مادەني ءدارىستى ۇيىمداستىرۋشى – مۋزەيدىڭ پەداگوگيكا جانە بالالار شىعارماشىلىعى ءبولىمىنىڭ ادىسكەر مامانى لاۋرا مىرزاحمەت: « ۇلى ۇستاز ءفارابيدىڭ كۇللى ادامزات يگىلىگى ءۇشىن اتقارعان رۋحاني ەڭبەگى ۇشان-تەڭىز. اتاپ ايتساق, تۇلعانىڭ الەمگە ايگىلى ەڭبەگى «قايىرىمدى قالا تۇرعىندارى», «مۋزىكا تۋرالى» تراكتاتتارى ءالى كۇنگە قۇنىن جويعان جوق. اسىرەسە الەم تاريحىندا تۇڭعىش رەت مۋزىكالىق دىبىستاردى قاعازعا ءتۇسىرىپ, نوتا پايدالانعانى زور جاڭالىق», دەدى.
جينالعان قاۋىمعا ءدارىس جۇرگىزگەن ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى, تاريح عىلىمدارىنىڭ دوكتورى ماقسات الپىسبەس ۇلى, ۇلى عالىمنىڭ عۇمىرنامالىق تاريحى مەن شىعارماشىلىق قۋاتى جايلى قىزىقتى اڭگىمە ءوربىتىپ, تۇلعانىڭ ەڭبەگىنە توقتالدى.
«ۇلكەن وقىمىستى ءال-فارابي ء«اربىر ادامنىڭ دۇنيەدە ءوز ورنى بار» دەسە, دانا اباي اتامىز «سەن دە ءبىر كىرپىش دۇنيەگە, كەتىگىن تاپ تا, بار قالان!», دەپ اركىمنىڭ ءوز ورنى بار ەكەنىن تىلگە تيەك ەتكەن. جاس ۇرپاقتىڭ مىندەتى – ىزدەنىس جۇمىسىن جالعاستىرىپ, ءبىلىم قورىن تولىقتىرىپ, تاريحىمىزدىڭ قۇندىلىعىن دالەلدەۋگە بار كۇش-جىگەرىن سالۋ بولسا, ءبىزدىڭ مىندەتىمىز – ۇرپاققا تەرەڭ ءبىلىم مەن تاربيە بەرۋ. ءال-فارابي بابامىز ءبىز ءۇشىن عىلىم-بىلىمگە دەگەن جانكەشتىلىكتىڭ جانە جەتىستىككە جەتۋدىڭ ۇلگىسى», دەدى تاريحشى عالىم.
سونىمەن قاتار مۋزەيلىك ءدارىس بارىسىندا ۇيىمداستىرۋشى تاراپ, كانۋن (جەتىگەن تيپتەس اسپاپ), ميزمار (سىبىزعى تيپتەس اسپاپ), ۋد, تانبۋر, شاحرۋد (دومبىرا تيپتەس اسپاپ), راباب (قوبىز تيپتەس اسپاپ), ت.ب. مۋزىكالىق اسپاپتاردىڭ ەرەكشەلىگىنە توقتالىپ, ولاردىڭ دىبىستالىپ وينالۋى حاقىندا بەينەجازبالار ۇسىندى. سونداي-اق دارىسكە قاتىسۋشىلار كورمەگە قويىلعان عۇلامانىڭ شىعارمالارىمەن تانىستى.
