تۋرين تورىندە ءان-ۇرانىمىزدى شىرقاتىپ, بايراعىمىزدى جەلبىرەتكەن ساڭلاقتاردىڭ جەڭىسى ماقتاۋعا لايىق. جاسوسپىرىمدەر اراسىندا الەم چەمپيونى اتاعىنا يە اناستاسيا گورودكو ەرەسەكتەر ساپىنداعى العاشقى دوداسىندا دا توپ جارىپ, مەرەيىمىزدى اسىردى. فريستايل-موگۋلدان جەكەلەي سىندا ءوزىنىڭ شەبەرلىگىمەن ءتانتى ەتكەن ساڭلاق پارالەلل-موگۋلدا دا قارا ءۇزىپ, قىسقى ۋنيۆەرسيادا ويىندارىنان ەكى التىن مەدال ولجالادى. شىعىس قازاقستان وبلىستىق سپورت مەكتەبىنىڭ تۇلەگى, قازاق تۋريزم جانە سپورت اكادەمياسىنىڭ 3-كۋرس ستۋدەنتى ا.گورودكو بولاشاعىنان مول ءۇمىت كۇتتىرەدى. بۇعان دەيىن جاسوسپىرىمدەر اراسىندا دارالانعان ساڭلاق الەم نازارىنا ىلىكتى. كەلەسى جىلى يتاليا ەلى قىسقى وليمپيا ويىندارىن وتكىزەدى. مىنە, وسى دوداعا ۇكىلەپ قوساتىن ۇزدىگىمىزدىڭ ءبىرى – اناستاسيا گورودكو.
ءۇشىنشى التىن مەدالدى ەنشىمىزگە بوكتەرگەن نيكيتا اكيموۆ تا – شىعىس قازاقستان وبلىسىنداعى جوعارى سپورت شەبەرلىگى مەكتەبىنىڭ تۇلەگى. بياتلوننان 10 شاقىرىمدىق سايىستا الدىنا قارا تۇسىرمەگەن «ميراس» ۋنيۆەرسيتەتى ستۋدەنتىنىڭ كەلەشەگىنەن دە كەمەل ءۇمىت كۇتەمىز.
قىسقى ۋنيۆەرسيادا ويىندارىندا كۇمىس مەدالمەن كۇپتەلگەن سپورتشىلارىمىزدىڭ دا جەتىستىگى ايتارلىقتاي. فريستايل-موگۋلدان جەكەلەي سىندا 4-ورىنعا تۇراقتاعان اياۋلىم امىرەنوۆا پارالەلل-موگۋلدا كۇمىس مەدال يەلەندى. ءال-فارابي اتىنداعى قازاق ۇلتتىق ۋنيۆەرسيتەتىنىڭ دوكتورانتى اياۋلىم تۋريننەن ولجاسىز قايتپادى. اياۋلىم 2018 جىلى وڭتۇستىك كورەيانىڭ پحيونچحان قالاسىندا, 2022 جىلى قىتاي استاناسى بەيجىڭدە وتكەن قىسقى وليمپيا ويىندارىنا قاتىستى. 2017 جىلى ەۋروپا كۋبوگىنىڭ كەزەڭدەرىنە جۇلدە ەنشىلەدى. فريستايل-موگۋلدان ەرلەر اراسىنداعى سىندا كۇمىس مەدال ەنشىلەگەن انتون بوندارەۆ – س.امانجولوۆ اتىنداعى شىعىس قازاقستان ۋنيۆەرسيتەتىنىڭ ستۋدەنتى. شاڭعى جارىسىنان ەكى قاشىقتىقتا دا كۇمىس مەدال ولجالاعان پاراشاڭعىشى دەنيس زينوۆتىڭ ەڭبەگى ەرەن. ول – ەل سپورتىنىڭ ۇستاحاناسى سانالاتىن قازاق سپورت جانە تۋريزم اكادەمياسىنىڭ ستۋدەنتى.
بۇل وقۋ ورداسىنىڭ وزگە ستۋدەنتتەرى دە تۋرين تورىندە تولايىم تابىسقا قول جەتكىزدى. قىسقى ۋنيۆەرسيادا ويىندارىنىڭ قولا مەدالىن پاراشاڭعىدان رومان قۇربانوۆ ەكى قاشىقتىقتا ەنشىلەسە, مانەرلەپ سىرعاناۋدان سوفيا سامودەلكينا, بياتلوننان ارينا كريۋكوۆا, كيريلل باۋەر قولا جۇلدەگەر اتاندى. تورتەۋى دە قازاق سپورت جانە تۋريزم اكادەمياسىنىڭ ستۋدەنتتەرى.
شورت-ترەكتەن ارالاس ەستافەتا سايىسىندا ەل قورجىنىنا قولا جۇلدەنى باتىس قازاقستان يننوۆاتسيالىق-تەحنولوگيالىق ۋنيۆەرسيتەتىنىڭ ستۋدەنتى الينا اجىعاليەۆا, ۆالەري كليمەنكو, دىنمۇحامەدالديار ءتاجىباي, م.ح.دۋلاتي اتىنداعى تاراز ۋنيۆەرسيتەتىنىڭ ستۋدەنتى ماليكا ەرمەك سالدى. ەكى جىل بۇرىن اقش-تا وتكەن قىسقى ۋنيۆەرسيادا ويىندارىندا ارالاس ەستافەتادان قىز-جىگىتتەر كۇمىس مەدال ەنشىلەگەن بولاتىن. تۋريندە سول بيىگىنە جەتە المادى. ەرلەر قۇراماسى ساپىندا دىنمۇحامەدالديار ءتاجىباي, ۆالەري كليمەنكو, ايبەك تەمىرحان, سانجار جانىسوۆ, الىشەر ابدۋلقاتىموۆ سىنعا ءتۇسىپ, قولا مەدال يەلەندى.
ءحححىى دۇنيەجۇزىلىك قىسقى ۋنيۆەرسيادا ويىندارىندا 96 مەدال جيىنتىعى بايگەگە تىگىلدى. 57 ەلدەن كەلگەن 2000-نان استام ستۋدەنت-سپورتشى 10 كۇن بويى دوداعا ءتۇستى.
ءبىزدىڭ سپورتشىلار دۇنيەجۇزىلىك قىسقى ۋنيۆەرسيادا ويىندارىنا 1993 جىلدان بەرى تۇراقتى قاتىسىپ كەلەدى. سول جىلى پولشانىڭ زاكوپانە قالاسىندا وتكەن الاماندا ەلىمىز سپورتشىلارى 1 كۇمىس مەدالدى مىسە تۇتتى. 1995 جىلى يسپانيانىڭ حاكا قالاسى قابىلداعان قىسقى ۋنيۆەرسيادا ويىندارىنان 2 التىن, 1 قولا مەدالمەن ورالدى. 1997 جىلى وڭتۇستىك كورەيا, 1999 جىلى سلوۆاكيا, 2001 جىلى پولشا ەلىندە وتكەن ويىنداردان سپورتشىلارىمىز جۇلدەسىز قايتتى. 2003 جىلى يتاليادا وتكەن جارىستان 2 التىن, 1 كۇمىس, 1 قولا, 2005 جىلى اۋستريا ەلى وتكىزگەن دودادان 4 التىن, 1 كۇمىس, 2 قولا مەدال ولجالادى. 2007 جىلى يتاليانىڭ تۋرين قالاسى قابىلداعان قىسقى ۋنيۆەرسيادادا 2 التىن, 1 كۇمىس, 2 قولا جۇلدە بۇيىردى. 2009 جىلى قىتايدىڭ حاربين قالاسىندا ستۋدەنت سپورتشىلارىمىز مەدال الماسا, 2011 جىلى تۇركيادا 1 التىن, 5 قولا مەدال ەنشىلەيدى. 2013 جىلى يتاليانىڭ ترەنتينو قالاسىن دۇبىرگە بولەگەن اق الاماندا 2 التىن, 2 كۇمىس, 1 قولا مەدال بۇيىردى. 2015 جىلى دۇنيەجۇزىلىك قىسقى ۋنيۆەرسيادا ويىندارىن يسپانيا مەن چەحيا تىزە قوسىپ وتكىزدى دە, ءبىزدىڭ ەلدەن بارعان سپورتشىلار 5 التىن, 6 كۇمىس مەدال ەنشىلەدى. 2017 جىلى ەلىمىز تۇڭعىش رەت قىسقى ۋنيۆەرسيادا ويىندارىن وتكىزدى. الماتى قالاسىنداعى دودادا سپورتشىلارىمىز 11 التىن, 8 كۇمىس, 17 قولا مەدال يەلەنىپ, تاريحي ناتيجە تىركەدى. ودان كەيىن 2019 جىلى رەسەيدە وتكەن سايىستا 4 كۇمىس, 3 قولا بۇيىردى. 2023 جىلى اقش ۇيىمداستىرعان دودادا 3 التىن, 4 كۇمىس, 4 قولا مەدال يەلەندى.
