بۇل ازداي, تەلەفونداعى الەۋمەتتىك جەلىنى اشىپ قالسام, الدەبىر كاسىپكەرلىك كومپانيانىڭ «مەكتەپتەر توقتاتىلدى. ال سەن ۇيدە جالىقتىڭ با؟ وندا پالەن اكۋاپاركىنە كەل, مۇندا كوڭىلدى جانە جىلى» دەپ باعاسى جازىلعان جارناماسى جىلت ەتتى. جارناماعا وقىرمان تارتۋ ءۇشىن الاقايلاپ تۇرعان وقۋشى قىزدىڭ كوڭىلدى فوتوسۋرەتىن جۇكتەپ, سونىڭ بەتىنە «اياز! الاقاي, ساباق بولمايدى!» دەپ جارقىراتىپ جازىپ قويىپتى. قىسقاسى, مەكتەپتەر جابىلسا, ساباق بولماي قالسا, وقۋشىدان باستاپ مۇعالىم دە, اتا-انا دا, كاسىپكەرلەر دە قۋانادى ەكەن. بارلىعى دەۋدەن اۋلاقپىز, باسىم كوپشىلىگى بۇل جاعدايعا كوڭىلدەنەتىنىن مەڭزەپ وتىرمىز. ال ءبىر ءسات ويلانىپ كورىڭىزشى, شىندىعىندا ساباقتىڭ بولماعانى قۋانتارلىق نارسە مە؟ باسقاسىن بىلمەيمىن, بىراق وسىعان ءدال وقۋشى مەن مۇعالىمنىڭ قۋانعانى – قورقىنىشتى. اسىرەلەپ وتىر دەرسىز, ولاي ويلاۋعا قاقىڭىز بار, بىراق بايىپتاپ قاراساڭىز, بۇل ەڭ الدىمەن بالانىڭ وقۋعا, جاڭا ءبىلىم الۋعا قىزىقپايتىنىن, مۇعالىمنىڭ سول ساباق بولمايتىنىنا قۋانعان وقۋشىلارىن قىزىقتىرا المايتىنىن انىق كورسەتپەي مە؟ وسى ويىمىزعا تاعى ءبىر ءۋاج ايتاتىنداردىڭ پىكىرى بيلىك جاقتان كەلەتىن «وقۋشى دا, مۇعالىم دە دەمالمايدى, ساباق بار بولعانى ونلاين فورماتقا اۋىستىرىلدى» دەيتىن مازمۇنداعى جاۋاپقا سايار. قاشىقتان وقىتۋ دەلىنەتىن اتاۋى ادەمى نۇسقانىڭ قانداي ناتيجە بەرەتىنىنەن پاندەميا كەزىندەگى كوزبوياۋشىلىقتان كوردىك قوي.
ءيا, بالالاردىڭ بارىندە الەۋمەتتىك جانە باسقا دا جاعداي بىردەي ەمەس, مىسالى, ءبىر وقۋشى مەكتەپكە اتا-اناسىنىڭ كولىگىمەن بارسا, ەكىنشى ءبىر بالا 2 شاقىرىم جولدى جاياۋ ءجۇرىپ قاتىناۋى مۇمكىن. وسىنداي ماسەلەنى ەسكەرىپ, قولايسىز اۋا رايىندا ساباقتىڭ بولماعانى دا, ۇيدەن وقۋعا اۋىستىرىلعانى دا دۇرىس دەۋگە بولادى. بۇعان كەلەسى ءبىر قارسى ويدى قوسىپ, «الەۋمەتتىك از قامتىلعان, ونىڭ ۇستىنە كوپبالالى وتباسىنداعى ءار وقۋشىعا جەكە نوۋتبۋك تابىلا بەرمەيدى» دەگەن ويدى مىسالعا كەلتىرۋگە كەلەر. جالپى, ساباقتى بولدىرماۋدىڭ ءتيىمدى-ءتيىمسىز تۇستارى تۋرالى ەكىجاقتى پىكىرلەردى تولاسسىز بەرە بەرۋگە بولادى. وسىندايدا اربانى دا سىندىرماي, وگىزدى دە ولتىرمەي, وقىتۋ فورماتىنا ونلاين يا وفلاين دەپ تاڭداۋ بەرگەن دۇرىس شىعار. بۇل جەردە نازار اۋدارتقىمىز كەلگەن ماسەلە – وقۋشىنىڭ مەكتەپكە بارمايتىنىنا, مۇعالىمنىڭ بالالار شۋىنان ءبىر كۇنگە بولسىن قۇتىلعانىنا قۋاناتىنى. اقيقاتىندا, الەم كۇن سايىن, ءتىپتى ساعات پەن سەكۋند ساناپ ءوڭىن وزگەرتىپ جاتقان زاماندا بالا تابيعي قالپىنا قاراي جاڭا ءبىلىم الۋعا قۇلشىنۋى كەرەك ەدى عوي. ال مۇعالىم مەكتەپتە بالالاردىڭ شۋىلى مەن قوڭىراۋدىڭ ءۇنى ەستىلمەگەنگە, كوڭىلىنە قاياۋ تۇسپەسە دە ءبىرتۇرلى كۇندەلىكتى ءساتتى ساعىنعانىن سەزۋى كەرەكتەي كورىنەدى. اتا-انا شە, بالاسى ءبىر كۇن ساباقتان قالسا, ءبىر جىلعا گرانتتان قاعىلعانداي ۋايىمداماسا دا, ءسال بولسىن: «بۇگىنگى جاڭا تاقىرىپتى دۇرىس تۇسىنبەسە, الداعى ءبىر تاراۋدى ءجوندى ۇقپاي قالاتىن بولدى-اۋ, جۇمىستان قالىپ بىرگە ساباق وقي المايمىن عوي», دەپ الاڭداعانى ءجون سەكىلدى. اينالىپ كەلگەندە, بالانىڭ ۇلگەرىمى ناشارلاسا, ەڭ الدىمەن قينالاتىن دا سول اتا-انانىڭ ءوزى ەمەس پە؟ اقىلى قوسىمشاعا بەرىپ, جەكە مۇعالىم جالداپ الەكتەنەدى, ۇيدە ءۇي تاپسىرماسىن ۇزاعىراق بىرگە ورىنداۋ, بالانى مەكتەپتەن بولەك دايىندىق ورتالىعىنا تاسۋ, ودان قىزمەتكە قاراجات شىعارۋ ۋاقىت تۇرعىسىنان دا, قالتاعا دا شىعىن. مۇنداعى ماسەلە «وسى قازىر تەگىن بەرىلىپ جاتقان ءبىلىمدى ءدال ۋاقىتىندا مۇعالىمنىڭ وزىنەن الىپ قالماساڭ, كەيىن ۋاقىتىڭ مەن اقشاڭدى سارپ ەتۋىڭ ابدەن مۇمكىن», دەپ نارىق زاڭىمەن تۇسىندىرۋگە تىرىساتىن تاربيەنىڭ ساناعا سىڭىرىلمەي جاتقانىندا دا بولار.
نەگىزى ءبىزدىڭ وقۋشىلار جىل ون ەكى ايدىڭ جارتىسىنا جۋىعىن دەمالىسپەن وتكىزەدى ەكەن. «جارايدى, سونىڭ اراسىندا ءبىر كۇن, ءتىپتى 1 اپتا قالعاننان, سونى قاشىقتان وقىعاننان ارتتا قالىپ قويماس» دەگەندى العا تارتاتىندار تابىلار. كەلىسۋگە بولادى-اق, الايدا ەڭ ماڭىزدىسى, ويىمىزدىڭ ءتۇپ توركىنى – ساباقتىڭ بولمايتىنى تۋرالى حابارلاماعا قۋاناتىنداردىڭ ارەكەتى سىني ويلاي الاتىن ادامعا ەرسى ەكەنىندە. ءبارىن قويىپ, ءومىردىڭ وزىنەن مىسال كەلتىرەيىك. استاناداعى اۋا رايى -35 گرادۋستى كورسەتىپ تۇرعاندا جۇمىسقا اياڭداپ بارا جاتىپ مەكتەپ جاسىنداعى كورشى بالانى كوردىم. ول ءوزى وقيتىن مەكتەپتىڭ ارعى جاعىنداعى دۇكەننەن مىقشىڭداپ كارتوپ اكەلە جاتىر ەكەن. ال سول بالا كۇن سۋىق بولعاندىقتان ساباققا بارماي قالعانىن ايتتى. سودان سوڭ ساباق ۋاقىتىندا الاڭدا اسىر سالىپ ويناپ جۇرگەن قاتارلاستارىنا ۇيىنە كىرىپ-شىققاننان كەيىن ويىنعا قوسىلاتىنىن جەتكىزدى. پارادوكس پا – پارادوكس!
