فوتولار: وبلىس اكىمدىگى
پرەمەر-ءمينيستردىڭ ورىنباسارى قانات بوزىمباەۆ تۇركىستان وبلىسىنىڭ اكىمى نۇرالحان كوشەروۆپەن بىرگە ساۋران اۋدانىنا بارىپ, جۋىردا پايدالانۋعا بەرىلگەن اۋماقتىق ورگاندار عيماراتىن ارالاپ كوردى. 2,1 گەكتار اۋماقتا ورنالاسقان عيماراتتىڭ جالپى اۋدانى 7 300 شارشى مەتردى قۇرايدى. مۇندا مەملەكەتتىك قىزمەتشىلەر مەن تۇرعىندارعا قولايلى جاعداي جاسالعان. جالپى, قۇرىلعانىنا 4 جىل بولعان ساۋران اۋدانىنىڭ ينفراقۇرىلىمى جاقسارىپ, الەۋەتى كوتەرىلىپ كەلەدى. وڭىرلەردى دامىتۋ باعدارلاماسى اياسىندا اۋداندا 5 نىسان سالىنعان. وزگە جوبالار بويىنشا دا الەۋمەتتىك نىساندارمەن تولىعىپ جاتىر.
ساۋرانداعى اۋماقتىق ورگاندار عيماراتىندا ۆيتسە-پرەمەرگە ايماقتا «اۋىل – ەل بەسىگى» جوباسىنىڭ ورىندالۋ بارىسى تانىستىرىلدى. وسى جوبا ارقىلى سالىنعان عيماراتتار مەن الداعى جوسپارلار باياندالدى.
تۇركىستان وبلىسى اكىمىنىڭ ءباسپاسوز قىزمەتىنىڭ ءمالىم ەتۋىنشە «اۋىل – ەل بەسىگى» جوباسى شەڭبەرىندە 5 جىلدا 113,2 ملرد. تەڭگە قارجى ءبولىنىپ, 1 567 جوبا جۇزەگە اسقان. 173 الەۋمەتتىك جانە 104 ينفراقۇرىلىمدىق نىسان سالىنىپ, 1 571 ىشكى كوشە ورتاشا جوندەۋدەن وتكىزىلگەن. ناتيجەسىندە 328 ەلدى مەكەن قاجەتتى ينفراقۇرىلىممەن قامتىلىپ, 10 مىڭعا جۋىق ادامعا جۇمىس ورىندارى اشىلعان.
