فوتو: pixabay.com
تاياۋدا كاسىپتىك ءبىلىم العان مەكتەپ وقۋشىلارىنىڭ العاشقى لەگى اسپاز جانە كونديتەر ماماندىقتارىن وقىپ يگەرىپ, ديپلومعا يە بولدى. وبلىس ورتالىعىنداعى وسى سالاداعى ۇجىمدار جاس تولقىندى الداعى ۋاقىتتا جۇمىسقا تارتىپ, يگىلىكتى ءىستىڭ العاشقى الىپپەسىن ۇيرەتپەك. مەملەكەت باسشىسى قاسىم-جومارت توقاەۆتىڭ جۇمىسشى ماماندىعىنا نازار اۋدارۋى تەگىن ەمەس.
– بۇل شىنىندا دا وتە وزەكتى ماسەلە, – دەيدى ارداگەر ۇستاز راۋزا بايكەنوۆا, – اتام قازاق «بالانى جاستان» دەپ تەگىن ايتپاعان. كەيىنگى جىلدارى جاستاردىڭ ەڭبەككە دەگەن قۇلشىنىسى كەمىپ كەتتى. ارينە, جوعارى ءبىلىم العان, جاڭا تەحنولوگيالاردى يگەرگەن جاقسى. دەگەنمەن تابيعات سىيلاعان قابىلەت ارقيلى. اركىم ءوزىنىڭ قولىنان كەلەر شارۋانى اتقارۋى كەرەك. بويكۇيەز بالانىڭ ءوسىپ جەتىلۋىنە اتا-انا دا, مەكتەپ تە كىنالى. كوبىنە اتا-انالار باۋىر ەتى بالالارىن وبەكتەپ, جەلگە, كۇنگە تيگىزبەي وسىرەدى. مۇنداي بالالار شەگە قاعا الماسا, قىزدار ينە ۇستاي المايدى. سوندىقتان «ەتى سەنىكى, سۇيەگى مەنىكى» دەمەكشى, كىشكەنتايىنان ەڭبەككە باۋلۋ كەرەك. جوعارىدا اتالعان باعدارلاما بويىنشا كاسىپ يگەرىپ جاتقان بالالار جەردە قالمايدى, تەك ارقايسىسى ءوز سالاسىنىڭ مىقتى مامانى بولۋى كەرەك. سوندا باعى جانادى.
وڭىردە قازىر «تالاپكەر» قاناتقاقتى جوباسى اياسىندا ەلۋدەن استام وقۋشى كاسىبي ءبىلىم الىپ وتىر. وبلىستىق ءبىلىم باسقارماسى باسشىسىنىڭ ورىنباسارى ۆالەري گامازوۆتىڭ ايتۋىنشا, وڭىردە بىرنەشە كوللەدج انىقتالعان. وقۋ ورىندارىنىڭ ماتەريالدىق-تەحنيكالىق بازاسىن ەسكەرە وتىرىپ, كوكشەتاۋ قۇرىلىس-تەحنيكالىق جانە ستەپنوگور جوعارى كوللەدجدەرى تاڭدالعان. 10-سىنىپ وقۋشىلارى اراسىندا بولاشاققا باعدار بەرىلىپ, ماماندىق تاڭداۋ توڭىرەگىندە جۇمىس جۇرگىزىلگەن. وقۋشىلار ەكى جىل بويى جالپى ءبىلىم بەرۋ باعدارلاماسى بويىنشا مەكتەپتەگى ساباعىن كوللەدجدەگى وقۋىمەن ۇشتاستىرادى. وسىلايشا, ولار كۇنى ەرتەڭ كاسىبي مامان يەسى اتانادى.
مەملەكەت باسشىسىنىڭ جولداۋىندا كاسىبي ءبىلىم بەرۋ جۇيەسىن رەفورمالاۋ قاجەتتىلىگى ايتىلعان بولاتىن. بۇل وتە ماڭىزدى ماسەلە. تاپسىرمانى تاپ-تۇيناقتاي ورىنداۋ ءۇشىن ءبىزدىڭ وڭىردە مەكتەپ جاسىنان باستاپ جۇمىسشى ماماندىعىن يگەرۋ قولعا الىنىپ وتىر.
كوكشەتاۋ
