ماڭىزدى شارالاردىڭ ءبىرى, ەلىمىزدەگى ەڭ ءىرى بۇقتىرما كوپىرىنىڭ اشىلۋى – تولىقتاي وتاندىق ينجەنەرلەر مەن جۇمىسشىلاردىڭ ەڭبەگى. كوپىر وبلىس تۇرعىندارىنىڭ تۇرمىس-تىرشىلىگىن وڭتايلاندىرىپ, كوپتەگەن سالانىڭ دامۋىنا لەپتى ۇلەسىن قوساتىنى ءسوزسىز.
– پرەزيدەنتتىڭ كاتونقاراعاي مەن زايساندا اۋەجاي سالۋ تۋرالى تاپسىرماسى ءوڭىردىڭ دامۋىنا ۇلكەن سەرپىن بەردى. سونىمەن قاتار كورشى ەلدەرمەن وزەن بايلانىسىن جانداندىرۋ اياسىندا كەمە كولىگىن قالپىنا كەلتىرۋدى دە جوسپارلاپ وتىرمىز, – دەدى وبلىس اكىمى ەرمەك كوشەرباەۆ.
ەگەر بۇل جوبا جۇزەگە اسىپ جاتسا, شىعىس قازاقستان تۇكپىردەگى تۇيىق ايماقتان كولىك-لوگيستيكالىق حابقا اينالىپ, رەسەي مەن قىتاي اراسىنداعى ەڭ قىسقا, ءارى جىلدام كولىك باعىتىنا يە بولادى. جالپى, ايماقتىڭ بارلىق الەۋمەتتىك-ەكونوميكالىق ينديكاتورىندا وڭ وزگەرىس بار. 2022 جىلى وبلىس بيۋدجەتى 366 ملرد تەڭگەنى قۇراسا, بىلتىر بۇل كورسەتكىش 580 ملرد تەڭگەگە جەتتى. 2022 جىلى دامۋ بيۋدجەتى 90 ملرد بولسا, بىلتىر 130 ملرد تەڭگەنى قۇرادى. وبلىس اكىمىنىڭ ايتۋىنشا, جەرگىلىكتى سالىق جاقسى ديناميكا كورسەتكەنىمەن, 36 پايىزدان اسپايدى. سول تۇرعىدا بۇل باعىتتا قوسىمشا كىرىس كوزى الگوريتمىن كۇشەيتۋ كەرەك.
وبلىس ەكونوميكاسىنىڭ نەگىزگى بولىگى, شامامەن 40%-ى ونەركاسىپكە تيەسىلى. وڭىردە شاعىن جانە ورتا بيزنەستى دامىتۋ ارقىلى ەكونوميكانى ءارتاراپتاندىرۋ قولعا الىنعان. وسى باعىتتا حالىققا لايىقتى جۇمىس بەرەتىن, تابىس اكەلەتىن, قوماقتى سالىق تۇسىمدەرىن قامتاماسىز ەتەتىن سالالار بەكىتىلدى. تۇتىنۋ مەن ءوندىرىس بالانسىن ساراپتاپ, كورشى وبلىستار مەن مەملەكەتتەردىڭ نارىعىن زەرتتەي كەلە, تابيعي-كليماتتىق جاعدايلاردى ەسكەرە وتىرىپ, ەكسپورتتىق الەۋەتكە قاجەتتى تۇزەتۋلەر ەنگىزىلدى.
بارلىق قالا, اۋداندا ەكونوميكالىق ءوسۋ نۇكتەلەرىنىڭ بەس جىلدىق جوسپارى, اۋىلدىق وكرۋگتەرگە قاتىستى جول كارتالارى بەكىتىلدى. كەيىنگى ءبىر جىلدا 46 جاڭا ءوندىرىس ىسكە قوسىلدى. ونىڭ ىشىندە جالپىۇلتتىق پۋل اياسىندا 45 ملرد تەڭگەگە 10 جوبا جاسالدى.
جۇمىسشى ماماندىقتارى جىلى اياسىندا كادر تاپشىلىعىن ازايتۋ ماقساتىندا وبلىستا قۇرىلىس, اۋىل شارۋاشىلىعى, اۆياتسيا, ەنەرگەتيكا, سۋ كولىگى سالالارىنا قاتىستى ءتۇرلى باعدارلامالار قاراستىرىلىپ جاتىر. «وتباسى بانكىمەن» بىرلەسە وتىرىپ, «شىعىس مامانى» قولجەتىمدى يپوتەكاسى ىسكە قوسىلدى.
– ەكونوميكانىڭ تابيعي رەسۋرستارعا تاۋەلدىلىگىن ازايتۋ جونىندەگى ۇكىمەت ساياساتى اياسىندا جەر قويناۋى بايلىقتارىنىڭ مەملەكەت پەن حالىققا بارىنشا پايدا اكەلۋىن قامتاماسىز ەتۋ باعىتىندا دا جۇمىس اتقارىلىپ جاتىر. ەكى جىل ىشىندە كاسىپورىندارمەن جاسالعان 14 كەلىسىمشارت نەگىزىندە الەۋمەتتىك تولەمدەر 34 ەسە كوبەيدى, – دەيدى ايماق باسشىسى.
«اۋىلدىق دەنساۋلىق ساقتاۋدى جاڭعىرتۋ», «جايلى مەكتەپ» ۇلتتىق جوبالارى الەۋمەتتىك نىسانداردى سالۋدىڭ جاڭا ستاندارتتارىن ەنگىزدى. بۇل جۇمىستار اسىرەسە اۋىلدىق جەرلەردە مىقتاپ قولعا الىندى. 2026 جىلعا قاراي حالىقتى 100% ساپالى اۋىزسۋمەن قامتاماسىز ەتۋ جۇمىستارى دا رەت-رەتىمەن جۇزەگە اسىرىلىپ جاتىر. ەلىمىزدىڭ سۋ رەسۋرستارىنىڭ 40 پايىزى شىعىس قازاقستاندا. بىلتىرعى قيىن جاعدايلاردا الدىن الا جاسالعان شارالاردىڭ ناتيجەسىندە ەلدى مەكەندەر توپان سۋدان زارداپ شەككەن جوق. شىعىس ورمان قورىنا دا باي ەكەنىن ەسكە سالساق, تابيعي ءورتتىڭ الدىن الۋ, بولدىرماۋ دا – باستى نازاردا. بۇل تۇرعىدا سوڭعى ەكى جىلدا ءتيىستى قىزمەتتىڭ تەحنيكالىق بازاسى كۇشەيتىلدى.
وبلىس باسشىسىنىڭ ايتۋىنشا, حالىقتىڭ باستاماسىمەن «وسكەمەن تىنىسى» قوعامدىق ەكوبيۋروسى ۇيىمداستىرىلىپ, ەكوپروبلەمالار كۇن تارتىبىنەن تۇسپەيتىن كۇلبىلتەلى ماسەلە بولىپ بەلگىلەندى. «تازا قازاقستان» ۇلتتىق جوباسى مەن «جاسىل ايماق» وڭىرلىك باعدارلاماسى دا ازاماتتاردىڭ ەكولوگيالىق مادەنيەتىن كوتەرۋدە ەرەكشە ءرول اتقاردى. بۇل اكتسياعا اسىرەسە جاستار بەلسەنە قاتىستى.
شىعىس قازاقستان وبلىسى
