حالىقارالىق «THE» باعالايتىن 11 باعىتتىڭ ىشىندە اتالعان جوعارى وقۋ ورنىنىڭ 9 باعدارلاماسى ۇزدىك 500-گە ەندى. سونداي-اق NU ءبىلىم سالاسىنداعى الەمدەگى ۇزدىك 200 ۋنيۆەرسيتەتتىڭ قاتارىنا كىردى. نەگىزىنەن, بۇل رەيتينگكە كىرۋ وڭاي ەمەس. ونىڭ ءوز كريتەريى بار. ماسەلەن, ۋنيۆەرسيتەتتەر وقىتۋ, عىلىمي قىزمەت, زەرتتەۋ ساپاسى, وندىرىسپەن ىنتىماقتاستىق جانە ينتەرناتسيونالداندىرۋ دارەجەسى بويىنشا باعالانادى.
بۇدان ەكى جىل بۇرىن NU العاش رەت بەدەلدى «THE» رەيتينگىنە ەنىپ, 501-600 دياپازونىندا ورىن العان ەدى. سودان باستاپ, جوعارى وقۋ ورنىنىڭ ءبىلىم سالاسىنداعى باعدارلامالارى 251-300-دەن 176-200-گە دەيىن بىردەن كوتەرىلدى. ال مەديتسينا جانە دەنساۋلىق ساقتاۋ باعدارلامالارى ورنىن 501-600-دەن 401-500-گە دەيىن جاقسارتتى. سونىمەن قاتار ۇزدىك 500 باعدارلامانىڭ قاتارىنان ۋنيۆەرسيتەتتىڭ ينجەنەريا, الەۋمەتتىك جانە گۋمانيتارلىق عىلىم باعدارلامالارى دا كورىندى.
NU پرەزيدەنتى دوكتور ۆاكار احماد جوعارى وقۋ ورىننىڭ العان اسۋلارىنا كوڭىلى تولاتىنىن جەتكىزدى.
«مەن مۇنى ۋنيۆەرسيتەتىمىزدىڭ اكادەميا جانە زەرتتەۋ سالاسىندا جوعارى دەڭگەيگە ۇمتىلىپ وتىرعانىمىزدىڭ بىردەن-ءبىر دالەلى دەر ەدىم. ارينە, بۇل وقۋ ورنى ۇجىمىنىڭ ءبىر كىسىدەي جۇمىلعان ەڭبەگىنىڭ ناتيجەسى. سونداي-اق ارىپتەستەرىمنىڭ ءوز ىستەرىنە دەگەن ادالدىعىنىڭ بەلگىسى. بۇعان ماقتانامىز. بىراق مۇنىمەن توقتاپ قالمايمىز. ودان ءارى دامي بەرەمىز», دەدى NU پرەزيدەنتى.
شىندىعىن ايتقاندا, بۇل جەتىستىكتەر – NU-دىڭ جوعارى ءبىلىم بەرۋ مەن مەديتسينا مەكتەبىنىڭ اتقارعان جۇمىستارىنىڭ ناتيجەسى. 2012 جىلى ىرگەتاسى قالانعان جوعارى ءبىلىم بەرۋ مەكتەبى «University of Cambridge جانە University of Pennsylvania» سياقتى ءبىلىم سالاسىنداعى الەمدىك كوشباسشىلارمەن جاقىن بايلانىسىپ, جاقسى جۇمىس ىستەدى. وسى مەكتەپتى اشىلعان كۇننەن باسقارىپ كەلە جاتقان ايدا ساعىنتاەۆا بۇل – ەلىمىزدەگى ءبىلىم سالاسىن دامىتۋدا قانشا العا جىلجىعانىمىزدىڭ بەلگىسى ەكەنىن ايتادى.
ء«بىر جاعىنان, وسىنداي جەتىستىككە جەتۋ جولىندا وقىتۋشىلار, قىزمەتكەرلەر, ستۋدەنتتەر كوپ ەڭبەك ءسىڭىردى. ەندى سونىڭ ناتيجەسىن كورىپ وتىرمىز. شىن مانىندە, حالىقارالىق ءبىلىم ارەناسىندا سالماعى بار ويىنشىعا اينالدىق. وسى ەلدە تۋعان ازامات رەتىندە مەن مۇنى جەكە جەتىستىگىم دەپ بىلەمىن. ءبىز ءوز ەرەكشەلىگىمىزدى ساقتاپ, الەمدەگى اكادەميالىق قاۋىمداستىققا ۇلەس قوسىپ جاتىرمىز», دەدى ول.
جوعارى ءبىلىم بەرۋ مەكتەبىنىڭ زەرتتەۋلەرى ءتورت نەگىزگى تاقىرىپقا باعىتتالعان. ولار: جوعارى ءبىلىمدى ترانسفورماتسيالاۋ, ينكليۋزيۆتى ءبىلىم, ءتىل, مادەنيەت جانە ساياسات, ءبىلىم سالاسىنداعى وزگەرىستەر مەن كوشباسشىلىق.
سونداي-اق بىرەگەي وقۋ ورىننىڭ ۇزدىكتەر قاتارىنان ورىن الۋىنا مەديتسينا مەكتەبىنىڭ دە قوسقان ۇلەسى زور. 2015 جىلى «University of Pittsburgh» مەديتسينا مەكتەبىمەن سەرىكتەستىكتە قۇرىلعان NU مەديتسينا مەكتەبى ەلىمىزدەگى دەنساۋلىق ساقتاۋ جۇيەسىن جاقسارتۋعا ايتارلىقتاي ىقپال ەتىپ وتىر. اتالعان مەكتەپ قۇرىلعاننان باستاپ, عىلىمي زەرتتەۋلەر مەن وسى سالاداعى تىڭ جاڭالىقتاردى ەنگىزۋ ارقىلى مەديتسينالىق قىزمەت كورسەتۋ مودەلىن ازىرلەدى.
ەندى Nazarbayev University 2030 جىلعا قاراي «Times Higher Education» رەيتينگى بويىنشا الەمنىڭ ەڭ ۇزدىك 300 جوعارى وقۋ ورنىنىڭ قاتارىنا كىرۋدى ماقسات ەتىپ وتىر. نەسى بار, بۇل بيىكتەن دە كورىنەتىن كۇن الىس ەمەس سەكىلدى.
