ تەڭسەلە باسىپ كلۋبتان شىققانى, ودان سوڭ ءوز بەتىنشە سويلەسىپ تۇرعان ءۇش زامانداسىنا جاقىنداعانى بايقالادى. ولاردان الدەنەنى سۇراعانداي (سوتتا شىلىم سۇراعانى ايتىلدى) بولادى. كەيىن ارتقا شەگىنىپ, قالتاسىنان پىشاق الىپ شىعادى دا وڭ قولىنا ۇستايدى. الگىلەرگە جاقىنداپ كەلىپ, سول قولىمەن جولاماننىڭ بەتىنەن ۇرۋعا ارەكەتتەنەدى. وسى ارادا ەكەۋى­نىڭ اراسىندا توبەلەس باستالىپ, ج.قۇ­سايىنوۆ ىشىمدىككە تويىپ العان جىگىت­تىڭ سوققىلارىنان جالتارىپ, كۇرەس ادىسىنە سالىپ جىعىپ العانىن كورۋگە بولادى. بىرەر ساتتەن سوڭ جىبەرە سالعا­نىمەن سەرگەي قايتادان كەلىپ شۇيلىك­كەن. قورعانىپ جۇرگەن ازامات ءبىر-ەكى سوققى جاساۋعا ءماجبۇر بولعان. جۇدىرىعىمەن اۋا قارماپ جۇرگەن سەرگەيدىڭ كەنەتتەن ارتقا شەگىنىپ, ەكى قولىن جايا جەرگە گۇرس ەتىپ قۇلاعانى دا كامەراعا ءتۇسىپ قالعان. الايدا قورعانىپ جۇرگەن جىگىت بۇل ساتتە وعان ەشبىر سوققى جاساماعان.

كەيىن انىقتالعانداي, 23 جاستاعى س.سۋحونوسەنكو بۇل ءتۇنى كوڭىل جاراس­تىرىپ جۇرگەن قىزىمەن ۋاقىت وتكى­زىپ, سوڭىنان جانجالداسىپ, «گوگول» كلۋبىنا كەتىپ قالعان. وقيعا ورنىن­دا بولعانداردىڭ ەشقايسىسى جان­جالدى شەشۋگە وقتالماعانى دا تاڭعال­دىرادى. كلۋبتىڭ قاۋىپسىزدىك قىزمەتى دە كىرىسپەگەن. مەديتسينالىق ساراپ­تاما سەرگەيدىڭ ميىنا قان قۇيىل­عاننان قايتىس بولعانىن انىقتادى. ساراپشىلار جىگىتتىڭ باسىنان 7-8 سوققى العانى تۋرالى قورىتىندى شىعارعان.

سوت وتىرىسىندا جولاماننىڭ ىشىم­دىك ىشپەگەنى, ءوزىن قورعاعانى نازار­عا الىندى. جانىندا بولعان كۋاگەر­لەر مارقۇم ازامات العاش بولىپ پىشاق­پەن شابۋىلداعانىن مىسال ەتتى. اقىر-سوڭى پاۆلودار قالالىق №2 سوتى­نىڭ ۇكىمىمەن جولامان قۇسايى­نوۆ ابايسىزدا ادام ولىمىنە اكەلىپ سوققان قىلمىسى ءۇشىن كىنالى دەپ تانىلىپ, 4,5 جارىم جىلعا باس بوستاندىعىنان ايرىلدى.

الايدا ەكى تاراپ تا بۇل شەشىممەن كەلىسپەي وتىر. سەرگەيدىڭ اناسى ول كەم دەگەندە 8 جىل تۇرمەدە وتىرۋ كەرەك دەپ ەسەپتەيدى. ال ايىپتالۋشىنىڭ تۋىس­تارى سوتتا نەگىزگە الىنعان باپتاردى قايتا قاراپ, ونى رۇقسات ەتىلگەن ءوزىن-ءوزى قورعاۋ شەگىنەن اسىپ كەتۋ بابىنا اۋىستىرۋدى تالاپ ەتەدى. ەكى وتباسى جىل باسىندا سوتتا قايتا كەزدەسكەن ەدى. ۇكىم ازىرشە سول كۇيىندە قالدىرىلدى.

قازىر بۇل وقيعاعا قاتىستى جەرگىلىك­تى قوعامنىڭ پىكىرى دە قاق جارىلىپ تۇر. ءبىرى «جاس جىگىت ادام قولىنان قازا تاپتى, سول ءۇشىن ءتيىستى جازاسىن الۋى كەرەك» دەسە, ەكىنشىلەرى «جولاماننىڭ ەشبىر جازىعى جوق, ءوزىن قورعاعانى ءۇشىن قانشاما جىل عۇمىرىن تۇرمە­دە وتكىزۋى ادىلەتتى ەمەس» دەگەن پىكىر­دە. بۇل ءىس­تى سوت الداعى ۋاقىتتا قايتا قاراپ, ادى­لەتتى ۇكىم شىعارادى دەگەن سەنىمدەمىز.

پاۆلودار وبلىسى