سۋرەتتى تۇسىرگەن – جۇماباي مۇسابەك
كاسىپورىن «قورعاس-شىعىس قاقپاسى» ارنايى ەكونوميكالىق ايماعىندا ورنالاسادى. جەل گەنەراتورلارى زاۋىتىنىڭ وندىرىستىك قۋاتى – جىلىنا 2 گۆت گەنەراتسيا. ەنەرگيانى جيناقتاۋ جۇيەلەرىن شىعارۋ قۋاتى – جىلىنا 1 گۆت. جوباعا 40 ملن دوللار ينۆەستيتسيا سالىنعان. كەشەن ەلىمىزدەگى «جاسىل» ەنەرگەتيكانىڭ دامۋىنا, ەكولوگيانىڭ جاقسارۋىنا جانە جالپى ەكونوميكالىق دامۋعا وڭ اسەر ەتپەك.
ينۆەستيتسيالىق جوبانى «قازاقستاندىق كوممۋنالدىق جۇيەلەر» جشس مەن قىتايلىق «Envision Energy» كومپانياسى بىرلەسىپ ىسكە اسىرادى. كاسىپورىن جىل سايىن جەل گەنەراتورلارىنىڭ 250 جيىنتىعىن جانە ەنەرگيانى جيناقتاۋ جۇيەلەرىنىڭ 100 جيىنتىعىن شىعارماق. كاپسۋلا سالۋ راسىمىنە قاتىسقان وبلىس اكىمىنىڭ ورىنباسارى اسەت قاناعاتوۆ ءوڭىردىڭ ەكونوميكالىق ءوسۋىنىڭ ماڭىزدى نۇكتەلەرىنىڭ ءبىرى رەتىندە «قورعاس – شىعىس قاقپاسى» ارنايى ەكونوميكالىق ايماعىن دامىتۋعا باسا نازار اۋداردى.
«قىتايدان تمد ەلدەرىنە, ەۋروپا مەن ازياعا شىعاتىن ماڭىزدى باعىتتاردىڭ قيىلىسىندا وبلىستىڭ ەكونوميكالىق ءوسۋ نۇكتەسىنىڭ ءبىرى قورعاس تورابى ورنالاسقان. توراپتىڭ ماڭىزدى ءارى ينۆەستورلار ءۇشىن تارتىمدى ەلەمەنتى – «قورعاس-شىعىس قاقپاسى» ارنايى ەكونوميكالىق ايماعى. بۇگىندە ەركىن ەكونوميكالىق ايماققا قاتىسۋشىلاردىڭ بىرىڭعاي تىزىلىمىندە جالپى قۇنى 907 ملرد تەڭگە بولاتىن جوبالارى بار 68 قاتىسۋشى تىركەلگەن. 2030 جىلعا دەيىن 47 جوبانى ىسكە اسىرۋ جوسپارلانۋدا. اەا اۋماعىندا 51 ملرد تەڭگەدەن استام سوماعا 21 جوبا ىسكە اسىرىلدى. جەل گەنەراتورلارى مەن ەنەرگيا جيناقتاۋ جۇيەلەرىن شىعاراتىن زاماناۋي زاۋىتتىڭ قۇرىلىسى – مەملەكەت پەن بيزنەستىڭ ءتيىمدى بىرلەسكەن جۇمىسىنىڭ ايقىن ناتيجەسى», دەدى ءا.قاناعاتوۆ.
«قازاقستاندىق كوممۋنالدىق جۇيەلەر» جشس باقىلاۋ كەڭەسىنىڭ توراعاسى دىنمۇحامەت يدريسوۆ كاسىپورىننىڭ ىسكە قوسىلۋى جەل گەنەراتورلارى مەن ەنەرگيا جيناقتاۋ جۇيەلەرىنىڭ ءوندىرىسىن جولعا قويۋعا عانا ەمەس, سونىمەن قاتار زاماناۋي تەحنولوگيالاردى تارتۋعا مۇمكىندىك بەرەدى دەيدى.
«جوبانى ىسكە قوسۋ يمپورتقا تاۋەلدىلىكتى قىسقارتادى, ەنەرگەتيكالىق قاۋىپسىزدىكتى نىعايتادى, جۇمىس ورىندارىن قۇرادى, ەكسپورتتىق مۇمكىندىكتى كەڭەيتىپ, تومەن كومىرتەكتى ەكونوميكاعا كوشۋدى جەدەلدەتەدى. ءوندىرىستىڭ باستاپقى كەزەڭىندە وتاندىق قامتۋ ۇلەسى 30% بولادى. بولاشاقتا كەزەڭ-كەزەڭىمەن 90%-عا جەتكىزىلەدى», دەدى د.يدريسوۆ.
كاسىپورىن 2026 جىلدىڭ III توقسانىندا ىسكە قوسىلماق. ءونىمنىڭ 60%-ى ىشكى نارىققا, 40%-ى ورتالىق ازيا مەن كاۆكاز ەلدەرىنە ەكسپورتتالادى.
جەتىسۋ وبلىسى
