فوتو: اقوردا
پرەزيدەنت قازاق-تۇرىكمەن قارىم-قاتىناستارى بارلىق باعىتتا دوستىق, تاتۋ كورشىلىك جانە ستراتەگيالىق سەرىكتەستىك رۋحىندا دامىپ كەلە جاتقانىنا نازار اۋداردى.
سونداي-اق اشحاباد باستاماشى بولعان بەيبىتشىلىك جانە سەنىم جىلىنىڭ باستالۋىمەن قۇتتىقتادى. بۇل تۇرىكمەنستاننىڭ بەيتاراپ ساياسي ۇستانىمىنىڭ 30 جىلدىعىمەن قاتار كەلىپ وتىر.
قاسىم-جومارت توقاەۆ تۇرىكمەنستاننىڭ بىتىمگەرشىلىك باستامالارىنىڭ ماڭىزى زور ەكەنىن ايتىپ, ونى تابىستى جۇزەگە اسىرۋ ءۇشىن قازاقستاننىڭ جان-جاقتى قولداۋ كورسەتۋدى جالعاستىرا بەرەتىنىن اتاپ ءوتتى.
ەكى ەل اراسىندا ەكونوميكالىق بايلانىستار قارقىندى دامىپ, مەملەكەتتەر مۇددەسىنە ساي كەلەتىن وزەكتى ماسەلەلەر كونسترۋكتيۆتى تۇرعىدان ىلگەرىلەپ كەلەدى.
ءوز كەزەگىندە راشيد مەرەدوۆ مەملەكەت باسشىسىنا تۇرىكمەنستان پرەزيدەنتى سەردار بەردىمۇحامەدوۆ پەن تۇرىكمەن حالقىنىڭ ۇلتتىق كوشباسشىسى, حالك ماسلاحاتىنىڭ توراعاسى گۋربانگۋلى بەردىمۇحامەدوۆتىڭ ىستىق ىقىلاسىن جەتكىزىپ, ەكى ەل اراسىندا ەكونوميكالىق بايلانىستار قارقىندى دامىپ كەلە جاتقانىن تىلگە تيەك ەتتى.
اڭگىمەلەسۋ بارىسىندا ەنەرگەتيكا, كولىك-ترانزيت جانە مادەني-گۋمانيتارلىق سالالار بويىنشا بۇعان دەيىن جوعارى دەڭگەيدە قول جەتكىزىلگەن ۋاعدالاستىقتاردىڭ جۇزەگە اسىرىلۋ بارىسى تالقىلاندى.
