2014 جىلعا دەيىن التايدىڭ شىڭدارىندا بارىستىڭ بارى بولجام عانا ەدى. قويشىلار مەن اڭشىلاردىڭ «بارىس كوردىك» دەگەن سوزىنە بىرەۋ سەنسە, ەندى ءبىرىمىز كۇمانمەن قاراعانبىز. سول جىلدىڭ قاڭتارىندا عوي, قار بارىسى ارشاتى جاقتا قۇرىلعان فوتوتۇزاققا ءتۇسىپ, سەنساتسيالىق جاڭالىق بولعان. ودان كەيىن سان مارتە دالەلدەندى. ال توپقايىڭنىڭ تۇسىندا تۇڭعىش رەت فوتوعا ءتۇسىرىلدى.
3300 مەتر بيىكتىككە ۇمسىنىپ تۇرعان بۇركىت سىلەمىنە فوتوتۇزاق قۇرۋ دا وڭاي شارۋا ەمەس. اق قار, كوك مۇزدا ءتۇۋ بيىككە شىعىپ, بارىس باعىپ جۇرگەن ينسپەكتورلاردىڭ ەڭبەگى ەرەن. ولاردىڭ دا ەسىمىن ەل ءبىلۋى كەرەك شىعار, ساپاردى باستاپ بارعان كاتونقاراعاي ۇلتتىق پاركى قاراماعىنداعى جانۋارلاردى قورعاۋ جانە ءوندىرۋ ءبولىمىنىڭ باستىعى ەرىك قاسىموۆ ەدى.
– قىستىگۇنى تاۋ بوكتەرىنە اتپەن, ودان ءارى جاياۋ-جالپى جەتىپ, قۇرعان فوتوتۇزاقتى تەكسەردىك. بۇل جۇمىس ءبىر ءوزىمنىڭ قولىمنان كەلمەيدى. سوندىقتان بىرگە بارعان ارىپتەستەرىمە دە مىڭ العىس. بارساق, اپپاراتىمىز شاشىلىپ جاتىر. ءسويتىپ, الگى قۇرىلعىنى ەتەككە الىپ تۇستىك. شىنىمدى ايتسام, سىنعان قۇرىلعى جارامسىز بولىپ قالدى دەپ ويلاعانمىن. سويتە تۇرا جادى كارتاسىن تەكسەرىپ كورىپ ەدىم, بارىستىڭ بىرنەشە سۋرەتى جارق ەتتى. ەڭ سوڭعى كادرعا قوڭىر ايۋ ءتۇسىپتى, – دەيدى ەرىك قاسىموۆ.
دەمەك تەمىر ساندىقتى سىندىرعان دا ايۋ بولىپ شىقتى. بۇل سۋرەت – التايدىڭ ءالى اشىلماعان قۇپيالارىنىڭ ءبىرى عانا. تاۋ قويناۋىندا قانشاما تىلسىم جاتقانى بەلگىسىز. بىراق تۇمسا تابيعاتتى ساقتاپ, كەلەر ۇرپاققا جەتكىزۋ – ەرىك سىندى تابيعات جاناشىرلارىنىڭ پارىزى.
كاتونقاراعاي ورمانىنىڭ ءار بۇتاعى, ءار تاسىنا دەيىن ءبىر-ءبىر اڭىزدىڭ شەجىرەسى ىسپەتتەس. بارىستىڭ بۇل سۋرەتى دە سول شەجىرەنىڭ جاڭا پاراعى بولماق.
شىعىس قازاقستان وبلىسى,
كاتونقاراعاي اۋدانى
