فوتو: اشىق دەرەككوز
سايكەسىنشە, ەندى اۋدارىلعان سوما ەڭ تومەنگى جالاقىنىڭ 12 ەسەلەنگەن كولەمى, ياعني 1 020 000 تەڭگەدەن اساتىن سوما ءۇش اي قاتارىنان اۋدارىلسا عانا تەكسەرىس باستالادى.
بۇگىندە بانكتەر قازاقستان ازاماتتارى ءۇش اي قاتارىنان ءارتۇرلى تۇلعالاردان 100-دەن استام اۋدارىم السا, ولار تۋرالى دەرەكتەردى سالىق ورگاندارىنا بەرۋگە مىندەتتى. تاعى ءبىر ماڭىزدى كريتەري - اقشا تۇسكەن ەسەپشوت كاسىپكەرلىك قىزمەتتى جۇزەگە اسىرۋ ءۇشىن ارنالماعان بولۋى ءتيىس.
ەكىنشى دەڭگەيلى بانكتەرگە ءۇش اي ىشىندە 1,02 ميلليون تەڭگەدەن كەم اقشا العان قازاقستان ازاماتتارى تۋرالى سالىق ورگاندارىنا دەرەكتەر بەرمەۋگە رۇقسات ەتىلەدى. بۇل جاعداي اۋدارىمدار سانى 100-دەن كوپ بولسا دا, قولدانىلادى.
قارجى ءمينيسترىنىڭ ءتيىستى بۇيرىعى قازىرگى ۋاقىتتا ۇلتتىق بانكتە قارالىپ جاتىر. ياعني, شەشىم ءالى قابىلدانعان جوق.
ەستەرىڭىزگە سالا كەتەيىك, بۇعان دەيىن ۇكىمەت ءموبيلدى اۋدارىمداردى تەكسەرۋ شەگىن 255 مىڭ تەڭگە كولەمىندە بەكىتۋدى جوسپارلاعان ەدى.
