سۋرەتتى تۇسىرگەن – يۋري بەككەر
كونتسەرتتىك باعدارلامادا قازاقستان, رەسەي, وزبەكستان جانە تاتارستاننىڭ تانىمال حورەوگرافتارىنىڭ قويىلىمدارى ۇسىنىلدى. جاڭادان قۇرىلعان جاس شىعارماشىلىق ۇجىمنىڭ الماتىداعى العاشقى كونتسەرتىن مادەنيەت جانە اقپارات ءمينيسترى ايدا بالاەۆا, سونداي-اق مادەنيەت, ونەر جانە قوعام قايراتكەرلەرى تاماشالادى.
بەلگىلى ونەر شەبەرلەرى مەن جاس تالانتتار جاپپاي جانە جەكە حورەوگرافيالىق كومپوزيتسيالار, اسپاپتىق جانە ۆوكالدىق نومىرلەردى ورىندادى. الماتىلىق تالعامپاز كورەرمەن الدىندا شابىتپەن ورىندالعان «كۇي شاشۋ» ءبيى, حالىق اندەرىنەن پوپۋرري, ۇيعىر, كورەي, تاتار بيلەرى جانە باسقا دا ساحنالىق قويىلىمداردان زاماناۋي ىزدەنىس ىزدەرى تانىلىپ, تاماشالاعان قاۋىمدى ءتانتى ەتتى.
ءىس-شاراعا روزا باعلانوۆا اتىنداعى «قازاقكونتسەرت» مەملەكەتتىك اكادەميالىق كونتسەرتتىك ۇيىمىنىڭ «استانا سازى» قازاق مەملەكەتتىك فولكلورلىق ءانسامبلى, قۇرمانعازى اتىنداعى قازاق ۇلتتىق كونسەرۆاتورياسى, رەسپۋبليكالىق مەملەكەتتىك اكادەميالىق كورەي مۋزىكالىق كومەديا تەاترى, ا.جۇبانوۆ اتىنداعى مۋزىكا مەكتەبىنىڭ تالانتتى وقۋشىلارى, پ.چايكوۆسكي اتىنداعى الماتى مۋزىكالىق كوللەدجىنىڭ «دوستلۋق» ۇيعىر حالىق اسپاپتار ءانسامبلى, «رۋحسارا» بي ۇجىمى, «ناۆا» ءانسامبلى جانە «باحار» كاۆكاز بي ءانسامبلى قاتىستى.
– بۇل – ۇلتتار مەن مەملەكەتتەر اراسىنداعى مادەنيەتارالىق ديالوگتىڭ ۇلگىسى. بەيبىتشىلىك پەن مادەني ديپلوماتيانىڭ تۋىن كوتەرگەن انسامبل ورتالىق ازيانىڭ عانا ەمەس, كۇللى الەمنىڭ بىرلىگى ءۇشىن ءۇن قاتادى. شىعارماشىلىق ۇجىمنىڭ قۇرامىندا ءارتۇرلى ۇلتتىڭ تالانتتى ۇل-قىزدارى ونەر كورسەتەدى. نەگىزىنەن حورەوگرافيا اكادەمياسىنىڭ تۇلەكتەرى جۇمىس ىستەيتىن «Birlik» ءانسامبلىنىڭ قۇرىلعانىنا ءبىر جىل عانا بولسا دا, وسى ۋاقىت ارالىعىندا ول تۇركيا, رەسەي, تۇرىكمەنستان كورەرمەندەرىنىڭ الدىندا تابىستى ونەر كورسەتتى. انسامبل قۇرامىندا وزگە ارتىستەن بولەك, 24 ءبيشى بار. بيىل العاش رەت ەۋروپاعا ساپار شەگىپ, پاريج تورىندە كونتسەرت بەرۋدى جوسپارلاپ وتىرمىز, – دەيدى «Birlik» ءانسامبلىنىڭ كوركەمدىك جەتەكشىسى ءارى ءبيشىسى انەل ماراباەۆا.
كونتسەرتتىڭ باستى ماقساتى – كورەرمەندەردى ءارتۇرلى ەتنوستاردىڭ بي, ءان جانە مۋزىكالىق شىعارمالارىن قامتيتىن ەلىمىزدىڭ باي ۇلتتىق ونەرىمەن تانىستىرۋ. كونتسەرت ەلىمىزدىڭ بىرلىگى مەن مادەني ارتۇرلىلىگىن كورسەتەتىن, كەلىسىم يدەيالارىن ناسيحاتتاۋعا شاقىراتىن شىعارماشىلىق الاڭعا اينالدى.
ايتا كەتەيىك, «Birlik» ءانسامبلى 2024 جىلدىڭ 1 ناۋرىزىندا قۇرىلدى. بۇل – قازاقستان مەن تمد-داعى العاشقى كوپۇلتتى ءان مەن بي ءانسامبلى. ۇجىمنىڭ بىرەگەي رەپەرتۋارى قازاق حالقىنىڭ تاريحىمەن جانە تاۋەلسىز قازاقستاننىڭ قالىپتاسۋىمەن تىعىز بايلانىستى ەتنوستاردىڭ مۋزىكالىق مۇراسى مەن ونەرىن قامتيدى.
ەلدىڭ ىنتىماعىن دارىپتەپ, ءار ۇلتتىڭ ونەرى مەن مادەنيەتىن ورىستەتۋدى ماقسات ەتكەن «Birlik» ءانسامبلىنىڭ قۇرىلعانىنا جىلعا جۋىق ۋاقىت وتسە دە, ۇجىم مۇشەلەرى وسى كونتسەرت ارقىلى قىسقا مەرزىم ىشىندە رەپەرتۋار قورىن تولىقتىرۋدا تالماي ەڭبەك ەتكەنىن تانىتتى. كونتسەرت سوڭىندا مادەنيەت جانە اقپارات مينيسترلىگىنىڭ اتىنان شىعارماشىلىق ۇجىمعا ىقىلاس گ ۇلى تارتۋ ەتىلدى.
الماتى
