سونداي ايتۋلى سايىس جۋىردا ەلوردا تورىندە ءوتتى. ەل ەرتەڭى ءۇشىن ەتىگىمەن سۋ كەشكەن الاش قايراتكەرلەرىنىڭ رۋحىنا ارنالعان رەسپۋبليكالىق تۋرنير جالاۋىن جەلبىرەتتى.
«الاشوردا قايراتكەرلەرىنىڭ رۋحىنا تاعزىم ەتىپ, جاس ۇرپاق بويىنا پاتريوتتىق تۇسىنىكتى ءسىڭىرۋ ماقساتىندا وسى ءتۋرنيردى ۇيىمداستىردىق. راس, بۇعان دەيىن ءار سپورتتان ءتۇرلى دەڭگەيدەگى سايىستار ءوتتى. بىراق الاشوردا جەتەكشىلەرىنىڭ ەرەن ەڭبەگىنە قۇرمەت كورسەتىپ, تۇلعالاردىڭ ەسىمىن ۇلىقتاۋ ماقساتىندا دودا ۇيىمداستىرۋ وتە سيرەك. ەلىمىزدە كيكبوكسينگ سپورتىنىڭ دامۋىنا ەلەۋلى ۇلەس قوسىپ جۇرگەن جولداسىم ەرنار وماروۆپەن بىرلەسىپ وقۋشىلار مەن ستۋدەنتتەر اراسىندا وتكىزدىك. بارلىق وڭىردەن جينالعان 500-دەن استام سپورتشى قاتىستى. ءار سالماقتا چەمپيون اتانعان, جۇلدەگەر بولعان سپورتشىلار ماراپاتتالدى», دەدى ب.ايداروۆ.
ءوز قارجىسىنا اۋقىمدى دودا وتكىزگەن ۇيىمداستىرۋشىلار «Alash Orda Cup» رەسپۋبليكالىق ءتۋرنيرى جىل سايىن جالعاسىن تاپسا دەيدى. باعلان ءتۋرنيردىڭ مەدالىن ارنايى تاپسىرىسپەن جاساتقانىن ايتتى. «كەلەشەكتە دە بۇل تۋرنير جالعاسىن تابۋعا ءتيىس. ويتكەنى دوداعا قاتىساتىن سپورتشىلار الاش ارىستارى, ۇلت قايراتكەرلەرىنىڭ عيبراتتى عۇمىرى, ونەگەلى ىستەرى جايىندا ەستەلىكتەردى تىڭدايدى. جاس ۇرپاق ساناسىنا وتانشىلدىق رۋحتى سىڭىرۋگە وسىنداي شارانىڭ تيگىزەر سەپتىگى مول. سوندىقتان دا بۇل ءتۋرنيردى جىل سايىن وتكىزۋ داستۇرگە اينالۋعا ءتيىس», دەپ اتاپ ءوتتى ب.ايداروۆ. كيكبوكسينگ وليمپيادالىق سپورت ءتۇرى سانالمايتىندىقتان دا قارجىلاي قولداۋ كورسەتۋ, دەمەۋشىلىك تانىتۋ كەمشىن سوعاتىنىن جەتكىزدى. الاشوردا قايراتكەرلەرىنىڭ رۋحىنا ارنالعان ءتۋرنيردى جىل سايىن وتكىزۋگە قارجىلاي دەمەيتىن ازاماتتار تابىلسا دەگەن تىلەگىن ايتتى.
باعلان ءوزى دە وسى كيكبوكسينگپەن كاسىبي شۇعىلدانىپ, ءتۇرلى سايىستا جەڭىسكە جەتتى. ءالى دە بابىندا, اۋەسقويلار اراسىندا الەم كۋبوگى, جاھان چەمپيوناتى سىندى ايتۋلى دودالاردان ولجاسىز قايتقان ەمەس. بيىل كۇزدە بىرىككەن اراب امىرلىگىندە الەم چەمپيوناتى وتەدى. ىرىكتەۋدەن وتسە, ەل سەنىمىن ارقالاپ جاھاندىق سايىستا ايقاسقا تۇسپەك.
