ەڭبەك جانە حالىقتى الەۋمەتتىك قورعاۋ مينيسترلىگى مەملەكەتتىك ەڭبەك ينسپەكتسياسى كوميتەتىنىڭ مالىمەتىنشە, بىلتىر ءوندىرىس ورىندارىنداعى جاراقات الۋ دەرەگى 2023 جىلمەن سالىستىرعاندا 4,5%-عا تومەندەگەن. دەگەنمەن ەلىمىزدىڭ وندىرىستىك ايماقتارىندا جۇمىسكەرلەردىڭ جاراقات الۋ وقيعاسى ءجيى تىركەلەدى. ماسەلەن, قاراعاندى وبلىسىندا – 159, شىعىس قازاقستان وبلىسىندا – 124, پاۆلودار وبلىسىندا – 112, اباي وبلىسىندا – 101, قوستاناي وبلىسىندا 91 ادام زارداپ شەككەن. سونداي-اق الماتى قالاسىندا 116 ادام جۇمىس كەزىندە ءتۇرلى جاراقات العان. اسىرەسە تاۋ-كەن مەتاللۋرگيا وندىرەتىن ونەركاسىپتەردە (18,3%), ودان كەيىن قۇرىلىس سالاسىندا (10,1%.) جۇمىسكەرلەردىڭ وقىس وقيعاعا ۇشىراۋ فاكتىسى ءجيى تىركەلگەن.
قىزمەتكەرلەردىڭ جۇمىس ۇستىندە ارانداۋىنىڭ باسىم كوپشىلىگى وندىرىستەگى جۇمىستىڭ ءتيىستى دەڭگەيدە ۇيىمداستىرىلماۋى (35,5%), جاپا شەگۋشىنىڭ ورەسكەل قامسىزدىعى (31%), جول قوزعالىسى ەرەجەلەرىنىڭ بۇزىلۋى (8,2%), ەڭبەك قاۋىپسىزدىگى, ەڭبەكتى قورعاۋ ەرەجەلەرىن ساقتاماۋدان (7,6%) تۋىنداعان.
قاۋىپسىز ەڭبەك جاعدايىن قالىپتاستىرىپ, وندىرىستەگى جاراقاتتى ازايتۋ – ۇكىمەت پەن ەڭبەك جانە حالىقتى الەۋمەتتىك قورعاۋ مينيسترلىگىنىڭ نەگىزگى مىندەتتەرىنىڭ ءبىرى. بەس جىلدا مەملەكەتتىك ورگاندار مەن جۇمىس بەرۋشىلەردىڭ ەڭبەكتى قورعاۋعا قاتىستى جۇزەگە اسىرعان كەشەندى شارالاردىڭ ناتيجەسىندە, ازاماتتاردىڭ وندىرىستە جاراقات الۋ دەڭگەيى 6,3%-عا تومەندەدى.
پروفيلاكتيكا مەن بۇزۋشىلىقتى الدىن الۋ ماقساتىندا ەلىمىزدىڭ 3262 كاسىپورنىنا قاۋىپسىزدىك پەن ەڭبەكتى قورعاۋ ستاندارتتارى ەنگىزىلدى. 2019 جىلدان باستاپ مينيسترلىك «نولدىك جاراقات – Vision Zero» تۇجىرىمداماسىن جەتىلدىرۋگە ايرىقشا نازار اۋدارىپ وتىر. بۇل تۇجىرىم 605 كاسىپورىندا ىسكە قوسىلعان.
قۇرىلىس نىساندارىندا باس مەردىگەردىڭ ەڭبەك قاۋىپسىزدىگى ماسەلەلەرى جونىندە بارلىق قوسالقى مەردىگەرلەرگە جاۋاپكەرشىلىك پەن باقىلاۋدى كۇشەيتەتىن مودەل ەنگىزۋ قولعا الىنىپ, 318 كاسىپورىندا ىسكە قوسىلدى. جۇمىس بەرۋشىلەرگە ەڭبەكتى قورعاۋ تالاپتارىنىڭ ساقتالۋىن ءوزىن-ءوزى تەكسەرۋدەن وتۋگە مۇمكىندىك بەرەتىن «ونلاين ەڭبەك كونسۋلتانتى» ەلەكتروندىق سەرۆيسى دە بار. سەرۆيستى بۇگىنگە دەيىن 42 985 جۇمىس بەرۋشى پايدالانعان.
