سۋرەت: gorod-zarechny.ru
وسىدان 9 جىل بۇرىن «قازپوشتا» اق-نىڭ گازەتتەردى تاسىمالداۋ تاريفتەرىن كوتەرۋ تۋرالى حابارلاماسىنان كەيىن گازەتتى شىعارۋدان بولەك, جازدىرۋ, تاراتۋ قىزمەتىن دە ءوزىمىز ۇيىمداستىرۋدى دا قولعا العان ەدىك. مۇنداي قادامعا بارۋىمىزعا باسپاسوزگە جازىلۋدان «قازپوشتاعا» تۇسكەن قارجىنى سەرىكتەستىك قىزمەتكەرلەرىنە جالاقى, كوممۋنالدىق جانە وزگە دە شىعىندار تولەمىنە سۇرانىس ارقىلى الىپ وتىرۋىمىز دا تۇرتكى بولدى.
اۋەلگىدە قاجەتتى گازەت تاراتۋشىلار سانى جانە جۇمسالاتىن قارجى كولەمى ەسەپتەلدى. وسىلايشا, ءباسپاسوز جانە تاراتۋ ءبولىمى قۇرىلدى. قازىر قىزىلوردا قالاسى مەن اۋدان ورتالىقتارىن ايتپاعاننىڭ وزىندە وبلىستىڭ ءاربىر اۋىلىندا ءبىزدىڭ مەكەمەنىڭ گازەت تاراتۋشىسى بار. جۇزەگە اسىرۋ ءۇشىن قوسىمشا ءباسپاسوز مامانى, مەنەدجەر, سۇرىپتاۋشى, مەكەنجاي جازۋشى – بارلىعى 28 قىزمەتكەردەن تۇراتىن ءبولىم اشىلدى. سونىمەن قاتار 175 گازەت تاراتۋشى جۇمىسپەن قامتىلدى. گازەتتەر وبلىس كولەمىندەگى 164 ەلدى مەكەنگە جەتكىزىلەدى.
«سىر مەديا» سەرىكتەستىگىنىڭ باسپاسوزگە جازىلۋ جانە تاراتۋ قىزمەتى ءبىر جۇيەگە ءتۇسىپ, باسىلىمدارعا جازىلۋشىلار تاراپىنان سەنىم قالىپتاسىپ, ەلىمىزدە جۇرگىزىلىپ جاتقان مەملەكەتتىك ساياساتتى جەرگىلىكتى تۇرعىندارعا ناسيحاتتاۋ جۇمىسى ۇزدىكسىز جانە ۋاقتىلى جۇرگىزىلىپ كەلەدى. 2022 جىلدان باستاپ رەسپۋبليكالىق «Egemen Qazaqstan», «كازاحستانسكايا پراۆدا», «Ana tili», «Aiqyn», «ليتەر», «تurkistan», «جاس الاش», «قازاق ادەبيەتى», «ۇلان» گازەتتەرىنە جانە «جۇلدىز», «اق جەلكەن», «بالدىرعان» جۋرنالدارىنا جازدىرۋ جانە تاراتۋ قىزمەتتەرى جۇزەگە اسىرىلىپ كەلەدى.
ايماق جۋرناليستيكاسىنداعى باستى ماسەلەنىڭ ءبىرى قارجى پروبلەماسى ەكەنى بەلگىلى. بىزدە مەملەكەتتىك تاپسىرىس, جازىلىم مەن جارنامادان تۇسەتىن قارجىدان باسقا تابىس كوزى جوق. سول سەبەپتى گازەت باسۋ جانە تاراتۋ قىزمەتى سۋبسيديالانسا دەگەن ۇسىنىس بار. مىسالى, «قازپوشتا» اق-عا گازەت تاراتۋ قىزمەتىمەن اينالىسقانى ءۇشىن بەرىلەتىن سۋبسيديانى وڭىرلىك مەرزىمدى باسىلىمدارعا تىكەلەي باعىتتاسا, گازەتتى شىعارۋ مەن تاراتۋ شىعىنى كوپ جەڭىلدەر ەدى.
ۋاقىت وتكەن سايىن گازەت تارالىمى تومەندەپ كەلە جاتقانى ءمالىم. بۇل – بارلىق وڭىرگە ورتاق ماسەلە. مىسالى, 2022 جىلى سەرىكتەستىك گازەتتەرىنىڭ جالپى تارالىمى 77 814 دانا بولسا, 2023–2024 جىلدارى كورسەتكىش 71 779 بولىپ, ەكى جىلدا اجەپتەۋىر ازايدى. جەتى-سەگىز جىل بۇرىن 92 405 دانا گازەتكە دەيىن تاراتقان كەزىمىز بولعان.
بۇعان قوسا جۋرناليستەردى الەۋمەتتىك قولداۋدىڭ پاكەتتەرىن ۇيىمداستىرۋدى قولعا العان ءجون. كاسىبي مەرەكە قارساڭىندا ەلوردا تورىنەن باسپانالى بولۋ باقىتى بۇيىرعان ارىپتەستەر قۋانىشى – بىزگە دە ورتاق. ايماقتاعى جۋرناليستەرگە دە ءدال وسىنداي قولداۋ كورسەتىلسە, نۇر ۇستىنە نۇر بولار ەدى.
مەملەكەتتىك ساياساتتى, رەسپۋبليكا مەن ءوڭىر جاڭالىقتارىن حالىققا جەتكىزۋ قاي كەزدە دە وڭاي بولماعان. سالاداعى سانامالاپ وتكەن ماسەلەلەرگە قاراماستان بيلىك پەن حالىق اراسىنداعى التىن كوپىر مىندەتىن ابىرويمەن اتقارا بەرەمىز.
مارات ارالباەۆ,
«سىر مەديا» جشس باس ديرەكتورى
